KO TĀNIELA 3
3
Ko Hono Fekau ‘e Nepukanesa ‘a e Kakai Kotoa pē ke nau Lotu ki ha ‘Īmisi Koula
1PEA na‘e ngaohi ‘e Kingi Nepukanesa ha ‘īmisi koula; ko hono mā‘olunga ko e kiupite ‘e onongofulu, ko hono māukupu ko e kiupite ‘e ono: na‘a ne fokotu‘u ia ‘i he potu tafangafanga ko Tula, ‘i he vahefonua ‘o Pāpilone. 2Pea fekau atu ‘e Kingi Nepukanesa ke fakataha mai ‘a e ngaahi tu‘i fakale‘o, ‘a e hou‘eiki mo e ngaahi kōvana, ‘a e ngaahi tu‘i fakamaau, ‘a e hou‘eiki tauhi pa‘anga, ‘a e kau tufunga lao, ‘a e kau ‘ōfisa ‘o e fakamaau, mo e hou‘eiki kotoa pē ‘i he ngaahi vahefonua; ke nau ha‘u ki he kātoanga‘i ‘o e ‘īmisi, ‘a ia kuo fokotu‘u ‘e Kingi Nepukanesa. 3Toki fakataha ‘a e ngaahi tu‘i fakale‘o, ‘a e hou‘eiki mo e ngaahi kōvana, ‘a e ngaahi tu‘i fakamaau, ‘a e hou‘eiki tauhi pa‘anga, ‘a e kau tufungalao, ‘a e kau ‘ōfisa ‘o e fakamaau, mo e hou‘eiki kotoa pē ‘i he ngaahi vahe fonua, ke kātoanga‘i ‘a e ‘īmisi kuo fokotu‘u ‘e Kingi Nepukanesa; pea nau tutu‘u ‘i he ‘ao ‘o e ‘īmisi kuo fokotu‘u ‘e Nepukanesa. 4Toki fanongonongo le‘o lahi ‘e ha matāpule, ‘o pehē, Ko e fekau kiate kimoutolu ‘a e ngaahi kakai, ‘a e ngaahi matakali, mo e ngaahi fa‘ahinga lea kehekehe. 5Ka mou ka fanongo ki he le‘o ‘o e talupite, ‘upo‘upa, ha‘ape, sapeka, helefilo, pākipaipa, mo e ngaahi fa‘ahinga me‘a hiva kehekehe, te mou fo‘ohifo ‘o lotu ki he ‘īmisi koula kuo fokotu‘u ‘e Kingi Nepukanesa. 6Pea ‘ilonga ‘a ia ‘e ‘ikai fo‘ohifo ‘o lotu ki ai, ‘e lī leva ia ki he loto fōnise afi kakaha. 7Ko ia, ‘i he fanongo leva ‘a e ngaahi kakai ki he le‘o ‘o e talupite, ‘upo‘upa, ha‘ape, sapeka, helefilo, mo e ngaahi fa‘ahinga me‘a hiva kehekehe, na‘e fo‘ohifo ‘a e ngaahi kakai, ‘a e ngaahi matakali, mo e ngaahi fa‘ahinga lea, ‘o nau lotu ki he ‘īmisi koula kuo fokotu‘u ‘e Kingi Nepukanesa.
Ko Hono Talatalaaki‘i ‘o e Kaungāme‘a ‘e Tokotolu ‘o Tānielá he Talangata‘a
8Ko hono ō ia na‘e ‘unu‘unu atu ai ‘i he taimi ko ia hani Kalitia, ‘o talakovi‘i ‘a e kau Siuta. 9Pea nau fakatau folofola kia Kingi Nepukanesa, ‘o nau pehē, Ke lākoifie ‘a e Tu‘i ‘o ta‘engata. 10Kuo fokotu‘u ‘e he ‘afiona ha tu‘utu‘uni, ‘o pehē, Ka fanongo ‘e he kakai ki he le‘o ‘o e talupite, ‘upo‘upa, ha‘ape, sapeka, helefilo, mo e pākipaipa, mo e ngaahi fa‘ahinga me‘a hiva kehekehe, ke nau fo‘ohifo kotoa pē ‘o lotu ki he ‘īmisi koula: 11pea ka ‘ilonga ‘a ia ‘e ‘ikai te ne fo‘ohifo mo hū, ‘e lī ia ki he ngoto‘umu kakaha. 12‘Oku ai ha tu‘unga me‘a Siuta, ‘a ia kuo ke fokotu‘u ki ha lakanga pule ‘i he vahefonua ‘o Pāpilone, ko Setaleki, Mēsake, mo ‘Apitenikō; pea ko e kau tangata ko ē ‘oku ‘ikai te nau toka‘i ‘a e ‘afiona; ‘oku ‘ikai te nau tauhi ho ngaahi ‘otua, pea ko e ‘īmisi koula kuo ke fokotu‘u ‘oku ‘ikai te nau lotu ki ai.
13Pea fekau ‘e Nepukanesa ‘i he‘ene houhau mo ‘ene tuputāmaki ke ‘omi ‘a Setaleki, Mēsake, mo ‘Apitenikō: pea na‘e ‘omi leva ‘a e tu‘unga me‘a ko ia ki he ‘ao ‘o e tu‘i. 14Folofola ai ‘a Nepukanesa kiate kinautolu, ‘o pehē, ‘E Setaleki, Mēsake, mo ‘Apitenikō, ko e fai ‘ilo pē ‘a e ‘ikai te mou tauhi hoku ngaahi ‘otua, mo e ‘ikai te mou lotu ki he ‘īmisi koula kuo u fokotu‘u? 15Pea ko eni, kapau ‘oku mou loto, ‘oka ‘iloange te mou fanongo ki he le‘o ‘o e talupite, ‘upo‘upa, ha‘ape, sapeka, helefilo, mo e pākipaipa, mo e ngaahi fa‘ahinga me‘a hiva kehekehe–kapau ‘oku mou loto ke fo‘ohifo ‘o lotu ki he ‘īmisi kuo u ngaohi–pea ka ‘ikai te mou lotu ki ai, ‘e lī leva kimoutolu ki he loto fōnise afi kakaha; pea ko hai ia ‘a e ‘otua te ne fakahaofi kimoutolu mei hoku nima?
16Tali ai ‘e Setaleki, Mēsake, mo ‘Apitenikō, ‘o nau fakatau folofola ki he tu‘i, ‘E Nepukanesa, ‘e ‘ikai te mau fiu‘a fa‘u ha‘amau tali kiate koe ‘i he fekau ni. 17Kapau ko hono anga ia, ko e ‘Otua ‘oku mau tauhi ki ai te ne lava ke fakahaofi kimautolu mei he fōnise afi kakaha, pea te ne fakahaofi mei he nima ‘o e ‘afiona.#3.17 Kapau… ‘afiona; pe Kapau ko e mo‘oni ‘oku mau ta‘efie lotu ko ho ‘otuá pe punou ki he ‘īmisi koula na‘á ke fokotu‘ú, pea ‘e lava ‘e he ‘Otuá ‘oku mau lotu ki aí ‘o fakahaofi kimautolu mei he fōnise afi–pea te ne fakahaofi kimautolu mei ai. 18Pea ka ‘ikai; ke mea‘i ‘e he ‘afiona, ‘e ‘ikai te mau momo‘i tauhi ho ngaahi ‘otua, pe lotu ki he ‘īmisi koula kuo ke fokotu‘u.
Ko Hono Hilifaki e Tautea Mate ‘i he Kaungāme‘a ‘e Tolu ‘o Tānielá
19Pea na‘e toki fonu ‘a Nepukanesa ‘i he ‘ita, pea na‘e liliu hono fofonga ke kovi kia Setaleki, Mēsake, mo ‘Apitenikō; pea ne folofola ke tafutafu ‘a e ngoto‘umu ke tātu‘ofitu hono kakaha ‘i hono fa‘a fai. 20Pea ko e tu‘unga me‘a kaukaua na‘e ‘i he‘ene tau, na‘a ne fekau ke kafai ‘a Setaleki, Mēsake, mo ‘Apitenikō, ke lī ki he fōnise afi kakaha. 21Pea na‘e toki ha‘i ‘a e kau tangata ko ē ‘aki honau sote, mo honau pulupulu, mo honau fa‘u, mo honau ngaahi kofu kehe, pea na‘e lī kinautolu ki he loto fōnise afi kakaha. 22Pea ko e me‘a ‘i he mālohi ‘a e fekau ‘a e tu‘i, mo e kehe ‘a e kakaha ‘o e afi, ko ia na‘e tāmate‘i ‘e he ulo ‘o e afi ‘a e kau tangata na‘a nau hiki ‘a Setaleki, Mēsake, mo ‘Apitenikō. 23Pea ko e toko tolu ko ia, ‘a Setaleki, Mēsake, mo ‘Apetenikō, na‘a nau tō ki he loto fōnise afi kakaha kuo ma‘u ha‘i.
24Toki ofo ‘a Kingi Nepukanesa, ‘o ne tu‘u fakavave, ‘o ne folofola ki he‘ene kau minisitā, ‘Ikai ko e toko tolu na‘a tau lī ki he loto afi kuo nau ma‘u ha‘i?
Pea nau tali ‘o pehē ki he tu‘i, ‘Ēī, ko ia pē.
25Pea toe folofola mai ‘e ia, Vakai, ‘oku ou mamata ‘e au ki he toko fā, ta‘eha‘i, ‘oku nau ha‘ele ‘i he loto afi, pea kuo ‘ikai ha kovi ‘e hoko kiate kinautolu; pea ko e fōtunga ‘o hono toko fā ‘oku hangē ko ha ‘alo ‘o ha ‘otua.#3.25 ha ‘alo… ‘otua; pe ‘āngelo.
Ko Hono Veteange mo Hākeaki‘i ‘o e Tokotolú
26Pea toki ‘unu‘unu atu ‘a Nepukanesa ki he matapā ‘o e fōnise afi kakaha, ‘o ne folofola, ‘o pehē, ‘E Setaleki, Mēsake, mo ‘Apitenikō, ‘a e kau tamaio‘eiki ‘a e ‘Otua Taupotu, mou hū mai, pea ha‘u ki heni. 27Pea na‘e toki hū mai ‘a Setaleki, Mēsake, mo ‘Apitenikō mei he loto afi. Pea ko e ngaahi tu‘i fakale‘o, ‘a e hou‘eiki mo e ngaahi kōvana, mo e kau minisitā ‘o e tu‘i, ‘a ia kuo fakataha mai, na‘a nau mamata ki he kau tangata ko ē, kuo ‘ikai momo‘i pule ‘a e afi ki honau sino, pea kuo ‘ikai mahunuhunu honau lou‘ulu, pea kuo ‘ikai liliu honau sote, pea kuo ‘ikai ke momo‘i namu ‘ohuafi.
28Pea folofola ai ‘a Nepukanesa, ‘o pehē, Ke mālō‘ia mu‘a ‘a e ‘Otua ‘o Setaleki, Mēsake, mo ‘Apitenikō, ‘a ia kuo ne fekau ‘ene ‘āngelo, ‘o fakahaofi ‘ene kau tamaio‘eiki na‘e falala kiate ia, pea na‘a nau liliu ‘a e tu‘utu‘uni ‘a e tu‘i, pea na‘a nau foaki honau sino ke ‘oua te nau tauhi pe lotu ki ha ‘otua kehe, ka ko ho‘onautolu ‘Otua pē.
29Ko ia ai, ‘oku ou fokotu‘u ha tu‘utu‘uni, Ke ‘ilonga ha kakai, pe matakali, pe fa‘ahinga lea, te nau tālalakulaku ki he ‘Otua ‘o Setaleki, Mēsake, mo ‘Apitenikō, ‘e tu‘utu‘u fakaikiiki kinautolu, pea ‘e ngaohi honau fale ko e tu‘unga ‘oto‘ota: koe‘uhi, ‘oku ‘ikai mo ha ‘otua ‘oku ne lava ke fakahaofi ‘o hangē ko eni.
30Pea na‘e toki hākeaki‘i ‘e he tu‘i ‘a Setaleki, Mēsake, mo ‘Apetenikō ‘i he vahefonua ‘o Pāpilone.
Currently Selected:
KO TĀNIELA 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
