Kolosé Ko e Talateu
Ko e Talateu
Ko e Tohi ‘a Paula ki he Kakai Kolosé na‘e fai ia ki he siasi ‘i Kolose, ko e kolo ‘i ‘Ēsia Minu ‘i he fakahahake ‘o ‘Efesoó. Na‘e ‘ikai ke fokotu‘u e siasi ko ‘ení ‘e Paula, ka na‘e tu‘u ‘i he feitu‘u na‘e ongo‘i ‘e Paula ko hono fatongia ke tokanga‘i, he na‘á ne fekau atu ‘a e kau ngāue mei ‘Efesō, ‘a e kolomu‘a ‘o e vahefonua Loma ko ‘Ēsia. Ne ‘ilo ‘e Paula ‘oku ‘i ai ‘i he siasi ‘i Kolose ‘a e kau fai akonaki hala, ‘a ia na‘a nau taukave‘i tokua ‘e toki lava ke te ‘ilo‘i ‘a e ‘Otuá mo fakamo‘ui kakato kita ‘i ha‘ate hū ‘o lotu ki ha ni‘ihi ‘i he “kau pule mo e kau ma‘u mafai fakalaumālie”. Pea ‘ikai ngata ai, kae toe taukave‘i ‘e he kau faiako ko ‘ení, kuo pau ke te tali ke fai ha ngaahi ouau makehe, ‘o hangē ko e kamú, mo tauhi ‘a e ngaahi tapu ‘i he me‘akaí mo e ngaahi me‘a kehe.
Ko e taumu‘a ‘o e tohi ‘a Paulá ke fakafepaki‘i ‘a e ngaahi akonaki hala ko ‘ení ‘aki ‘a e ngaahi akonaki faka-Kalisitiane totonú. Ko e ‘elito ‘o ‘ene talí ko e pehē ‘oku meia Sīsū Kalaisi ‘a e fakamo‘ui kakató, pea ko e ngaahi tui kehé mo e ngaahi ouau kehé ko honau takihee‘i meiate ia. Na‘e tu‘unga ‘ia Kalaisi hono fakatupu ‘e he ‘Otuá ‘a māmaní pea ‘okú ne fakafoki ai pē ‘a māmani kiate ia ‘ia Kalaisi. Ko e ‘amanaki‘anga pē taha ki hano fakamo‘ui ‘o māmani, ko ha taha ‘a māmani mo Kalaisi. Na‘e toki fakaikiiki mai leva ‘e Paula ‘i he‘ene tohí ni ‘a e anga ‘o e felāve‘i ‘a e taha‘i mo‘oni ko iá mo e mo‘ui ‘a e kakai ‘oku tuí.
‘Oku tau fakatokanga‘i ‘a e me‘a mālie ‘i he tohí ni ‘a Paulá: ko hono ‘ave ia ki Kolose ‘e Tikiko, fakataha mo ‘Onesema, ko e tama pōpula na‘e fai tohi ai ‘a Paula kia Filimoné.
Ko e Kakano ‘o e Tohí
Ko e talateu (1.1-8)
Ko e anga ‘o Kalaisí mo ‘ene ngāué (1.9–2.19)
Ko e mo‘ui fo‘ou ‘ia Kalaisí (2.20–4.6)
Ko e tātuku (4.7-18)
Currently Selected:
Kolosé Ko e Talateu: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.