KO TĀNIELA 2
2
Ko ha Misi ‘a Nepukanesa
1PEA ‘i hono ua ‘o e ta‘u ‘o e pule ‘a Nepukanesa, na‘e misi ‘a Nepukanesa; pea na‘e tākatu‘u hono laumālie, pea na‘e mole ‘ene fie mohe. 2Pea folofola ‘a e tu‘i ke ui ange ‘a e kau sikalaipe, mo e kau maki, mo e kau tuki, mo e kau Kalitia, ke fakamatala ki he tu‘i ‘ene ngaahi misi: ko ia, na‘a nau hū mai, ‘o nau tutu‘u ‘i he ‘ao ‘o e tu‘i.#Sēn 41.8 3Pea folofola ‘a e tu‘i kiate kinautolu, Kuo u misi, pea ‘oku hoha‘a hoku laumālie ke ‘ilo ‘a e misi.
4Pea fakatau folofola ‘a e kau Kalitia ki he tu‘i ‘i he lea faka-‘Ālamea,#2.4 lea faka-‘Ālamea: ‘Oku hiki faka-‘Alamea ‘a e tohí ni mei he vēsí ni ‘o a‘u ki he ngata‘anga ‘o e vahe 7, ‘o ‘ikai hiki faka-Hepelū. ‘o pehē, Ke lākoifie ma‘u ai pē ‘a e ‘afiona! ‘A‘au ‘a e misi ki ho‘o kau tamaio‘eiki ko kimautolu, pea te mau tala hono ‘uhinga.
5Pea tali ‘a e tu‘i ‘o ne folofola ki he kau Kalitia, Kuo pau meiate au ‘a e tu‘utu‘uni,#2.5 Kuo pau… tu‘utu‘uní; ‘Oku hiki ‘e he ni‘ihi: Kuo mole ‘a e me‘á meiate au. Kapau ‘e ‘ikai te mou fakahā kiate au ‘a e misi mo hono ‘uhinga, ‘e tu‘utu‘u fakaikiiki kimoutolu, pea ‘e ngaohi homou ngaahi fale ko e tu‘unga ‘oto‘ota. 6Ka ‘o kapau te mou fakahā ‘a e misi mo hono ‘uhinga, te mou ma‘u meiate au ha ngaahi me‘a‘ofa, mo e koloa, mo e ngaahi tu‘unga: ko ia mou fakahā mai ‘a e misi mo hono ‘uhinga.
7Pea nau tali hono tu‘o ua, ‘o fakatau folofola ‘o pehē, Ke ‘a‘au ‘e he ‘afiona ‘a e misi ki ho‘o kau tamaio‘eiki, pea te mau fakahā hono ‘uhinga.
8Pea tali ‘a e tu‘i ‘o ne folofola mai, ‘Oku ou ‘ilo pau ko ho‘omou fakatalanoa ‘oku fai, koe‘uhi ‘oku mou vakai kuo pau ‘a e tu‘utu‘uni meiate au. 9Ko eni, kapau ‘e ‘ikai te mou fakahā ‘a e misi, ‘oku taha pē ‘a e tu‘utu‘uni kiate kimoutolu; he kuo mou fa‘ufa‘ufono, ‘o teu ‘a e ngaahi lea loi mo kākā ke fai kiate au, kae‘oua ke liliu ‘a e taimi: ko ia mou tala mai ‘a e misi, pea te u ‘ilo ai te mou lava hono faka‘uhinga.
10Pea tali hake hani Kalitia ‘i he ‘ao ‘o e tu‘i, ‘o nau pehē, ‘Oku ‘ikai ha tangata ‘i he funga ‘o māmani te ne lava ke tala ‘a e me‘a ‘a e tu‘i; kae‘uma‘ā kuo te‘eki ha tu‘i, neongo pe kuo fēfē hono mā‘olunga mo mālohi, kuo ne ‘eke ha me‘a pehē mei ha sikalaipe, pe maki, pe Kalitia. 11‘Io, ko e me‘a ma‘ungata‘a ‘a ia ‘oku fiema‘u ‘e he tu‘i, pea ‘oku ‘ikai ha taha kehe te ne mafakahā ki he ‘afiona, ngata pē ‘i he ngaahi ‘otua, ‘a ia ‘oku ‘ikai ke nofo‘anga fakataha mo ha‘a kakano.
12Ko e me‘a ko ia na‘e kovi ai ‘a e finangalo ‘o e tu‘i, ‘o ne tuputāmaki ‘aupito, ‘o ne folofola ke tāmate‘i ‘a ha‘a poto kotoa pē ‘o Pāpilone. 13Pea na‘e ‘alu atu ‘a e tu‘utu‘uni, pea na‘e pau ke tāmate‘i ‘a ha‘a poto; pea na‘e kumi ‘a Tāniela mo hono ngaahi kaume‘a ke tāmate‘i.
Ko Hono Fakahā Ange ‘e he ‘Otuá kia Tāniela ‘a e ‘Uhinga ‘o e Misí
14Ko e taimi ko ia na‘e tali fakapotopoto ‘a Tāniela, ‘i he‘ene fale‘i ‘a ‘Alioke ko e pule ‘o e ka‘ate ‘a e tu‘i, ‘a ia kuo ne ‘alu atu ke tāmate‘i ‘a e kau poto ‘o Pāpilone: 15pea ne pehē kia ‘Alioke ko e matāpule ‘a e tu‘i, Ko e hā ‘oku kakaha pehē ai ‘a e fekau mei he tu‘i? Toki fakahā ‘e ‘Alioke ‘a e me‘a kia Tāniela.
16Pea hū atu ‘a Tāniela, ‘o ne kole ki he tu‘i ke ne tuku mai ha taimi, pea te ne fakahā ki he tu‘i hono ‘uhinga. 17Toki ‘alu ‘a Tāniela ki hono fale, ‘o ne fakahā ‘a e me‘a kia ‘Ananaia, Misaeli, mo ‘Asalaia, ko hono ngaahi kaume‘a: 18koe‘uhi ke nau kole ki he ‘Otua ‘o Langi, ke ne ‘ofa kiate kinautolu ‘i he me‘a ni kuo fufū; ke ‘oua na‘a mate ‘a Tāniela mo hono ngaahi kaume‘a fakataha mo hono toe ‘o e kau poto ‘o Pāpilone. 19Na‘e toki tatala ‘a e me‘a fufū ni kia Tāniela ‘i ha vīsone po‘uli. Toki fakamālō‘ia ‘e Tāniela ‘a e ‘Otua ‘o Langi. 20‘Io, na‘e hanga ‘a Tāniela ‘o ne pehē, Ke mālō‘ia ‘a e huafa ‘o e ‘Otua mei he ta‘engata ‘o ta‘engata; he ‘oku ‘o‘ona ‘a e poto mo e mafai: 21pea ko ia ia ‘oku ne liliu kuonga mo e taimi: ‘oku ne liu tu‘i mo fokotu‘u tu‘i: ‘oku ne foaki poto ki he kau poto, mo e ‘ilome‘a ki he kau loto matala: 22‘oku ne tatala ‘a e ngaahi me‘a ‘oku loloto mo fufū: ‘oku ne ‘afio‘i ‘a e me‘a ‘oku ‘i he po‘uli, pea ‘oku nonofo mo ia ‘a e maama. 23‘Oku ou fakafeta‘i kiate koe, ‘Otua ‘o ‘eku ngaahi kui, ‘o u fakamālō atu koe‘uhi kuo ke foaki kiate au ‘a e poto mo e mafai; pea ko eni kuo ke faka‘ilo mai ‘a e me‘a na‘a mau kole kiate koe: ‘io, kuo ke faka‘ilo kiate kimautolu ‘a e me‘a ‘a e tu‘i.
Ko Hono Fakahā Ange ‘e Tāniela ki he Tu‘í ‘a e Misí mo Hono Faka‘uhinga
24Ko ia, na‘e ‘alu ‘a Tāniela kia ‘Alioke ‘a ia kuo tu‘utu‘uni ‘e he tu‘i ke tāmate‘i ‘a ha‘a poto ‘o Pāpilone: na‘a ne ‘alu ‘o ne lea pehē kiate ia, ‘Oua ‘e tāmate‘i ‘a e kau poto ‘o Pāpilone: ‘ave au ki he tu‘i, pea te u fakahā ki he tu‘i ‘a e ‘uhinga.
25Toki ‘ave fakavave ‘e ‘Alioke ‘a Tāniela ki he ‘ao ‘o e tu‘i, ‘o ne fakatau folofola pehē ki ai, Kuo u ma‘u ha tangata ‘i he kau pōpula Siuta, ‘a ia te ne mafakahā ‘a e ‘uhinga ki he tu‘i.
26Pea tali ‘a e tu‘i, ‘o ne folofola kia Tāniela, ‘a ia kuo fakahingoa ko Pelitisasa, ‘Oku ke mafai koā ke fakahā kiate au ‘a e misi kuo u mamata ki ai, pea mo hono ‘uhinga?
27Pea tali ‘e Tāniela ‘i he ‘ao ‘o e tu‘i, ‘o ne pehē, Ko e me‘a fufū ‘oku ‘eke ‘e he tu‘i, ‘e ‘ikai lava ‘e he kau poto, pe ko e kau maki, pe ko e kau sikalaipe, pe ko e kau ‘asitalōnome, ke fakahā ki he tu‘i; 28ka ‘oku ai ha ‘Otua ‘i langi ‘oku ne tatala ‘a e ngaahi me‘a ‘oku fufū, pea kuo ne faka‘ilo ki he ‘afio ‘a Nepukanesa ‘a e me‘a ‘e hoko ‘i he ngaahi ‘aho ‘amui. Ko ho‘o misi, mo e vīsone na‘e hā ki ho ‘ulu ‘i ho toka‘anga, ko eni ia.
29Ko e me‘a ki he ‘afiona, na‘e ‘alu hake ho‘o ngaahi fifili ‘i ho‘o toka, ‘o kau ki he ngaahi me‘a ‘e hoko ‘amui: pea ko ia ‘oku ne tatala ‘a e fufū, kuo ne fakae‘a ki he ‘afiona ‘a e ngaahi me‘a ka hoko mai. 30Ka ko e me‘a kiate au, na‘e ‘ikai koe‘uhi ko ha poto ‘oku ou ma‘u ‘o hulu atu ‘i ha ni‘ihi kehe ‘oku mo‘ui, ‘a ia na‘e fakahā ai ‘a e misiteli kiate au, ka koe‘uhiā ke faka‘ilo hono ‘uhinga ki he tu‘i, pea koe‘uhi ke ke mea‘i ‘a e ngaahi fifili ‘a ho finangalo.
31Na‘e mo‘usioa ‘e he ‘afiona, pea ‘iloange ko ha fu‘u ‘īmisi. Ko e ‘īmisi ko ē, ‘a ia ko hono lahi mo hono ngingila ko e me‘a kehe, na‘e tu‘u mai ‘i ho ‘ao; pea ko e me‘a fakailifia ke sio ki ai. 32Ko e ‘īmisi ko ia, ko hono ‘ulu ko e koula lelei; ko hono fatafata mo hono uma na‘e siliva; ko hono kete mo hono tenga na‘e palasa; 33ko hono va‘e ko e ‘aione; ko hono ‘ulu‘uluva‘e na‘e fiofio ‘aione mo ‘umea. 34Na‘a ke mo‘usioa pē kae‘oua ke tā ha maka ta‘ekau ai ha nima, ‘a ia ne ne te‘ia ‘a e ‘īmisi ‘i hono va‘e na‘e fiofio ‘aione mo ‘umea, ‘o ne laiki ia. 35Na‘e toki hoko ko e koto lailai ‘a e ‘aione, mo e ‘umea, mo e palasa, mo e siliva, mo e koula, ‘o tatau mo e kafukafu ‘o e ‘au‘au‘anga ‘i Fakaafumate; pea ne ‘ave ia ‘e he matangi, pea na‘e ‘ikai ma‘u ha potu ki ai: ka ko e maka na‘a ne taa‘i ‘a e ‘īmisi na‘e hoko ko e fu‘u mo‘unga, pea na‘e fonu ai ‘a māmani.
36Ko ia ‘a e misi, pea te mau tala hono ‘uhinga ki he ‘afiona. 37Ko ha tu‘i ‘o e ngaahi tu‘i ‘a ho‘o ‘afio; he kuo foaki kiate koe ‘e he ‘Otua ‘o Langi ‘a e pule mo e mālohi mo e aoniu mo e lāngilangi. 38Pea ‘ilonga ha potu ‘oku nofo‘anga ai ‘a e hako‘i tangata, ko e manu ‘o e vao mo e manupuna ‘o e ‘atā kuo ne tuku ki ho nima, pea kuo ne fakanofo koe ke pule ki honau kotoa. Ko koe ‘a e ‘ulu koula. 39Pea hili koe ‘e tupu ha pule‘anga ‘e taha ‘oku ‘ange‘ange ia ‘iate koe: pea mo ha pule‘anga ‘e taha ko hono tolu, ‘a ia ‘e palasa, pea te ne pule‘i ‘a māmani kotoa. 40Pea ko hono fā ‘o e pule‘anga ‘e fefeka hangē ko e ‘aione: hangē ā ko e ‘aione ‘oku ne laiki mo fakaikiiki ‘a e me‘a kotoa pē: ‘io, hangē ‘oku momosi ‘e he ‘aione ‘a e ngaahi me‘a ko ia, ‘e pehē ‘ene laiki mo momosi. 41Pea hangē na‘a ke mamata hono ‘ulu‘uluva‘e mo e louhi‘i va‘e, ‘oku fefiofi ai ‘a e ‘umea ‘oku ngāue‘aki ‘e he tufunga ipu ‘umea pea mo e ‘aione; ko e pule‘anga ‘e mavahe ia: ka ‘e ‘i ai ‘a e mālohi ‘o e ‘aione, koe‘uhi na‘a ke vakai ‘oku fiofio ‘aione ‘a e ‘umea pipiki. 42Pea ko ‘ene fiofio ‘aione mo ‘umea ‘a e louhi‘i va‘e, ko hono ‘uhinga ko e pule‘anga ‘e fiofio mālohi mo maumaungofua. 43Pea hangē na‘a ke vakai ‘oku fefiofi ‘a e ‘aione mo e ‘umea pipiki, te nau fefiofi mo e hako‘i kakai; kae ‘ikai te nau fepikitaki, hangē tofu pē ‘oku ‘ikai fetuiaki ‘a e ‘aione mo e ‘umea. 44Ka ‘i he taimi ‘o e ngaahi tu‘i ko ia, ko e ‘Otua ‘o Langi te ne fokotu‘u ha pule‘anga ‘e ‘ikai fulihi ‘o ta‘engata; pea ko hono pule ‘e ‘ikai tuku ki ha kakai kehe: ka te ne laiki mo faka‘auha ‘a e ngaahi pule‘anga ko ia, kae tu‘u pē ia ‘o ta‘engata. 45Hangē na‘a ke me‘a na‘e tā mai ha maka mei he mo‘unga ta‘ekau ai ha nima, ‘a ia na‘a ne laiki ‘a e ‘aione, ‘a e palasa, ‘a e ‘umea, ‘a e siliva, mo e koula–ko e ‘Otua Lahi kuo ne fakahā ki he ‘afiona ‘a e me‘a ‘e hoko ‘amui; ‘oku mo‘oni ‘a e misi, pea mahu‘ingamālie hono ‘uhinga.
Ko Hono Fakapale‘i ‘e he Tu‘í ‘a Tāniela
46Pea fakafo‘ohifo leva ‘a Kingi Nepukanesa, ‘o ne hū kia Tāniela; ‘o ne fekau ke feia ha feilaulau me‘akai mo e ‘inisēnisi namu kakala kiate ia. 47Pea folofola ai ‘a e tu‘i kia Tāniela, ‘o pehē, Tā ko homou ‘Otua ko e ‘Otua ia ‘o e ngaahi ‘otua, pea ko e ‘Eiki ‘o e ngaahi tu‘i, pea ko e Tatala ‘o e ngaahi me‘a ‘oku fufū, koe‘uhi kuo ke mafai ke vete ‘a e misiteli ko eni. 48Pea hākeaki‘i ‘e he tu‘i ‘a Tāniela, ‘o ne foaki kiate ia ‘a e ngaahi fu‘u me‘a‘ofa, ‘o ne fakanofo ia ko e ‘eiki ‘o e vahe fonua kotoa ko Pāpilone, mo e pule lahi ‘o e kau poto kotoa pē ‘o Pāpilone, 49pea na‘e kole ‘a Tāniela ki he tu‘i, pea na‘a ne vahe ‘a Setaleki, Mēsake, mo ‘Apitenikō ki he ngāue fakapule‘anga ‘i he vahe fonua ‘o Pāpilone; ka ka nofo ‘a Tāniela ‘i he loto‘ā ‘o e tu‘i.
Currently Selected:
KO TĀNIELA 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
