KO ‘EKISOTO 34

Ko e ‘Onga Lau‘i Maka Hono Uá

(Teu 10.1-5)

1PEA folofola ‘a e ‘Eiki kia Mōsese, Ke ke tā ha‘o ongo lau‘i maka, ‘o hangē ko e ‘uluaki: pea te u tohi ki he ongo maka ‘a e ngaahi lea na‘e tu‘u ‘i he ongo ‘uluaki maka, ‘a ia na‘a ke laiki. 2Pea ke fai ho‘o teu ki he ‘apongipongi, pea ke ‘alu hake ‘apongipongi ki he mo‘unga ko Sainai, ‘o tu‘u ai ‘i hoku ‘ao ‘i he funga mo‘unga. 3Ka ‘e ‘ikai ha tangata ‘e ‘alu hake mo koe, pea ‘e ‘ikai ha tangata ‘e ‘iloa ‘i he mo‘unga kotoa, pea na‘a mo e fanga manu iiki mo e fanga manu lalahi ka ‘e ‘ikai te nau kaikai ‘i he talalo ‘o e mo‘unga ko ia. 4Pea ne hanga ‘o tā ha ongo lau‘i maka ‘o hangē ko e ‘uluaki; pea tu‘u hengihengi hake ‘a Mōsese, ‘o ‘alu hake ki he mo‘unga ko Sainai ‘o hangē ko e tu‘utu‘uni ‘a e ‘Eiki kiate ia, pea na‘a ne to‘o ‘a e ongo makatohi.

5Pea hā‘ele hifo ‘a Sihova ‘i he ‘Ao, ‘o tu‘u fakataha mo ia ‘i he potu ko ē, ‘o ne kalanga ‘aki ‘a e huafa ‘o Sihova.#34.5 Sihova; Vakai ki he 3.14. 6‘Io, na‘e hā‘ele ange ‘a e ‘Eiki ‘i hono ‘ao, ‘o ne folofola, Ko Sihova, ‘a Sihova ‘Otua, ‘Alo‘ofa mo Anga lelei, Tuai ki he Houhau, pea Fonu ‘i he Kelesi mo e Mo‘oni;#‘Eki 20.5-6; Nōm 14.18; Teu 5.9-10; 7.9-10 7‘oku ta‘ofi meesi ma‘a e ngaahi toko afe,#34.7 ngaahi toko afe; pe ngaahi to‘u tangata ‘e laui afe. ‘oku ne fakamolemole ‘a e kovi mo e talangata‘a mo e angahala, ka ‘e ‘ikai ‘aupito te ne faka‘atā ‘a e halaia; ‘oku ne ‘eke ‘a e kovi ‘a e mātu‘a ki he fānau, mo e makapuna, ‘o a‘u ki he tolu mo e faa‘i to‘utangata.

8Pea fakavave ‘a Mōsese, ‘o ne punou ki he kelekele ‘o hū. 9Pea ne pehē, ‘Ēī, kapau leva kuo u ta‘imālie ‘ofa ‘i ho ‘ao, ke hā‘ele mu‘a ‘a e ‘Afiona ‘i homau lotolotonga; he ko e kakai kia kekeva ia; pea fakamolemolea ‘emau kovi mo ‘emau angahala, pea ke ma‘u ‘a kimautolu mo‘o tofi‘a.

Ko e Fakafo‘ou ‘o e Kovinānité

(‘Eki 23.14-19; Teu 7.1-5; 16.1-17)

10Pea folofola mai ‘e ia, Ko au eni ‘oku ou fai ‘eku fuakava: te u fai ‘i he ‘ao ‘o ho kakai kotoa ha ngaahi me‘a fakaofo, ‘a ia kuo te‘eki ke feia ‘i ha potu ‘e taha ‘o māmani, pe ‘i ha taha ‘o e ngaahi pule‘anga: pea ko e kakai kotoa ‘oku ke nofo ‘i honau lotolotonga te nau mamata ki he mafai ‘a e ‘Eiki; he ko e me‘a faka‘ulia ‘a ‘eta feangai ‘e fai. 11Tokanga kiate koe ke tauhi ‘a e ngaahi tu‘utu‘uni ‘oku ou ‘atu he ‘aho ni; vakai, ko ‘eku kapusi ē mei ho ‘ao ‘a ha‘a ‘Āmoli, mo ha‘a Kēnani, mo ha‘a Heti, mo ha‘a Pēlisi, mo ha‘a Hevi, mo ha‘a Siepusi. 12Tokanga kiate koe na‘a ‘iloange te ke fai taliti mo e kakai ‘o e fonua ‘oku ke ‘alu ki ai, kae hoko ia ko e tauhele ‘i ho lotolotonga: 13ka te ke holoki honau ngaahi ‘ōlita, pea te ke laiki ‘enau ngaahi pou tapu, pea te ke tā ‘enau ngaahi ‘āsela.#Teu 16.21

14He ‘e ‘ikai te ke lotu ki ha ‘otua kehe; he ko e ‘Eiki, ‘a ia ko hono huafa ko Fua‘a, ko e ‘Otua fua‘a ia: 15na‘a ‘iloange te ke fai taliti mo e kakai ‘o e fonua, pea nau tango ange ki honau ngaahi ‘otua, ke fai feilaulau ki ai, pea tala kātoanga kiate koe, pea ke hanga ‘o kai mei he‘ene feilaulau; 16pea ke ‘omi honau ngaahi ‘ōfefine ke nonofo mo ho‘ou ngaahi foha, pea tango ange ‘e honau ngaahi ‘ōfefine ki honau ngaahi ‘otua, ‘o nau taki ho ngaahi foha ke tango ki honau ngaahi ‘otua.

17‘E ‘ikai te ke ngaohi hao ngaahi ‘otua ukamea.#‘Eki 20.4; Lev 19.4; Teu 5.8; 27.15

18Te ke tauhi ‘a e kātoanga Tapu-lēvani. Ko ha fitu‘i ‘aho te ke kai me‘a ta‘elēvani, ‘o hangē ko ‘eku fekau, ‘i hono taimi tu‘utu‘uni, ‘i he māhina ko ‘Āpipi: he ko e māhina ko ‘Āpipi na‘a ke hū kitu‘a ai mei ‘Isipite.#‘Eki 12.14-20; Lev 23.6-8; Nōm 28.16-25

19‘Ilonga ha ‘olopo‘ou ‘oku ‘a‘aku ia; pea pehē mo ho‘o fanga pulu mo ho‘o fanga sipi, kapau ko e tangata ‘a e ‘olopo‘ou.#‘Eki 13.2 20Pea ko e ‘olopo‘ou ‘o e ‘asi te ke huhu‘i ‘aki ha lami: pea kapau ‘e ‘ikai te ke huhu‘i, te ke fesi‘i hono kia. Te ke huhu‘i ho ngaahi foha kotoa pē ‘oku ‘olopo‘ou.#‘Eki 13.13 Pea ‘e ‘ikai tu‘u mola ha toko taha ‘i hoku ‘ao.

21Te ke ngāue ‘i he ‘aho ‘e ono, ka ‘i hono fitu ‘o e ‘aho te ke mālōlō: pe ko e tōta‘u, pe ko e ututa‘u, te ke mālōlō pē.#‘Eki 20.9-10; 23.12; 31.15; 35.2; Lev 23.3; Teu 5.13-14

22Pea te ke fai ‘a e Kātoanga Lauuike, ‘a e Polopolo Uite, pea mo e Kātoanga Ututa‘u ‘i he faka‘osi ‘o e ta‘u.#Lev 23.15-21,39-43; Nōm 28.26-31

23Tu‘o tolu ‘i he ta‘u ‘e fakahā kinautolu ‘e ho‘o kau tangata kotoa pē ‘i he ‘ao ‘o e ‘Afio ‘a Sihova ko e ‘Otua ‘o ‘Isileli, 24he te u kapusi mei ho ‘ao ‘a e ngaahi pule‘anga, pea te u toloaki atu ho ngaahi kau‘ā: pea ‘e ‘ikai mānumanu ‘e ha taha ki ho kelekele, ‘oka ke ka ‘alu hake ke fakahā koe ‘i he ‘ao ‘o Sihova ko ho ‘Otua, ‘a e tu‘o tolu ‘i he ta‘u.

25‘E ‘ikai te ke fono ‘aki ‘a e toto ‘o ‘eku feilaulau ha mā ta‘elēvani, pea ‘e ‘ikai ‘ahoia ‘a e feilaulau ‘o e kātoanga Pāsova.#‘Eki 12.10

26Ko e fungani polopolo ‘o ho kelekele te ke ‘omi ki he fale ‘o Sihova ko ho ‘Otua.#Teu 24.21; 26.2 ‘E ‘ikai te ke haka ha ki‘i kosi ‘i he huhu‘a ‘o ‘ene fa‘ē.

27Pea folofola ‘a Sihova kia Mōsese, Ke ke tohi ma‘au ‘a e ngaahi lea ko ia: he kuo u fai kovinānite mo koe mo ‘Isileli ‘i he funga ‘o e ngaahi lea ko ia. 28Pea na‘a ne ‘i he potu ko ia mo e ‘Eiki ‘i he ‘aho ‘e fāngofulu mo e pō ‘e fāngofulu; na‘e ‘ikai te ne kai ai ha me‘akai, pe inu ha vai. Pea na‘a ne tohi ‘i he ongo maka tohi ‘a e ngaahi lea ‘o e kovinānite, ‘a e Fekau ‘e Hongofulu.

29Pea ‘i he faifai pea ‘alu hifo ‘a Mōsese mei he mo‘unga ko Sainai, (na‘a ne ha‘u mo ia ‘i hono nima ‘a e ongo maka fakamo‘oni ‘i he‘ene ‘alu hifo mei he mo‘unga) na‘e ‘ikai ‘ilo ‘e Mōsese ‘oku tapa ‘a e kili ‘o hono fofonga, ko e me‘a ‘i he fefolofolai kuo fai.#2 Kol 3.7-16 30Pea ‘i he mamata ‘e ‘Ēlone mo ha‘a ‘Isileli kātoa kia Mōsese, tā ‘oku tapa ‘a e kili ‘o hono fofonga; pea na‘a nau manavahē ke ‘unu‘unu kiate ia. 31Ka ka ui ange kinautolu ‘e Mōsese, pea na‘e toki foki kiate ia ‘a ‘Ēlone mo e hou‘eiki ‘o e Fakataha; pea na‘e alea ‘a Mōsese mo kinautolu. 32Pea hili ia na‘e ‘unu‘unu mai ‘a ha‘a ‘Isileli kotoa; pea na‘a ne ‘a‘au kiate kinautolu ‘a e ngaahi tu‘utu‘uni kotoa pē kuo na fefolofolai ki ai mo e ‘Eiki ‘i he mo‘unga ko Sainai. 33Pea ‘i he faka‘osi ‘e Mōsese ‘ene lea kiate kinautolu, na‘a ne ‘ai ha veili ki hono mata. 34Ka ‘i he hū ‘a Mōsese ki he ‘ao ‘o e ‘Eiki ke fefolofolai mo ia, na‘a ne to‘o ‘a e veili kae‘oua ke ne hū kitu‘a. Pea ne hū kitu‘a, ‘o tala ki ha‘a ‘Isileli ‘a e me‘a kuo tu‘utu‘uni mai; 35pea vakai ‘e ha‘a ‘Isileli ki he fofonga ‘o Mōsese, tā ‘oku huhulu ‘a e kili ‘o hono fofonga: ko ia na‘e toe ‘ai ‘e Mōsese ‘a e veili ki hono mata kae‘oua ke ne toe hū ke fefolofolai mo ia.

Currently Selected:

KO ‘EKISOTO 34: TMB

Highlight

Copy