KOHELETI 1
1
Ko e Nofo ko ení Ko e Kulanoa
1KO E ngaahi lea ‘a Koheleti foha ‘o Tēvita na‘e tu‘i ‘i Selusalema.
2Muna ‘o e muna–ko e lea ia ‘a Koheleti–muna ‘o e muna! ko e muna ‘a e me‘a kotoa. 3Ko e hā ‘a e fua ‘oku toe ki he tangata mei he ngāue kehekehe ‘oku ne ongosia ai ‘i he lalo la‘ā? 4Mole ha to‘utangata, pea ha‘u ha to‘utangata; pea ko māmani ‘oku tu‘u atu ai pē. 5Pea ‘oku hopo ‘a e la‘ā, pea ‘oku tō ‘a e la‘ā, pea ‘oku ne fakavave ki hono feitu‘u ke toe hopo mai. 6‘Alu ‘a e matangi ki he tonga, pea foki ki he tokelau; –fakatakamilo– fakatakamilo–toki foki ‘a e matangi ki hono ngaahi foki‘anga. 7Ko e ngaahi vaitafe kotoa ‘oku nau toka ki tahi, ka ‘oku ‘ikai ke fonu ai ‘a e tahi; ko e potu ‘oku tafe ai ‘a e ngaahi vaitafe ‘oku nau foki ke tafe ai. 8‘Oku fakafitefita‘a ai pē ‘a e me‘a kotoa pē; ‘oku ‘ikai lava ‘e ha tangata hono fakamatala: ‘oku ‘ikai fiu ‘a e mata ‘i he sio, pea ‘oku ‘ikai mākona ‘a e telinga ‘i he fanongo. 9Ko e me‘a na‘e ‘i ai, ko ia ia ‘e ‘i ai; pea ko e me‘a na‘e fai, ko ia ia ‘e fai. Pea ‘oku ‘ikai ha me‘a fo‘ou ‘i he lalo la‘ā. 10‘Oku ai ha me‘a koā, ‘a ia ‘e lava ai ha taha ke pehē, Vakai, ko e me‘a fo‘ou ē? Kuo loa kālivu ia ‘i he ngaahi taimi ki mu‘a atu. 11‘Oku ‘ikai ha manatu ki he ngaahi to‘utangata mu‘a; pea pehē foki ki he ngaahi to‘utangata ‘e hoko ‘amui, ‘e ‘ikai ha manatu kiate kinautolu ‘i he ngaahi to‘utangata ‘e hoko ‘amui ‘iate kinautolu.
Ko e ngaahi A‘usia ‘a e Tangata Filōsefa
12Ko au Koheleti ne u tu‘i ki ‘Isileli ‘i Selusalema. 13Pea na‘a ku tuku hoku loto ke ‘eke mo ha‘ao ‘aki ‘a e poto ki he me‘a kotoa ‘oku fai ‘i he lalo langi: ko e fakaongosia kovi ia kuo tuku ‘e he ‘Otua ki he hako ‘o e tangata ke nau mo‘ua ai.
14Ne u sio ki he ngāue kehekehe ‘oku fai ‘i he lalo la‘ā; Pea tā ko e koto muna ia, mo e kai matangi. 15Ko e me‘a ‘oku piko ‘oku ‘ikai lava hano fakatotonu; pea ko e me‘a ‘oku masiva ‘oku ‘ikai lava hano fakaai.
16Ne u alea, ‘a au mo hoku loto, ‘o pehē, Vakai, ko e taha au na‘e ma‘u poto lahi, ‘o fakautuutu ai pē, ‘o hulu ‘iate kinautolu kotoa na‘e tomu‘a ‘iate au ‘i he pule ki Selusalema; ‘io, na‘e sio hoku loto ki ha fu‘ufu‘unga poto mo e ‘ilo.#1 Tu‘i 4.29-31 17Pea u tuku hoku loto ke ‘ilo poto, pea ke ‘ilo ‘a e vale ‘u‘ua mo e fakasesele: pea u ‘ilo na‘a mo ia ko e kai matangi pē. 18He ‘oku ō mo e poto lahi ‘a e mafasia lahi; pea ko ia ‘oku fakalahi ‘ene ‘ilo ‘oku ne fakalahi ‘ene mamahi.
Currently Selected:
KOHELETI 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
