KO ‘EKISOTO 33

1PEA folofola ‘a Sihova kia Mōsese, Tu‘u, hiki mei heni, ‘a koe mo e kakai kuo ke ‘ohake mei ‘Isipite, ‘o ‘alu ki he fonua ‘a ia na‘a ku fuakava ai kia ‘Epalahame, ‘Aisake, mo Sēkope, ‘o pehē, Te u foaki ia ki ho hako:#Sēn 12.7; 26.3; 28.13 2pea te u tuku atu ha ‘āngelo ke taki ho‘omou ‘alu; (pea te u kapusi ‘a ha‘a Kēnani, mo ha‘a ‘Āmoli, mo ha‘a Heti, mo ha‘a Pēlisi, ‘a ha‘a Hevi, mo ha‘a Siepusi) 3‘o a‘u ki he fonua ‘oku mahutafea ‘i he hu‘akau mo e honi: ka ‘e ‘ikai te u ‘alu hake au ‘i ho lotolotonga, he ko e kakai kia kekeva koe; na‘a ‘iloange te u faka‘auha koe ‘i he hala.

4Pea ‘i he fanongo ‘a e kakai ki he ongoongo kovi ko ia, na‘a nau fetāngihi, pea na‘e ‘ikai ‘ai ‘e ha taha ‘ene teunga. 5Pea folofola ‘a Sihova kia Mōsese, Lea ki ha‘a ‘Isileli, ‘o pehē, Ko e kia kekeva kimoutolu: kapau te u ‘alu ‘i homou lotolotonga ko ha mōmeniti ‘e taha, te u faka‘auha koe: pea ko eni, hu‘ihu‘i ho‘o teunga, ka u vakai pe ko e hā te u fai kiate koe. 6Pea na‘e vete ‘e ha‘a ‘Isileli ‘enau teunga mei he mo‘unga ko Hōlepi, ‘o fai atu.

Ko e Tāpanekale ‘Afio‘anga ‘o Sihova

7Pea ko e anga ‘o Mōsese ke ‘ave ‘a e tēniti, ‘o fokotu‘u ‘i tu‘a ‘apitanga ‘o mama‘o atu; pea na‘a ne ui ia ko e Tēniti Fe‘iloaki‘anga. Pea ka pehē, pea ‘ilonga ha taha na‘e kumi kia Sihova, na‘a ne ‘alu atu ki he Tēniti Fe‘iloaki‘anga, ‘a ia na‘e ‘i he tu‘a ‘apitanga. 8Pea ka faifai pea me‘a ange ‘a Mōsese, ko e ‘alu ki he Tēniti, na‘e mālanga ki ‘olunga ‘a e kakai, ‘o tu‘u takitaha ‘i hono mata tēniti, ‘o mo‘u sio atu kia Mōsese, ‘o a‘u ki he‘ene hū ki he Tēniti. 9Pea ka hū leva ‘a Mōsese ki he Tēniti, na‘e ‘alu hifo ‘a e Pou-‘ao ‘o tu‘u ‘i he mata tēniti, ‘o alea mo Mōsese. 10Pea ka sio ‘e he kakai kotoa ki he tu‘u ‘a e Pou-‘ao ‘i he mata Tēniti, na‘a nau tutu‘u kotoa pē ‘o lotu, takitaha ‘i hono mata tēniti. 11Pea ko e fefolofolai ‘a e ‘Eiki mo Mōsese na‘e fai ko e femātaaki, ‘o hangē ko e talanoa ‘a ha tangata mo hono kaume‘a. Pea na‘e foki ia ki he ‘apitanga, ka ko hono tauhi ko Siosiua ko e foha ‘o Nuni, ko e talavou, na‘e ‘ikai mahu‘i ia mei he Tēniti.

Ko e Fakapapau ‘e Sihova ‘e Kau mo Hono Kakaí

12Pea fakatau folofola ‘a Mōsese kia Sihova, ‘o pehē; Vakai, kuo ke me‘a mai, ‘o pehē, Ke ke ‘ohake ‘a e kakai ni; ka kuo ‘ikai te ke fakahā mai pe ko hai te ke fekau ke ‘alu mo au: ka kuo ke folofola mai, ‘o pehē, ‘Oku ou ‘ilo ho hingoa, pea ‘oku ou lelei‘ia ‘iate koe. 13Pea ko eni, kapau mo‘oni kuo u ta‘imālie ‘ofa ‘i ho ‘ao, ke ke faka‘ilo mai mu‘a ho hala, ke u ‘ilo‘i koe; koe‘uhi ā ke u fakahōifua ‘a e ‘Afiona: ke ke me‘a foki ko e pule‘anga ni ko ho‘o kakai.

14Pea folofola mai ‘e ia, Ko hoku Fōtunga ‘e ‘alu mo koe, pea te u fakamālōlō koe.

15Pea ne fakatau folofola ange, Kapau ‘e ‘ikai ‘alu mo kimautolu ho Fōtunga, ‘oua ‘e ‘ohake kinautolu ‘i heni. 16He ko e hā ‘e ‘ilo ai kuo hōifua ‘a e ‘Afiona kiate au, ‘a au mo ho‘o kakai? ‘ikai ko ‘etau ō pē? ‘A ē ‘oku mavahe ai kimautolu, ‘a au mo ho‘o kakai, mei he ngaahi fa‘ahinga kotoa pē ‘oku ‘i he funga ‘o e kelekele.

17Pea folofola ‘a Sihova kia Mōsese, Te u fai mo e me‘a ko ia foki, ‘a ia kuo ke lea ki ai; he kuo u lelei‘ia ‘iate koe, pea ‘oku ou ‘ilo ho hingoa.

18Pea pehē ‘e ia, ‘Oku ou kole, ke ke fakahā mai ho lāngilangi.

19Pea ne folofola mai, Te u fakaholo atu ‘i ho ‘ao ‘a hoku ngaahi lelei kotoa pē; pea te u ‘a‘au kiate koe ‘a e hingoa ‘o e ‘Eiki; pea te u ‘ofa kiate ia ‘a ia te u ‘ofa ki ai, pea te u fakamolemole ‘a ia te u fakamolemolea.#Lom 9.15 20Pea folofola mai ia, ‘E ‘ikai te ke lava ke sio ki hoku mata; he ‘oku ‘ikai ha tangata te ne sio ki hoku mata, pea mo‘ui. 21Pea folofola mai ‘a e ‘Eiki, Ko eni, ‘oku ai ha potu ofi mai; pea te ke tu‘u ‘i he funga makatu‘u: 22pea ka faifai pea fakaholo atu hoku lāngilangi, te u ‘ai koe ki ha ava ‘o e makatu‘u, pea te u ‘ufi‘ufi koe ‘aki hoku ‘aofi nima, kae‘oua kuo u ‘alu atu; 23pea te u toki to‘o hoku nima, pea te ke mamata ki hoku tu‘a: ka ko hoku mata e ‘ikai te ke sio ki ai.

Currently Selected:

KO ‘EKISOTO 33: TMB

Highlight

Copy