KO TEUTALŌNOME 18
18
Ko e ‘inasi ‘o e Kau Taula‘eikí
1‘E ‘ikai ma‘u ‘e he kau Līvai taula‘eiki, ‘io, ‘a e matakali Līvai kotoa, ha ‘inasi pe tofi‘a fakataha mo ha‘a ‘Isileli: te nau kai ‘a e ngaahi feilaulau tutu ‘a Sihova mo hono ‘inasi. 2Ka ‘e ‘ikai hano tofi‘a ‘i he lotolotonga ‘o hono kāinga; ko Sihova pē hono tofi‘a, ‘o hangē ko ‘ene folofola ki ai.#Nōm 18.20
3Pea ko eni ‘a e ‘inasi fakakonisitūtone ‘o e taula‘eiki mei he kakai, meiate kinautolu ‘oku fai feilaulau, pe ko e pulu, pe ko e sipi, te nau ‘ange ki he taula‘eiki ha alanga mu‘a, mo e ongo kou‘ahe, mo e kete. 4Ko e polopolo ‘o ho‘o uite, ‘o ho‘o uaine, pea mo ho‘o lolo, mo e polopolo ‘o ho‘o fulufulu‘i sipi te ke ‘ange kiate ia. 5He kuo fili ia mei ho ngaahi matakali ‘e Sihova ko ho ‘Otua, ke tu‘u ke fai ngāue ‘i he huafa ‘o Sihova, ‘a ia mo hono hako ‘o lauikuonga.
6Pea ka ha‘u ho Līvai mei he kolo ‘oku ne ‘āunofo ai, ha taha pē ‘o ho ngaahi kolo ‘Isileli kātoa, ‘o ne ha‘u mo e feinga kotoa ‘o hono loto ki he potu ‘e fili ‘e Sihova ki ai; 7pea te ne fai ngāue ‘i he huafa ‘o Sihova ko hono ‘Otua, ‘o hangē ko e fai ‘a hono kāinga Līvai kotoa ‘oku fakafe‘ao ai kia Sihova. 8Te nau ‘inasi tatau pē ‘enau kai, tukukehe ‘a e pa‘anga mei he fakatau ‘o ‘ene me‘a ‘i hono ‘api tukufakaholo.#18.8 tukukehe… ‘api tukufakaholo; ‘Oku ‘ikai ke mahino ‘a hono faka-Hepeluú. ‘Oku ngali tonu hono hiki ‘o: pea te ne ma‘u ai pē ha me‘a ‘e ‘ave ki ai ‘e hono fāmilí.
Ko e Fakatokanga he ngaahi ‘Ulungāanga ‘o e Kakai Kei Fakapo‘ulí
9‘Oka ke ka a‘u ki he fonua ‘oku foaki kiate koe ‘e Sihova ko ho ‘Otua, ‘e ‘ikai te ke ako ke fai hangē ko e ngaahi me‘a fakalielia ‘a e ngaahi kakai ko ena. 10‘E ‘ikai ‘ilo ‘iate koe ha taha ‘oku tuku hono foha pe ‘ōfefine ke ‘asi ‘i he afi, ha taha ‘oku fai me‘a tongafisi, ha taha ‘oku fai ‘a e talotalo kovi, pe ha fai tuki, pe fiemana,#Lev 19.26; ‘Eki 22.18 11pe ha fai sausau, pe ha fakahā‘ele fa‘ahikehe, pe ha maki, pe ha fakahā‘ele mate.#Lev 19.31 12He ko e me‘a fakalielia kia Sihova ‘a ia fua pē ‘oku fai me‘a pehē: pea ko e me‘a ‘i he ngaahi fakalielia pehē, ko ia ‘oku kapusi ai kinautolu mei ho ‘ao ‘e Sihova ko ho ‘Otua. 13‘E haohaoa ho‘o fakafeangai kia Sihova ko ho ‘Otua.#Māt 5.48
Ko e Tala‘ofa ‘e ‘Omi ha Palōfita
14He koe ngaahi kakai na, ‘a ia te ke ma‘u kinautolu, ‘oku nau fakaongo kiate kinautolu ‘oku fai ‘a e talotalo kovi mo e maki: ka ko koe na‘e ‘ikai tuku ke ke fai pehē ‘e Sihova ko ho ‘Otua. 15‘E fokotu‘u ‘e Sihova ko ho ‘Otua mei ho lotolotonga, mei ho kāinga, hao palōfita hangē ko au; ko ia pē te mou fanongo ki ai;#18.15 hao palōfita… ki ai; pe hao kau palōfita… kiate kinautolu. #Ngā 3.22; 7.37 16‘o hangē ko ia kotoa na‘a ke kole meia Sihova ko ho ‘Otua ‘i Hōlepi ‘i he ‘aho ‘o e fakataha, ho‘o pehē, ‘Oua ā na‘a ku toe fanongo ki he le‘o ‘o Sihova ko hoku ‘Otua, pea ‘oua ā na‘a ku toe sio ki he afi lahi ni, na‘a ku mate. 17Pea na‘e folofola ‘a Sihova kiate au, ‘Oku lelei ‘a e lea kuo nau fai. 18Te u fokotu‘u ma‘anautolu ha palōfita mei he lotolotonga ‘o honau kāinga hangē ko koe, pea te u ‘ai ‘eku lea ki hono ngutu, pea te ne#18.18 ha palōfita… ki hono ngutú… pea te ne; pe ha kau palōfitá… ki honau ngutú… pea te nau. lea‘aki kiate kinautolu ‘a e me‘a kotoa te u fekau kiate ia. 19Pea ka ‘iloange ‘e ai ha taha ‘e ‘ikai fie fakaongo ki he‘eku ngaahi lea, ‘a ia te ne lea‘aki ‘i hoku hingoa, te u#18.19 te ne…. te u; pe Ka ne ka lea ‘i hoku hingoá, te u. ‘eke ia kiate ia ‘e au.#Ngā 3.23 20Ka ko e palōfita te ne ‘afungi ke fai ha lea ‘i hoku hingoa; ‘osi, kuo ‘ikai te u fekau ke ne lea‘aki, pe te ne lea ‘i he hingoa ‘o ha ngaahi ‘otua kehe, pea ‘e mate ‘a e palōfita ko ia.
21Pea kapau te ke pehē ‘i ho loto, Te tau ‘ilo fēfē ‘a e lea kuo ‘ikai folofola‘aki ‘e Sihova? 22Ka lea ‘e ha palōfita ‘i he huafa ‘o Sihova, pea ‘oku ‘ikai fakaai ‘a e me‘a, pea ‘oku ‘ikai hoko, ko e me‘a ia ne ‘ikai folofola‘aki ‘e Sihova: ko e ‘afungi ‘a e palōfita ‘ene lea ko ia, ‘oua te ke ilifia kiate ia.
Currently Selected:
KO TEUTALŌNOME 18: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
