KO ‘ĒSETA 8
8
Ko e Fekau ki he Kakai Siú ke nau Fetongi‘i Atu ‘a e Faikovi ‘a Hāmaní
1‘I HE ‘aho ko ia na‘e foaki ‘e Kingi ‘Ehasivelo kia Kuini ‘Ēseta ‘a e fale ‘o Hāmani ko e fili ‘o e kau Siu. Pea na‘e taka ‘a Motekiai ‘i he ‘ao ‘o e tu‘i; he kuo fakahā ‘e ‘Ēseta hono kaunga kiate ia. 2Pea hu‘i ‘e he tu‘i ‘ene mama, ‘a ia kuo ne to‘o meia Hāmani, ‘o ne ‘ange kia Motekiai. Pea fokotu‘u ‘e ‘Ēseta ‘a Motekiai ke pule ki he fale ‘o Hāmani.
3Pea toe lea ‘a ‘Ēseta ‘i he ‘ao ‘o e tu‘i, ‘o ne hinga atu ki he to‘ukupu ‘o e ‘afio, ‘o ne tangi mo fakakolekole ke fakalaka ‘a e kovi ‘a Hāmani ko e ha‘a ‘Ēkaki,#8.3 ‘Ēkaki; Vakai ki he 3.1. mo e puleaki‘i kuo ne fakakaukau ke fai ki he kakai Siu. 4Pea mafao atu ‘e he tu‘i kia ‘Ēseta ‘a e sēpita koula. Pea mālanga hake ‘a ‘Ēseta, 5‘o tu‘u ‘i he ‘ao ‘o e tu‘i. Pea ne fakatau folofola hake, Ka lelei ki he ‘afiona, pea ka kuo u ta‘imālie ‘ofa ‘i he ‘afiona, pea ka kuo hā ki he tu‘i ko e me‘a ‘oku totonu ke fai, pea ka ‘oku ke lelei‘ia ‘iate au, pea tuku ke fai tohi ke liliu ‘a e ngaahi tohi na‘e fai ‘e Hāmani foha ‘o Hametata, ko e motu‘a ‘Ēkaki, ‘a ia na‘a ne tohi ke faka‘auha ‘a e kau Siu ‘oku ‘i he ngaahi vahefonua ‘o e tu‘i:
6he te u kātaki fēfē ke sio ki he kovi ‘e hoko ki hoku kakai? ‘o u kātaki fēfē ke sio ki he faka‘auha ‘o hoku kāinga?
7Pea folofola ‘a Kingi ‘Ehasivelo kia Kuini ‘Ēseta mo Motekiai Siu; Vakai, ko e fale ‘o Hāmani kuo u foaki kia ‘Ēseta, pea kuo nau fakatūfana‘i ‘a e tangata ‘i he ‘akau, koe‘uhi na‘a ne ala ki he kau Siu. 8Pe‘i mo tohi kimoua telia ‘a e kau Siu ha me‘a pē ‘oku hā lelei kiate kimoua, ‘i he hingoa ‘o e tu‘i, pea sila ‘aki ‘a e mama ‘a e tu‘i: he ko e tohi ‘oku fai ‘i he huafa ‘o e tu‘i, pea ‘oku sila ‘aki ‘a e sila ‘a e tu‘i, ‘oku tapu ke liliu.
9Ko ia na‘e ui mai ‘a e kau sikalaipe ‘a e tu‘i ‘i he taimi ko ia, ‘i hono māhina tolu, ‘a ia ko Sīvani, ‘i hono ‘aho uofulu mā tolu; pea na‘e fai tohi, ‘a ia kotoa pē na‘e tu‘utu‘uni ‘e Motekiai ki he kau Siu, pea ki he ngaahi tu‘i fakale‘o, pea ki he ngaahi kōvana, mo e hou‘eiki ‘o e ngaahi vahefonua, ‘a ia ‘oku fai mei ‘Initia ki ‘Itiopea,#8.9 ‘Itiopea; Vakai ki he “Ngaahi Huluhulu”. ko e vahefonua ‘e teau mā uofulu mā fitu, ‘o takitaha ‘a e vahefonua hono tohinima, pea takitaha ‘a e kakai hono lea, pea na‘e fai ki he kakai Siu ‘i he‘enau tohinima mo ‘enau lea. 10Pea ne tohi ‘i he huafa ‘o Kingi ‘Ehasivelo, ‘o ne sila‘i ‘aki ‘a e mama ‘a e tu‘i, pea ne tuku atu ‘a e ngaahi tohi ki he nima ‘o e kau ‘ave tohi na‘e heka hoosi, ko e fa‘ahinga ve‘evave na‘e ngāue‘aki ‘i he fai ‘a e ngaahi fekau ‘a e tu‘i, ko e fanga hoosi ‘eiki.#8.10 ‘Oku fihi ‘a e lea ni‘ihi. Ko e hiki ‘e taha: ko e kāmeli kimokimo.
11Pea ko e fakangofua ia ‘e he tu‘i ki he kau Siu na‘e ‘i he kolo kehekehe ke fakatahataha, pea ke taukapo‘i kinautolu, ke faka‘auha, ke tāmate‘i, pea ke faka‘osi ‘a e tau kotoa ‘o e kakai pe vahefonua te nau ‘ohofia kinautolu, ‘a ‘enau tamaiki mo e kau fefine, pea ke vete kinautolu foki:
12ko e fakangofua ko ia ki ha ‘aho pē taha ‘i he ngaahi vahefonua ‘o Kingi ‘Ehasivelo, ‘a hono ‘aho hongofulu mā tolu ‘i he māhina ko hono hongofulu mā ua, ‘a ia ko ‘Ātali. 13Ko e hiki ‘o e tohi, ‘a ia na‘e fai koe‘uhi ke ‘ange ha tu‘utu‘uni ki he vahefonua takitaha, na‘e ‘atu ava pē ki he kakai koe‘uhi ke toka teuteu ‘a e kau Siu ki he ‘aho ko ia, ke taukapo‘i kinautolu ‘i honau ngaahi fili.
14Ko ia na‘e hū ki tu‘a ‘a e kau ‘ave tohi, ‘oku nau heka ki he fanga hoosi ve‘e vave na‘e ngāue‘aki ‘i he ngaahi fekau ‘a e tu‘i, ‘oku nau fai fakato‘oto‘o mo fakavave ‘i he fekau ‘a e tu‘i; pea na‘e tufa ‘a e tu‘utu‘uni ‘i Sūsani Lotokolo.
15Pea ko Motekiai na‘a ne hū ki tu‘a mei he ‘ao ‘o e tu‘i kuo ‘ai hono kofu fakatu‘i, ko e lanu langi, mo e hinehina, mo e fu‘u kalauni koula, mo e pulupulu hinaekiaki mo kula-po‘upo‘uli: pea na‘e mavava ‘a e kolo ko Sūsani, ‘o nau fu‘u fiefia. 16Pea na‘e hoko ki he kakai Siu ‘a e maama, mo e fiefia, mo e nēkeneka, mo e ‘a‘apa‘ia. 17Pea ‘ilonga ha vahefonua, pea ‘ilonga ha kolo, ha potu pē na‘e a‘u ki ai ‘a e folofola ‘a e tu‘i, mo ‘ene tu‘utu‘uni, na‘e hoko ai ki he kakai Siu ‘a e fiefia mo e nēkeneka, ha kātoanga mo ha ‘aho lelei. Pea ko e tokolahi ‘o e ngaahi kakai ‘o e fonua na‘a nau tafoki ‘o Siu, he kuo tō kiate kinautolu ‘a e ngeia ‘o e kakai Siu.
Currently Selected:
KO ‘ĒSETA 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
