KO ‘ĒSETA 9
9
Ko Hono Faka‘auha ‘e he Kakai Siú ‘a Honau Ngaahi Filí
1PEA ‘i hono māhina hongofulu mā ua, ‘a ia ko ‘Ātali, ‘i hono ‘aho hongofulu mā tolu, kuo a‘usia ‘a e folofola mo e tu‘utu‘uni ‘a e tu‘i hono fai, ‘io, ‘a e ‘aho na‘e ‘amanaki ai ‘e he ngaahi fili ‘o e kau Siu te nau fai‘iteliha kiate kinautolu–‘osi na‘e liliu ia, ‘o fa‘iteliha ‘a e Siu kiate kinautolu na‘e fehi‘a mai; 2–na‘e toki fakatahataha ‘a e kau Siu ‘i he‘enau ngaahi kolo#9.2 ‘i he‘enau ngaahi koló; pe ‘i he feitu‘u nofo‘anga ‘o e kai Siú ‘i he kolo kotoa pē. ‘i he tukui vahefonua ‘o Kingi ‘Ehasivelo, ke ala kiate kinautolu na‘e feinga ke fai mai ha kovi. Pea na‘e ‘ikai matu‘u ha taha ‘i honau ‘ao; he kuo tō honau ngeia ki he ngaahi kakai kotoa. 3Pea ko e hou‘eiki kotoa ‘o e ngaahi vahefonua, mo e ngaahi tu‘i fakale‘o, mo e ngaahi kōvana, mo kinautolu na‘e fakafofonga ki he tu‘i, na‘a nau poupou ki he kau Siu; he kuo tō kiate kinautolu ‘a e ngeia ‘o Motekiai. 4He na‘e fotu ‘a Motekiai ‘i he fale ‘o e tu‘i, pea na‘e pavake hono ongoongo ki he ngaahi vahefonua kotoa: seuke ko e matāpule ko Motekiai na‘e fakautuutu hono mā‘olunga.
5Pea na‘e taa‘i ‘e he kau Siu honau ngaahi fili ‘aki ‘a e heletā, pea nau tāmate‘i ‘o faka‘osi; ‘io, na‘a nau fa‘iteliha kiate kinautolu na‘e fehi‘a mai.
6Pea ‘i Sūsani Lotokolo na‘e tāmate‘i mo faka‘osi ‘e he kau Siu ‘a e toko nimangeau tangata. 7Pea nau tāmate‘i ‘a e foha ‘e toko hongofulu ‘o Hāmani foha ‘o Hametata ko e fili ‘o e kakai Siu, 8‘a Pasatata, mo Talifoni, mo ‘Asipata, 9mo Pōlata, mo ‘Ātalia, mo ‘Alitata, mo Pa‘amoseta, mo ‘Alisai, 10mo ‘Ālita, mo Vaisata: ka na‘e ‘ikai te nau ala ki he vete.
11‘I he ‘aho ko ia na‘e ‘omi ki he tu‘i ‘a e lau ‘o e kakai kuo tāmate‘i ‘i Sūsani Lotokolo. 12Pea folofola ‘a e tu‘i kia Kuini ‘Ēseta, Kuo tāmate‘i mo faka‘osi ‘e he kau Siu ‘i Sūsani Lotokolo ha toko nimangeau tangata, pea mo e foha ‘e hongofulu ‘o Hāmani; huanoa ‘a e me‘a kuo nau fai ‘i hono toe ‘o e ngaahi vahefonua ‘o e tu‘i! Pea ko e hā eni ho‘o kole? Pea ‘e ‘atu; mo e hā ha toe me‘a ‘oku ke fiema‘u? Kae fai.
13Pea tali ‘e ‘Ēseta, Ka lelei ki he ‘afiona, pea ke fakangofua ki he kau Siu ‘oku ‘i Sūsani ke fai ‘apongipongi foki ‘o hangē ko e tu‘utu‘uni ‘o e ‘aho ni; pea tuku ke fakatūfana‘i ‘a e foha ‘e hongofulu ‘o Hāmani. 14Pea folofola ‘a e tu‘i ke fai pehē: pea na‘e ‘atu ha tu‘utu‘uni pehē ‘i Sūsani; pea ko e foha ‘e hongofulu ‘o Hāmani na‘a nau fakatūfana‘i. 15Pea fakatahataha ‘a e kau Siu na‘e ‘i Sūsani ‘i hono ‘aho hongofulu mā fā foki ‘o e māhina ko ‘Ātali, pea nau tāmate‘i ‘i Sūsani ha toko tolungeau tangata: ka ko e vete na‘e ‘ikai te nau ala ki ai.
16Pea ko e me‘a ki hono toe ‘o e kau Siu na‘e ‘i he ngaahi vahefonua ‘o e tu‘i, na‘a nau fakatahataha, ‘o taukapo‘i kinautolu, pea nau ma‘u nonga mei honau ngaahi fili, he na‘a nau tāmate‘i ‘i he kakai na‘e fehi‘a kiate kinautolu ha toko fitu mano mā nima afe: ka ko e vete na‘e ‘ikai te nau ala ki ai. 17Ko hono ‘aho hongofulu mā tolu ia ‘o e māhina ko ‘Ātali; pea ‘i hono ‘aho hongofulu mā fā na‘a nau mālōlō, ‘o nau ngaohia ia ko e ‘aho ke fai kātoanga mo fakafiefia. 18Ka ko e kau Siu na‘e ‘i Sūsani na‘a nau fakatahataha ‘i hono ‘aho hongofulu mā tolu, mo hono hongofulu mā fā; pea nau toki mālōlō ‘i hono ‘aho hongofulu mā nima, ‘o nau ngaohi ia ko e ‘aho fai kātoanga mo fakafiefia. 19Ko ia ko e kau Siu ‘o e tukui feitu‘u ‘oku nofo ‘i he ngaahi kolo ta‘e‘aa‘i, ‘oku nau tauhi ‘a e ‘aho hongofulu mā fā ‘o ‘Ātali ko e ‘aho ke fakafiefia mo fai kātoanga; ‘io, ko e ‘aho lelei ke fetufa‘inasi‘aki.
20Pea tohi ‘e Motekiai ‘a e ngaahi me‘a ko ia, ‘o ne ‘ave tohi ki he kau Siu kotoa na‘e ‘i he tukui vahefonua ‘o Kingi ‘Ehasivelo, ‘a e ofi mo e mama‘o,
21ke fakapapau ke nau tauhi ‘a e ‘aho hongofulu mā fā ‘o e māhina ko ‘Ātali mo hono hongofulu mā nima ‘i he ta‘u kotoa pē; 22he ko e ongo ‘aho ia na‘e ma‘u nonga ai ‘e he kau Siu mei honau ngaahi fili, pea ko e māhina ia na‘e liliu ma‘anautolu mei he mamahi ki he fiefia, pea mei he ‘aho tangi ki he ‘aho lelei: pea ke nau ngaohi kinaua ko e ongo ‘aho fai kātoanga mo fakafiefia, ko e taimi ke fetufa‘inasi‘aki, pea ke ‘ange me‘a ki he masiva. 23Pea fakapapau ‘e he kau Siu ke fai ‘o hangē ko ia kuo nau kamata fai, pea hangē ko ia kuo tohi mai ki ai ‘e Motekiai:
24koe‘uhi ko Hāmani foha ‘o Hametata, ko e motu‘a ‘Ēkaki, ko e fili ‘o e kau Siu kotoa, kuo ne puleaki‘i ‘a e kakai Siu honau faka‘osi, pea kuo ne fai puli (‘a ia ko e talotalo) ke faka‘osi mo faka‘auha kinautolu; 25ka ‘i he ‘omi ‘a e me‘a ki he ‘ao ‘o e tu‘i, na‘a ne folofola mo fai tohi ke foki ki hono tumu‘aki ‘o‘ona ‘a e fakakaukau kovi kuo ne puleaki‘i ke fai ki he kakai Siu, pea ke fakatūfana‘i ‘a ia mo hono ngaahi foha. 26(‘A ē ā na‘a nau ui ai ‘a e ongo ‘aho ko ia ko Pūlimi, ko e hingoa ki he lea puli.) ‘Io, ko e me‘a ‘i he ngaahi lea ‘o e tohi ko ia, mo e me‘a kuo nau sio ki ai kuo pehē fau, mo e me‘a kuo nau ta‘imālie ai, 27ko ia na‘e fakapapau mo hilifaki mai ‘e he kakai Siu kiate kinautolu, mo honau hako, mo kinautolu kotoa ‘e fakakau mai, ke ‘oua ‘e momo‘i tuku, ka nau tauhi ‘a e ongo ‘aho ko ia hangē ko e me‘a kuo tohi, pea hangē ko ia kuo kotofa ‘i he ta‘u kotoa pē; 28pea ke manatua mo tauhi ‘a e ongo ‘aho ko ia ‘i he to‘utangata kotoa pē, ‘i he fāmili kotoa pē, ‘i he vahefonua kotoa pē, pea ‘i he kolo kotoa pē; pea ko e ongo ‘aho Pūlimi ko ia ‘e ‘ikai mahu‘i mei he lotolotonga ‘o e kakai Siu, pea ‘e ‘ikai mole ‘a e manatu ki ai mei honau hako.
29Pea ko Kuini ‘Ēseta ko e ‘ōfefine ‘o ‘Apihaili, mo Motekiai Siu na‘a na fai tohi aoniu ke fakapapau ‘a e Tohi Pūlimi ko eni ko hono ua. 30‘Io, na‘e ‘ave tohi ‘e Motekiai ki he kau Siu kotoa, ki he vahefonua ‘e teau mā uofulu mā fitu ‘o e pule‘anga ‘o ‘Ehasivelo, ‘o tu‘u ai ‘a e ngaahi melino mo mo‘oni, 31ke fakapapau ‘a e ongo ‘aho Pūlimi ko ia, ke fai ‘i he taimi kuo kotofa, ‘o hangē ko e tu‘utu‘uni kuo hilifaki kiate kinautolu ‘e Motekiai Siu, mo ‘Ēseta ko e kuini, pea hangē ko e me‘a kuo nau hilifaki mai kiate kinautolu mo honau hako, ko e me‘a ‘oku kau ki he ngaahi ‘aukai, mo ‘enau tautapa. 32Pea ko e lea ‘a ‘Ēseta na‘e fakapapau ai ‘a e ngaahi me‘a ko ia ‘o Pūlimi; pea na‘e tohi ‘i he tohi.
Currently Selected:
KO ‘ĒSETA 9: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
