KO ‘ISIKELI 16
16
Ko Selusalema Fa‘a Hē
1PEA na‘e hoko ‘a e folofola ‘a Sihova kiate au, ‘o pehē, 2Hako‘i-tangata, faka‘ilo ki Selusalema ‘ene ngaahi fakalielia. ‘Io, ke ke lea ki ai, ‘o pehē, Ko e folofola ‘eni ‘a ‘Ātonai Sihova ki Selusalema: 3Ko ho fakatupu mo ho fā‘ele‘i na‘e mei he fonua ‘o ha‘a Kēnani: ko e ‘Āmoli ‘a ho‘o tamai, ka ke fa‘ē ki he Heti.#16.3 ‘Āmoli… Heti; Na‘e lau ‘a e ongo kakaí ni ‘e he kakai ‘Isilelí ko e ongo kakai fe‘auaki mo lotu ‘aitoli.
4Pea ko e me‘a ki ho fanau‘i, ‘i he ‘aho na‘e fā‘ele‘i ai koe, na‘e ‘ikai tā ho uho, pea na‘e ‘ikai kaukau vai koe ke fufulu, pea na‘e ‘ikai ke momo‘i fakamāsima koe, pea na‘e ‘ikai momo‘i ha‘i ‘aki ‘a e kofu ‘o e valevale. 5Na‘e ‘ikai ha mata ‘e faka‘atu‘i koe,#16.5 ‘Oki ‘i ai e fo‘i lea ‘i he faka-Hepelū ‘o e kupu ko ení ‘oku ‘ikai ke mahino. ke fai kiate koe ha taha ‘o e ngaahi me‘a ko ē, ko ‘ene ‘ofa kiate koe; na‘e lī koe ki he matavao, na‘e pehē ‘a e fakalili‘a ki ho sino na ‘i he ‘aho na‘e fā‘ele‘i ai koe.
6Ko e taimi ko ia na‘a ku laka ofi atu, pea u sio kiate koe ‘oku ke tekefili ‘i ho toto, pea u pehē kiate koe, “Neongo ho‘o tekefili ‘i ho toto, ka ke mo‘ui pē.” ‘Io, na‘a ku pehē kiate koe, “Neongo ho‘o tekefili ‘i ho toto, ka ke mo‘ui pē.” 7Na‘a ku ‘ai ke ke hoko ko e toko‘i mano, hangē ko e fisiki ‘a e vao; pea na‘a ke tupu, ta‘ahine, ‘o lahi,#16.7 tupu, ta‘ahine, ‘o lahi; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: tupu hake ‘o finemui. pea na‘a ke a‘u ki he kou‘ahe kulokula; na‘a ke huhu tutu‘u, pea na‘e veliveli mai ho fulufulu; ‘osi, na‘a ke telefua mo molemole.
8Pea u laka ofi atu, pea u vakai tā kuo hoko ho taimi, ‘a e taimi ‘ofa; pea u folahi hoku tapa‘i kofu ‘i ho funga, ‘o ‘ufi‘ufi ho‘o telefua; pea u fuakava kiate koe, ‘io, na‘a ku fai kovinānite mo koe–ko ‘Ātonai Sihova ia mei he Ta‘ehāmai–pea na‘a ke hoko ko ‘eku me‘a.
9Pea u kaukau koe ‘i he vai; pea u tatafi ho toto ke ma‘a, pea u tākai koe ‘aki ‘a e lolo. 10Pea u fakakofu koe ‘aki ‘a e me‘a faka‘ingo‘ingo, pea ko ho sū ko e kili‘i tūkongi, pea na‘a ku ‘ai ho fa‘u ko e tupenu hina, pea ko ho veili ko e silika. 11Pea u ‘ai ke ke teunga‘ia, pea u ‘ai vesa ki ho nima, mo e kahoa ki ho kia. 12Pea u ‘ai ha mama ki ho ihu, mo e hau ki ho telinga, mo e kalauni lāngilangi ki ho ‘ulu. 13Pea na‘a ke teu ‘aki koe ‘a e koula mo e siliva, pea ko ho kofu ko e tupenu hinehina mo e silika mo e me‘a faka‘ingo‘ingo; ko ho‘o me‘akai ko e ‘elito‘i mahoa‘a, mo e honi mo e lolo: pea na‘a ke hōihoifua ‘aupito, pea na‘a ke lalaka hake ai pē, ‘o a‘u ki he tu‘unga fakatu‘i. 14Pea na‘e pavake atu ho ongoongo ‘i he ngaahi pule‘anga koe‘uhi ko ho‘o hōihoifua; he na‘e kakato ia, ko e me‘a ‘i he lāngilangi ‘o‘oku ‘a ia na‘a ku ‘ai kiate koe–ko ‘Ātonai Sihova ia mei he Ta‘ehāmai.
15Ka na‘a ke falala ki ho hōihoifua, pea na‘a ke tu‘unganaki ‘aki ho ongoongo ke fai fe‘auaki, pea na‘a ke humaki ho sino kiate ia fua pē na‘e laka ange;#16.15 ‘Oku ‘i ai e ongo fo‘i lea ‘e ua he kupu ko ení ‘oku ‘ikai ke mahino ‘a hono ‘uhingá. na‘e ‘ona ia. 16Pea na‘a ke to‘o ho kofu ni‘ihi, ‘o ke ngaohi ‘aki hao ngaahi ‘esi pulepule, pea ke fai fe‘auaki ‘i honau funga:#16.16 ‘Oku ‘i ai e ngaahi fo‘i lea ‘e fā ‘i he kupu ko ení ‘a ia ‘oku ‘ikai ke mahino ‘a hono ‘uhingá. ko e ngaahi me‘a na‘e ‘ikai totonu ke ‘i ai, pea na‘e ‘ikai totonu ke hoko. 17Pea na‘a ke to‘o ‘a e nāunau na‘a ke teu ‘aki, ‘a ia na‘e ngaohi ‘aki ‘eku siliva mo ‘eku koula, ‘a ia kuo u ‘atu mo‘ou, pea na‘a ke ngaohi ‘aki ha‘o ngaahi tamapua tangata pea ke fe‘auaki mo kinautolu; 18pea na‘a ke to‘o ho ngaahi kofu faka‘ingo‘ingo, ‘o ke kofu ‘aki kinautolu, pea ko ‘eku lolo mo ‘eku ‘inisēnisi na‘a ke tuku ‘i honau ‘ao. 19Pea ko ‘eku me‘akai, ‘a ia na‘a ku ‘atu kiate koe, ‘a e ‘elito‘i mahoa‘a, mo e lolo, mo e honi, ‘a ia na‘a ku fafanga‘aki koe, na‘a ke tuku ia ‘i honau ‘ao mo‘o ngangatu fakahōifua; ‘io, na‘e pehē–ko ‘Ātonai Sihova ia mei he Ta‘ehāmai.
20Pea na‘a ke to‘o ho‘o fānau tangata mo fānau fefine, ‘a ia na‘a ke fā‘ele‘i kiate au, ‘o ke feilaulau ‘aki ki he fa‘ahinga ko ē ke nau me‘akai ‘aki–ta na‘e si‘i ‘apē ho‘o fe‘auaki ko ē! 21‘Io, na‘a ke tāmate‘i ‘eku fānau, ‘o ke foaki kinautolu ki he fa‘ahinga ko ē, ho‘o fakalaka kinautolu ‘i he afi. 22Pea ‘i he ngaahi fakalielia mo e ngaahi fe‘auaki na‘a ke fai na‘e ‘ikai ha‘o manatu ki he taimi ‘o ho‘o tamasi‘i, ‘a e taimi na‘a ke telefua mo molemole, ‘o tekefili ‘i ho toto.
Ko Selusalema ko e Pa‘umutu
23Pea hili ho‘o fu‘u kovi ko ē (‘oiauē, ‘oiauē ko ē!–ko ‘Ātonai Sihova ia mei he Ta‘ehāmai). 24Ko eni kuo ke langa fai‘anga fe‘auaki ma‘au, pea kuo ke ngaohi hao ‘esi ‘i he mala‘e kotoa pē. 25Kuo ke langa hao ‘esi ‘i he tuliki ‘o e hala kotoa pē, pea kuo ke fakapalakuu‘i ho hōihoifua, pea kuo ke faka‘atā ho tui ki he kakai kotoa na‘e ‘alu ange, kuo ke ‘ai ke lahi ‘aupito ho‘o fe‘auaki. 26Kuo ke fai fe‘auaki foki mo ha‘a ‘Isipite ‘oku nofo vāofi, ko e fa‘ahinga ‘oku hulu ai ‘a kita ni; ‘io, na‘a ke ‘ai ke lahi ho fe‘auaki ke fakatupu ‘eku houhau.
27Pea vakai na‘a ku hiki tā hoku nima kiate koe, pea u fakasi‘isi‘i ho ‘inasi, pea na‘a ku tukuange koe ke fa‘iteliha ai ‘a e kakai ‘oku fehi‘a kiate koe, ‘a e hako fefine ‘o e kau Filisitia, ‘a ia na‘a nau maa‘i ho ‘alunga mousa‘a.
28Pea na‘a ke fai ki ha‘a ‘Āsilia ke fe‘auaki mo ia, ko e ‘ikai lava ke topono ho‘o holi: ko ia na‘a ke fe‘auaki mo kinautolu, pea na‘a mo ia na‘e ‘ikai te ke topono ai. 29Pea na‘a ke mōia atu ho‘o fe‘auaki ki he fonua mesianiti ko Kalitia; ka na‘a mo e fu‘u me‘a ko ia na‘e ‘ikai te ke topono ai.
30Hono ko e me‘a kehe ‘a e holi noa ‘a ho loto!–ko ‘Ātonai Sihova ia mei he Ta‘ehāmai–‘i ho‘o fai ‘a e ngaahi fu‘u me‘a ko ē ko e ngāue ‘a ha fefine pa‘umutu ta‘emangoi!#16.30 ‘Oku kamata ‘aki ‘a e vēsí ni ‘i he faka-Hepeluú ha ngaahi fo‘i lea ‘e tolu ‘a ia ‘oku ‘ikai ke mahino ‘a hono ‘uhingá. 31Ko ho‘o langa hao fai‘anga fe‘auaki ‘i he tuliki ‘o e ngaahi hala, mo ngaohi hao ‘esi ‘i he ngaahi mala‘e–tā ‘oku ‘ikai te ke hangē ko e pa‘umutu kehe, ho‘o ta‘etoka‘i ‘a e to‘ongapō. 32Ko e uaifi faikovi ia ‘oku ne puke atu ki ha ni‘ihi kehe ‘i he funga ‘o hono ‘unoho! 33Ko e anga ‘o e pa‘umutu kotoa pē ‘oku ‘ange me‘a‘ofa kiate kinautolu; ka ko e fefine koe ‘oku ke foaki ha‘o me‘a‘ofa ki ho kau ‘ofa‘anga; ‘io, na‘a ke totongi kiate kinautolu ‘enau omi kiate koe mei he potu kotoa pē ke fe‘auaki mo koe. 34Ko ia na‘e ‘iate koe ‘a e anga na‘e makehe mo e kau fefine ‘i ho‘o fai pa‘umutu, he na‘e ‘ikai muimui kiate koe ‘a e kau tangata ke fe‘auaki: pea ‘i ho‘o ‘ange ‘a e to‘ongapō kae ‘ikai ‘omi ‘a e to‘ongapō kiate koe, ko e me‘a ko ia ‘oku ke makehe ai.
Ko Hono Fakamāu‘i ‘o Selusalema
35Ko ia, ‘e Fefine Pa‘umutu, ke ke fanongo ki he folofola ‘a Sihova.
36Ko e folofola ‘eni ‘a ‘Ātonai Sihova: Ko e me‘a ‘i he tuku holo ho mā‘anga,#16.36 pe pa‘anga kapa. mo e tatala ho‘o telefua‘i ho‘o fe‘auaki mo ho kau ‘ofa‘anga, pea koe‘uhi ko ho ngaahi ‘aitoli fakalielia, pea ke sauni ‘a e toto ‘o ho‘o fānau, ‘a ia na‘a ke foaki kiate kinautolu; 37ko ia ko au ‘eni ‘oku ou tānaki ho kau ‘ofa‘anga, ‘a ia na‘a mou fefiefia‘aki, mo e fa‘ahinga kotoa na‘a ke ‘ofa ki ai, mo e fa‘ahinga kotoa na‘a ke fehi‘a ki ai; ‘io, te u tānaki kinautolu kiate koe mei he ngaahi potu takatakai, pea te u tatala kiate kinautolu ho‘o telefua, pea te nau mamata ki ho mā‘anga kotoa. 38Pea te u fakamāu‘i koe ‘aki ‘a e ngaahi lao ‘o e faikovi-‘a-alafia, mo e fefine fakapō; pea te u ‘atu koe ko e feilaulau toto ‘o e ‘ita mo e fua‘a.#16.38 ‘Oku fihi. 39‘Io, te u tuku koe ki honau nima, pea te nau holoki ho ngaahi fai‘anga fe‘auaki, pea te nau maumau ho ngaahi ‘esi; pea te nau vete ho ngaahi kofu meiate koe, pea te nau to‘o ‘a e nāunau ‘oku ke teu ‘aki: pea te nau tuku koe ‘oku ke telefua mo molemole.
40Pea te nau ‘omi ‘a e fakataha ke fai kiate koe, pea te nau tolomaka‘i koe, pea te nau tu‘utu‘u fakaikiiki ‘aki ‘enau heletā. 41Pea te nau tutu ho ngaahi fale ‘aki ‘a e afi, pea te nau fai ho tautea ‘oku sio ki ai ‘a e kau fefine tokolahi: pea te u ‘ai ke tuku ho‘o fai fe‘auaki, pea ‘e ‘ikai foki te ke toe ‘ange ‘a e to‘ongapō. 42Ko ia, te u fakamokomoko ‘eku ‘ita kiate koe, pea ‘e afe ‘eku fua‘a meiate koe, ka u mālōlō: ‘oua ‘e toe fakahoha‘asi. 43Ko e me‘a ‘i he ‘ikai te ke manatu ki he taimi ‘o ho‘o tamasi‘i, ka kuo ke fakakina au ‘aki ‘a e ngaahi fu‘u me‘a ko ē; ko ia ko au foki, vakai, te u ‘atu ho ‘alunga ki ho tumu‘aki–ko ‘Ātonai Sihova ia mei he Ta‘ehāmai–ke ‘oua na‘a ku fai mousa‘a mo au ‘i he lango ki ho‘o ngaahi fu‘u fakalielia na.
Ko e Tatau pē ‘a e Tamá mo e Fa‘eé
44Vakai, ko ia fua pē ‘oku ngāue‘aki ‘a e paloveepi te ne fai paloveepi kiate koe, ‘o pehē, Hangē ko e fa‘ē, ‘e pehē ‘ene ta‘ahine. 45Ko e ta‘ahine koe ‘a ho‘o fa‘ē, ‘a ia na‘a ne li‘aki hono husepāniti mo ‘ene fānau; pea ko e sisitā koe ‘o ho ngaahi sisitā, ‘a ia na‘a nau li‘aki honau ngaahi husepāniti mo ‘enau fānau: ko ho‘omou fa‘ē ko e Heti, pea ko ho‘omou tamai ko e ‘Āmoli.#16.45 Heti… ‘Āmoli; Vakai ki he 16.3.
46Pea ko ha sisitā lahi ko Samēlia mo ‘ene fānau fefine, ‘a ia ‘oku ne nofo ki ho to‘ohema: pea ko ho sisitā ‘oku si‘i hifo ‘iate koe ‘oku nofo ki ho to‘omata‘u ko Sōtoma ia mo ‘ene fānau fefine. 47Pea ko ho‘o fou ‘i honau ngaahi ‘alunga, mo fai ki he‘enau ngaahi fakalielia, tala‘ehai ko e me‘a si‘i pē; kaekehe na‘e hulu ‘i ha‘anautolu ho‘o fakamousa‘a‘i ho ngaahi ‘alunga kotoa pē.
48Tangi ‘eku mo‘ui–ko ‘Ātonai Sihova ia mei he Ta‘ehāmai–ha fai ‘e ho sisitā ko Sōtoma mo ‘ene fānau fefine ‘o hangē ko ho‘o fai ‘a‘au mo ho‘o fānau fefine. 49Vakai, ko eni ‘a e kovi ‘i ho sisitā ko Sōtoma, ko e fakamofutofuta, ō mo e mohu me‘akai, mo e nofo nonga ta‘ehoha‘a, ‘a ia mo ‘ene fānau fefine; pea ko e nima ‘o e tu‘utāmaki mo e masiva na‘e ‘ikai te ne pukepuke. 50Pea na‘a nau anga hiki, pea na‘a nau fai me‘a fakalielia ‘i hoku ‘ao; ko ia na‘a ku tafi‘i kinautolu ‘i he‘eku sio ki ai.
51Ko Samēlia foki, tala‘ehai kuo ne fai ‘a e vaeua ‘o ho‘o ngaahi angahala ‘au; seuke, kuo ke ‘ai ho‘o ngaahi fakalielia ke hulu ‘i ha‘anautolu, pea kuo ke ‘ai ke hā ngali mā‘oni‘oni ho ngaahi sisitā, koe‘uhi ko e ngaahi fu‘u fakalielia kuo ke fai. 52Ko ia, ke ke fua, ‘e koe foki, ho‘o mā, ‘a e mā na‘a ke tuku ki ho ngaahi sisitā; ko e me‘a ‘i ho‘o ngaahi angahala, ho‘o fai fakalielia ange ‘i ha‘anautolu, ko ia ‘oku nau hā tonuhia ange ‘iate koe: ko ia ke ke laea mo koe foki, ‘o fua ho fakamā, he kuo ke ‘ai ke hā ngali tonuhia ho ngaahi sisitā.
‘E Toe Langa ‘a Sōtoma mo Samēlia
53Pea te u liliu ‘enau pōpula, ‘a e pōpula ‘o Sōtoma mo ‘ene fānau fefine, mo e pōpula ‘o Samēlia mo ‘ene fānau fefine, mo e pōpula ‘o ho‘o pōpula ‘i honau lotolotonga; 54koe‘uhiā ke ke fua ho‘o mā, pea ke laea ‘i he ngaahi me‘a kehekehe kuo ke fai, ho‘o fai ha fakalelu ma‘anautolu. 55Pea ko ho ngaahi sisitā, ‘a Sōtoma mo ‘ene fānau fefine, te nau foki ki honau anga mu‘a, pea ko Samēlia mo ‘ene fānau fefine te nau foki ki honau anga mu‘a, pea ko koe mo ho‘o fānau fefine te mou foki ki homou anga mu‘a. 56Pea tala‘ehai na‘e kau ho‘o lau ki ho sisitā ko Sōtoma ‘i he taimi ‘o ho‘o fu‘u mofuta na; 57‘i he te‘eki ke tatala ho‘o kovi, hangē ko e taimi na‘e manukia ai koe ‘e he fānau fefine ‘o Sīlia mo hono ngaahi feitu‘u takatakai, ‘a e fānau fefine ‘a Filisitia, ‘a ia ‘oku nau fakasīkaka‘i koe ‘i he tukui feitu‘u. 58Ko ho‘o fai fakamousa‘a, mo ho‘o ngaahi fakalielia, ‘oku ke fua ia kotoa–ko Sihova ia mei he Ta‘ehāmai.
Ko ha Kovinānite ‘e Tolonga ‘o Ta‘engata
59He ko e folofola ‘eni ‘a ‘Ātonai Sihova, te u fai kiate koe ‘o hangē ko ho‘o fai, ho‘o ta‘etoka‘i ‘a e fuakava ‘i ho‘o maumau ‘a e kovinānite. 60Ka te u manatu pē ‘e au ki he‘eku kovinānite na‘e fai mo koe ‘i he taimi ‘o ho‘o tamasi‘i, ‘io, te u fakapapau kiate koe ha kovinānite ta‘engata. 61Pea te ke manatu ki ho ngaahi ‘alunga, pea ke mā ai, ‘i ho‘o ma‘u ho ngaahi sisitā, ‘a kinautolu ‘oku lahi ‘iate koe mo kinautolu ‘oku si‘i ‘iate koe: he te u ‘atu kinautolu kiate koe ma‘ao fānau, neongo ‘oku ‘ikai te nau kau ki ho‘o fuakava. 62Pea te u fakapapau ‘e au ‘eku kovinānite mo koe, pea te ke ‘ilo ko Sihova au. 63Koe‘uhi ā ke ke manatu, pea ke mā ai, pea ‘ikai te ke kei kākunga ke mafa‘a ho ngutu, koe‘uhi ko ho‘o laea; ‘oka kuo u fakamolemole kiate koe ‘a e me‘a kotoa kuo ke fai–ko ‘Ātonai Sihova ia mei he Ta‘ehāmai.
Currently Selected:
KO ‘ISIKELI 16: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
