KO ‘EKISOTO 30

Ko e ‘Ōlita Fai‘anga Feilaulau Tutu

(‘Eki 37.25-28)

1PEA te ke ngaohi ha ‘ōlita tutu‘anga ‘inisēnisi: te ke fa‘u ia ‘aki ‘a e papa sitimi. 2Ko hono lōloa ko e kiupite ‘e taha, pea ko e kiupite ‘a hono māukupu: ‘e tapafā ia: pea ko hono mā‘olunga ko e kiupite ‘e ua: ko hono ngaahi nifo ‘e sino taha pē mo ia. 3Pea te ke ‘aofi ‘aki ia ‘a e koula haohaoa, ‘a hono funga, mo hono ngaahi tafa‘aki takatakai, pea mo hono ngaahi nifo; pea te ke ngaohi ki ai ha teuteu koula takatakai. 4Pea te ke ngaohi ki ai ha ongo kavei koula ‘i hono lalo teuteu, te ke ngaohi ia ‘i he ongo kiato ‘i he ongo tafa‘aki mo‘o ‘ainga kaufata ke kauala ‘aki. 5Pea te ke ngaohi ‘a e kaufata ‘aki ‘a e ‘akau sitimi, ‘o kofu ‘aki ‘a e koula. 6Pea te ke tuku ia ‘i he ‘ao ‘o e Tatau, ‘a ia ‘oku tu‘u ki he ‘A‘ake Fakamo‘oni‘anga, ‘i he tuha mo e Hōifua‘anga, ‘a ia ‘oku ‘i he funga Fakamo‘oni‘anga, ‘a e potu te u fe‘iloaki ai mo koe. 7Pea ‘e tutu ai ‘e ‘Ēlone ‘a e ‘inisēnisi namu kakala: ‘i he pongipongi kotoa pē ‘i he‘ene teuteu ‘a e ngaahi maama, te ne toki tutu ai ia. 8Pea ‘i he fakahā‘ele ‘e ‘Ēlone ‘a e ngaahi maama ‘i he‘ene efiafi, te ne tutu ai ia: ko ha tutu ‘inisēnisi tu‘u ma‘u ia ‘e fai ‘i he ‘ao ‘o Sihova ‘i homou ngaahi to‘utangata. 9‘E ‘ikai te mou tutu ai ha ‘inisēnisi kehe, pe ha feilaulau-mōifua, pe ha feilaulau me‘akai; pea ‘e ‘ikai te mou lilingi ai ha feilaulau kava. 10Pea ko ‘Ēlone te ne fai ‘i hono ngaahi nifo ha fakalelei, ‘o tātu‘otaha ‘i he ta‘u: ko e toto ‘o e feilaulau fakalelei angahala te ne fai‘aki ‘a e holo ma‘a e ‘ōlita, ‘o tātu‘otaha ‘i he ta‘u, ‘i homou ngaahi to‘utangata: ko e me‘a toputapu ia kia Sihova.

11Pea folofola ‘a e ‘Eiki kia Mōsese, ‘o pehē, 12‘Oka ke ka lau ‘a e kakai ‘Isileli, ‘a e kakai ‘oku tu‘u, te nau takitaha ‘omi ha holo ki he ‘Eiki, ke huhu‘i ‘aki hono laumālie, ‘i he taimi ‘o ho‘o lau kinautolu; ke ‘oua na‘a ai ha tautea ‘e tō kiate kinautolu ‘i he fai honau lau. 13Ko eni ‘a e me‘a ‘e ‘omi ‘e ia kotoa pē ‘oku laka atu ki he kakai kuo ‘osi lau, ko ha haafe sikeli: (ko e lau ki he sikeli ‘o e Fale Tapu, ‘o uofulu kela ‘a e sikeli ‘e taha) ‘io, ko e haafe sikeli ko e feilaulau-hapai ia kia Sihova.#‘Eki 38.25-26; Māt 17.24 14Ko kinautolu kotoa pē ‘oku laka atu ki he kakai kuo ‘osi lau, ‘o kamata mei he uofulu ta‘u ‘o fai hake, te nau feia ha feilaulau-hapai kia Sihova. 15‘E ‘ikai ‘omi ‘e he koloa‘ia ke lahi, pea ko e masiva ‘e ‘ikai te ne ‘omi ke si‘i ‘i he haafe-sikeli, ‘i he‘enau ‘omi ‘a e feilaulau-hapai ki he ‘Eiki ke huhu‘i ‘aki homou laumālie. 16Pea te ke tali ‘a e pa‘anga huhu‘i mei ha‘a ‘Isileli, pea te ke tuku ia ki he ngāue ‘o e Tēniti Fe‘iloaki‘anga, ke hoko ko e me‘a fakamanatu ‘o ha‘a ‘Isileli ki he finangalo ‘o e ‘Eiki, ke huhu‘i ‘aki homou laumālie.

17Pea folofola ‘a e ‘Eiki kia Mōsese, ‘o pehē, 18Pea te ke ngaohi ha pālutu‘anga kapa, mo hono tu‘unga ko e kapa foki, ke fai ‘a e kaukau: pea te ke tuku ia ‘i he vaha‘a ‘o e Tēniti Fe‘iloaki‘anga mo e ‘ōlita, pea te ke ‘ai ha vai ki ai.#‘Eki 38.8 19Pea ko ‘Ēlone mo hono ngaahi foha te nau fanofano ai honau nima mo honau va‘e: 20ka nau ka hū ki he Tēniti Fe‘iloaki‘anga, te nau fanofano vai, ke ‘oua te nau mate; pea ka nau ka ‘unu‘unu ki he ‘ōlita ke fai ‘a e ngāue fakalotu, ke fai ha feilaulau-tutu ki he ‘Eiki: 21pea te nau toki fanofano honau nima mo honau va‘e, ke ‘oua te nau mate: pea ‘e tu‘u ia ko e tu‘utu‘uni ta‘engata kiate kinautolu, ‘io, kiate ia mo hono hako ‘o laui to‘utangata.

Ko Lolo Pani Toputapu

22Pea folofola ‘a e ‘Eiki kia Mōsese,#‘Eki 37.29 ‘o pehē, 23Ke ke kumi mai ‘a e ngaahi fa‘ahinga ‘akau namu kakala ‘oku fungani; ko e to‘i‘i mula, fe‘unga mo e sikeli ‘e nimangeau, pea mo e sinamoni melie ko e vaeuamālie pē ‘o e me‘a ko ē, ‘o uangeau mā nimangofulu pē, pea ko e kaho-namu kakala ko e uangeau mā nimangofulu. 24Pea mo e kāsia ‘e nimangeau, fai ki he sikeli ‘o e Fale Tapu; pea mo ha hina lolo ‘ōlive ‘e taha. 25Pea te ke ngaohi ‘aki ia ha lolo tapu ke fai‘aki ‘a e pani; ko ha lolo kakala ngaohi ‘e ha taha ‘oku faiva ‘aki ‘a e fai lolo: ko e lolo tapu ia ke fai‘aki ‘a e pani. 26Pea te ke pani ‘aki ia ‘a e Tēniti Fe‘iloaki‘anga, pea mo e ‘A‘ake Fakamo‘oni‘anga, 27pea mo e Tēpile mo hono nāunau kotoa, pea mo e Tu‘unga Maama mo hono nāunau ‘o‘ona, 28pea mo e ‘Ōlita Tutu‘anga ‘inisēnisi, pea mo e ‘ōlita Tutu‘anga-feilaulau, mo hono nāunau kotoa, pea mo e Pālutu‘anga mo hono Tu‘unga. 29Pea te ke fakatāpui ‘a e ngaahi me‘a ko ia ke toputapu; ‘ilonga ha me‘a ‘e lave ki ai, ‘e tapu leva.#30.29 ‘e tapu leva; pe ‘e lavea koe‘uhí ko e mālohi ‘ene toputapú; See 29.37. 30Pea te ke pani ‘aki ‘a ‘Ēlone mo hono ngaahi foha, pea te ke fakatāpui kinautolu ke fai ‘a e ngāue fakataula‘eiki kiate au. 31Pea te ke lea ki ha‘a ‘Isileli, ‘o pehē, Ko e lolo tapu eni kiate au ke fai‘aki ‘a e pani, ‘o laui to‘utangata. 32‘E ‘ikai tākai ‘aki ia ‘a e kakano ‘o e kakai, pea ‘e ‘ikai te mou ngaohi ha me‘a hangē ko ia, ke tatau hono fai: ko e me‘a tapu ia, pea ‘e tapu kiate kimoutolu. 33‘Ilonga ia ‘oku ne fai ha lolo hangē ko ia, pea ‘ilonga ia ‘oku ne ‘ai ia ki ha kehe, ‘e motuhi ia mei hono kakai.

34Pea folofola ‘a e ‘Eiki kia Mōsese, ‘o pehē, Ke ke kumi ‘a e ‘akau namu kakala ko e sitakiti, pea mo e ‘ōnike, pea mo e ‘akau namu kakala ko e kalipeno, mo e laipeno mo‘onia: ke tatau hono mamafa kotoa pē. 35Pea te ke ngaohi ‘aki ia ‘a e ‘inisēnisi, ko e me‘a namu kakala ngaohi ‘e ha taha ‘oku ne faiva ‘aki ‘a e me‘a namu kakala: ‘e fakamāsima ia, ‘e ma‘a mo tapu. 36Pea te ke tuki ha me‘a mei ai ke momoiki, pea te ke tuku ha me‘a ‘i he ‘ao ‘o e Fakamo‘oni‘anga ‘i he Tēniti Fe‘iloaki‘anga, ‘a e potu teu fe‘iloaki ai mo koe: ‘e toputapu ia kiate koe. 37Pea ko e ‘inisēnisi te ke ngaohi, ‘e ‘ikai te mou ngaohi ma‘amoutolu ‘i hono anga ko ia: te mou lau ‘oku tapu ia ki he ‘Eiki. 38Ko e tangata te ne ngaohi hano tatau ke nanamu ki ai, ‘e motuhi ia mei hono kakai.

Currently Selected:

KO ‘EKISOTO 30: TMB

Highlight

Copy