KO TEUTALŌNOME 1
1
Ko e Talateu
1KO E ngaahi lea ia na‘e fai ‘e Mōsese ki he kau ‘Isileli ‘i he kauvai ko ē ‘o Soatani, ‘i he Toafa, ‘i he ‘Alapā, ‘i he hāngai ki Sufa, ‘i he vaha‘a ‘o Pēlana, mo Tōfeli, mo Lāpani, mo Heseloti, mo Tisahipi. 2(Ko e mama‘o ‘o Hōlepi mo Kētesi-panea, ‘i he hala ‘o Mo‘unga Seia, ko e vā‘ihala ‘o e ‘aho ‘e hongofulu mā taha.) 3Pea ‘i hono fāngofulu ‘o e ta‘u, ‘i hono hongofulu mā taha ‘o e māhina, mo e ‘uluaki ‘aho ‘o e māhina, na‘e lea ‘a Mōsese ki ha‘a ‘Isileli ‘i he ngaahi tu‘utu‘uni kuo ‘ange ‘e Sihova kiate ia ma‘anautolu. 4Ko e hili ia ‘ene taa‘i#1.4 ‘ene taa‘i; pe ‘a e taa‘i ‘e Mōsese. ‘a Sīhoni ko e Tu‘i ‘Āmoli, ‘a ia na‘e nofo ‘i Hesiponi, pea hili ‘ene taa‘i ‘i ‘Etilei ‘a ‘Oki ko e Tu‘i Pēsani, ‘a ia na‘e nofo ‘i ‘Asiteloti.#Nōm 21.21-35 5Na‘e ‘i he kauvai ko ē ‘o Soatani, ‘i he fonua ‘o Moape, na‘e kamata ai ‘e Mōsese ke fakamatala ‘a e lao ni, he‘ene pehē.
6Na‘e folofola mai ‘a Sihova ko hotau ‘Otua ‘i Hōlepi, ‘o pehē, Kuo fuoloa ho‘omou nofo ‘i he mo‘unga ni: 7mou hanga ‘o fononga atu, ‘o ‘alu ki he mo‘unga ‘o ha‘a ‘Āmoli mo e ngaahi potu ofi ki ai, ‘i he ‘Alapā, mo e fonua mo‘unga, mo e Sēfela‘a, mo e feitu‘u ko Tonga, mo e hāngai ki tahi ko e fonua ‘o ha‘a Kēnani, mo Lepanoni ‘o a‘u ki he vaitafe lahi ko ‘Eufaletesi. 8Vakai, kuo u tuku ‘a e fonua ‘i homou ‘ao: hū atu ‘o ma‘u ‘a e fonua na‘e fuakava ai ‘a e ‘Eiki ki homou tupu‘anga, kia ‘Epalahame, kia ‘Aisake, pea kia Sēkope, tokua te ne ‘atu kiate kinautolu mo honau hako ‘amui.
Ko e Fakanofo ‘e Mōsese ha Kau Fakamaau
(‘Eki 18.13-27)
9Pea u lea kiate kimoutolu ‘i he taimi ko ia, ‘o u pehē, ‘Oku ‘ikai te u lava ke fua kimoutolu toko taha: 10kuo fakatokolahi kimoutolu ‘e homou ‘Otua ko Sihova, pea vakai, ko e ‘aho ni ‘oku mou hangē ko e fetu‘u ‘o e langi homou tokolahi. 11(Tauange mo Sihova, ko e ‘Otua ‘o ho‘omou ngaahi kui, ke ne fakatokolahi kimoutolu ‘o tātu‘oafe, pea ke ne tāpuekina kimoutolu ‘o hangē ko ‘ene tala‘ofa kiate kimoutolu!) 12Te u fa‘ahi fēfē ‘e au toko taha ‘a e ongosia ‘o homou tauhi, mo hono kavenga, mo ho‘omou fakafiu? 13Mou fili mai ha kau tangata poto mo loto matala, ko e kakai ‘ilonga mei homau ngaahi matakali kehekehe, pea te u fakanofo kinautolu ke pule kiate kimoutolu. 14Pea na‘a mou tali mai, ‘o mou pehē, ‘Oku lelei ‘etau fai ‘a e me‘a kuo ke fakahā. 15Pea u to‘o ‘a e kau pule ‘i homou ngaahi matakali, ko e tu‘unga me‘a poto mo ‘ilonga, pea u fakanofo kinautolu ko e kau pule kiate kimoutolu, mo‘o kapiteni ‘o e ngaahi toko afe, pea mo‘o kapiteni ‘o e ngaahi toko teau, pea mo‘o kapiteni ‘o e ngaahi toko nimangofulu, pea mo‘o kapiteni ‘o e ngaahi toko hongofulu, pea mo‘o kau ‘ōfisa ‘i homou ngaahi matakali.
16Pea u kouna homou kau fakamaau ‘i he taimi ko ia, ‘o pehē, Fanongo ki he ngaahi me‘a ‘oku ‘omi ‘e homou kāinga, pea mou fakamaau totonu ‘i he vaha‘a ‘o e tangata mo e tangata, pea mo e vaha‘a ‘o e tangata mo ‘ene muli. 17‘E ‘ikai te mou hūmataniu ‘i he fai ‘o e fakamaau; te mou tali tatau ‘a e si‘i mo e lahi; ‘e ‘ikai te mou toka‘i ha fōtunga ‘o ha tangata, he ko e fakamaau ko e me‘a ‘a e ‘Otua ia: pea ko e me‘a ‘oku faingata‘a fau kiate kimoutolu te mou ‘omi kiate au, ka u tali ia ‘e au. 18Pea na‘a ku tu‘utu‘uni kiate kimoutolu ‘i he taimi ko ia ‘a e ngaahi me‘a te mou fai.
Ko Hono Fekau ha Kau Asiasi ke ‘Alu Atu mei Kātesi-panea
(Nōm 13.1-33)
19Pea na‘a tau hiki mei Hōlepi, pea tau ‘alu‘ia hono kotoa ‘o e fu‘u toafa faka‘ulia ko ē na‘a mau māta‘i, ‘a e hala ki he mo‘unga ‘o ha‘a ‘Āmoli, ‘o hangē ko e tu‘utu‘uni mai ‘e Sihova ko hotau ‘Otua; pea tau a‘u ki Kētesi-panea. 20Pea na‘a ku pehē kiate kimoutolu, Kuo mou a‘u ki he mo‘unga ‘o e kau ‘Āmoli, ‘a ia ‘oku tuku mai ‘e Sihova ko hotau ‘Otua. 21Vakai, ko Sihova ko ho ‘Otua kuo ne tuku ‘a e fonua ‘i ho ‘ao; ‘alu hake, ma‘u ia, hangē ko ho fekau ‘e Sihova ko e ‘Otua ‘o ho tupu‘anga; ‘oua ‘e manavahē, pea ‘oua ‘e lotosi‘i.
22Pea na‘a mou ‘unu‘unu kiate au, homou kotoa, pea mou pehē mai, Tau fekau atu mu‘a ha tu‘unga me‘a ke mu‘omu‘a atu, ‘o asiasi ‘a e fonua mo‘otautolu, ‘o foki mai mo hano tala pe ko e hala fē te tau ‘alu hake ai, mo e ngaahi kolo te tau a‘u ki ai.
23Pea na‘e hā lelei kiate au ‘a e lea ko ia: pea u to‘o mai hamou kau tangata ‘e toko hongofulu mā ua, ‘o takitaha ‘a e matakali. 24Pea nau hanga ‘o ‘alu hake ki he mo‘unga, pea nau a‘u ki he tele‘a ‘o ‘Esikoli, ‘o nau mataki‘i ia. 25Pea nau ala ki he fua ‘o e fonua, ‘o nau to‘o ha me‘a ‘o ‘ohifo kiate kitautolu, pea nau foki mo kinautolu hatau tala, ‘o nau pehē, ‘Ā, ko e fonua lelei ‘a ia ‘oku tuku mai ‘e Sihova ko hotau ‘Otua.
26Ka na‘e ‘ikai te mou loto ke ‘alu hake, ka mou paetaku‘i ‘a e folofola tonu ‘a Sihova ko homou ‘Otua.#Teu 9.23; Hep 3.16 27Pea na‘a mou mumuhu ‘i homou ngaahi tēniti, ‘o mou pehē, Na‘e ‘ita ‘a Sihova kiate kitautolu, ko ia na‘a ne fakahao ai kitautolu mei ‘Isipite, ka ne tuku kitautolu ki he nima ‘o ha‘a ‘Āmoli ke faka‘auha kitautolu. 28Ko ‘etau ‘alu hake ki fē? Kuo fakavaivai‘i hotau loto ‘e he kāinga ni, he‘enau pehē, Ko e kakai lahi hake mo lōloa ‘iate kitautolu; lalahi honau ngaahi kolo, pea tau hake honau ‘ā ki langi; kae‘uma‘ā foki na‘a mau mamata ai ki ha kakai ‘Ānaki.
29Pea u pehē kiate kimoutolu, ‘Oua te mou teki, pea ‘oua te mou toka ilifia kiate kinautolu. 30Ko Sihova ko homou ‘Otua ‘oku hā‘ele mu‘omu‘a kiate kimoutolu; ko ia ia te ne tau ma‘amoutolu, ‘o hangē ko ‘ene fu‘u fai ko ia ma‘amoutolu ‘i ‘Isipite–seuke, na‘a mou sio ai. 31‘I he Toafa foki, ‘a ia na‘a mou mamata ai ki he fua koe ‘e Sihova ko ho ‘Otua, hangē ko e fua ‘e he tangata ‘ene tamasi‘i, ‘i he hala kotoa na‘a mou ‘alu ai, kae‘oua ke mou a‘u ki he potu ko ‘eni.#Ngā 13.18 32Ka neongo e me‘a ko ia, ka hono mou tui kia Sihova ko homou ‘Otua.#Hep 3.19 33‘Osi, ‘oku ne hā‘ele mu‘omu‘a atu ‘i he hala ke kumi ha potu ke mou fokotu‘u tēniti ai, ‘i he Afi, po‘uli, ke huluhulu kimoutolu ‘i he hala ‘oku totonu ke mou ‘alu ai, pea ‘i he ‘Ao, ‘aho. Ko Hono Tautea ‘e Sihova ‘a e Kakai ‘Isilelí.
(Nōm 14.20-45)
34Pea ongo kia Sihova ‘a e mumuhu ‘a ho‘omou lea, pea ne houhau, ‘o ne fuakava ‘o pehē,#Hep 3.18 35Ko au ē, ha sio ‘e ha taha ‘o e kau tangata kovi ni ki he fonua lelei na‘a ku fuakava ke ‘atu ki ho‘omou ngaahi kui, 36ngata pē ‘ia Kēlepi, foha ‘o Sīfune; te ne mamata ki ai ‘e ia, pea te u ‘atu kiate ia ‘a e kelekele na‘a ne mala ai, pea ki hono hako: koe‘uhiā na‘a ne molomolomuiva‘e ‘i he ‘Eiki. 37Na‘e tuputāmaki foki ‘a e ‘Eiki kiate au, koe‘uhi ko kimoutolu, ‘o ne folofola mai, Ko koe foki ‘e ‘ikai te ke hū ki ai. 38Ko Siosiua, foha ‘o Nuni, ‘a ia ‘oku ne fakafe‘ao kiate koe, te ne hū ki ai ‘e ia: ke ke poupou ki ai, he ko ia ia te ne fakatofi‘a‘aki ‘a ‘Isileli.
39Ko ho‘omou tamaiki iiki foki, ‘a ia na‘a mou pehē ko e koto vetea, pea ko homou ngaahi foha, ‘a ia ‘oku ‘ikai te nau ‘ilo he ‘aho ni ‘a e lelei mo e kovi, ko kinautolu te nau hū ki ai, pea ko kinautolu te u ‘atu ia ki ai, pea ko kinautolu te nau ma‘u ia. 40Ka ko e me‘a kiate kimoutolu, mou tafoki, ‘o hiki ki he toafa ‘i he hala ‘o e Tahi Kulokula.
41Pea na‘a mou toki tali ai, ‘o mou pehē kiate au, Kuo mau hia kia Sihova, ko kimautolu eni te mau ‘alu hake ‘o tau, ‘o hangē ā ‘a e tu‘utu‘uni ‘a Sihova ko hotau ‘Otua. Pea na‘a mou takitaha tau ‘ene mahafu, ‘o mou vehi ke ‘alu hake ki he mo‘unga.
42Pea folofola ‘a Sihova kiate au, Lea kiate kinautolu, ‘Oua te mou ‘alu hake, pea ‘oua ‘e tau; he ‘oku ‘ikai te u ‘i homou lotolotonga: na‘a te‘ia kimoutolu ‘i he ‘ao ‘o homou ngaahi fili. 43Ko ia na‘a ku tala kiate kimoutolu, ka na‘e ‘ikai te mou tokanga, pea mou paetaku‘i ‘a e folofola tonu ‘a Sihova, ka mou fai pau‘u pē, ‘o ‘alu hake ki he mo‘unga. 44Kae ha‘u ki tua‘ā ‘a e kau ‘Āmoli ‘oku nofo ‘i he mo‘unga ko ia ke tali kimoutolu, pea nau tuli kimoutolu ‘o hangē ko e fai ‘a e fanga pī, ‘o te‘ia kimoutolu ‘i Seia, ‘o a‘u ki Hoama. 45Pea na‘a mou liliu, ‘o mou tangi ‘i he ‘ao ‘o Sihova; ka na‘e ‘ikai tokanga ‘a Sihova ki ho‘omou lea; pea na‘e ‘ikai te ne ongo‘i kimoutolu. Ko e Nofo Laui Ta‘u ‘a e Kakai ‘Isilelí he Toafá.
46Pea mou nofo pehē ‘i Kētesi ‘o ‘aho lahi, ‘io, hono kotoa ‘o e taimi na‘a mou nofo ai.
Currently Selected:
KO TEUTALŌNOME 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
