Kolosé 4
4
1Mou faka‘utumauku ho‘omou hū; pea mou ‘ā ‘i hono fai, pea fai mo e fakafeta‘i.#‘Efe 6.9
Ko ha ngaahi Fakahinohino
2Pea ‘oua na‘a ngalo ke hūfia kimautolu foki, koe‘uhi ke fakaava mai ‘e he ‘Otua ha matapā mo‘o e folofola, 3ke mau tala ‘a e misiteli ‘o Kalaisi, ‘a ia ‘oku ou nofo ha‘isia ai foki: 4‘io, koe‘uhi ke u lea fakahā ‘aki ‘a e me‘a ko ia, ‘a ia ‘oku taau mo kita ke fai.
5Ke fakapotopoto ho‘omou fakafeangai ki he kakai ‘o tua‘ā, ‘o lamalama ke ngāue‘aki ‘a e faingamālie.#‘Efe 5.16 6Ke kelesi‘ia ai pē ho‘omou lea ki ai, mo fakaifo ‘aki ha māsima, ‘o mou ‘ilo ‘a e anga ‘o e tali ‘oku totonu ke fai kiate kinautolu takitaha.
Ko e ngaahi Pōpoaki ‘Ofa
7Ko e me‘a ki he‘ete ngaahi me‘a, ‘e fakahā atu ‘e Tikiko, ko si‘i kāinga ‘ofeina, mo e tokoni lototō, mo e kaungā tamaio‘eiki mo au ‘i he ngāue ‘a e ‘Eiki.#Ngā 20.4; 2 Tīm 4.12 #‘Efe 6.21-22 8‘A ia kuo u fekau tonu atu ki he me‘a ko ia, ke mou ‘ilo ‘ema ngaahi me‘a, pea ke ne fakafiemālie homou loto. 9Te na ō mo ‘Onesema foki, ko si‘i kāinga lototō mo ‘ofeina, ‘a ia foki ‘oku mei homou feitu‘u. ‘E ‘a‘au atu ‘e kinaua ‘a e ngaahi me‘a ‘oku fai ‘i heni.#Filim 10-12
10‘Oku ‘ofa atu ‘a ‘Alisitako, ‘a ia ‘oku nofo pilīsone mo au, pea mo Ma‘ake, ko e tama ‘a mehikitanga ‘o Pānepasa: ‘a ia kuo mou ma‘u tu‘utu‘uni ki ai; (kapau te ne a‘u atu kiate kimoutolu, mou tali lelei ia): 11kae‘uma‘ā ‘a Sīsū ‘a ia ‘oku hingoa ko Siusitasa. Ko kinautolu pē ‘o e ha‘a kamu ‘oku kau mo au ‘i he ngaue ma‘a e Pule‘anga ‘o e ‘Otua: ko e tu‘unga me‘a ia kuo fakafiemālie kiate au.
12‘Oku ‘ofa atu ‘a ‘Epafasi, ko e tamaio‘eiki ‘a Kalaisi Sīsū mei homou feitu‘u; ‘a ia ‘oku ne fai fefa‘uhi ai pē ‘i he‘ene ngaahi hū koe‘uhi ko kimoutolu, ko e kole ke mou tu‘u ma‘u ‘i he tu‘utu‘uni kotoa pē ‘a e ‘Otua, kuo mou fakamotu‘atangata mo ‘ilo‘ilo pau.#Kol 1.7; Filim 23 13Seuke, ‘oku ou fakamo‘oni kiate ia, ‘oku lahi ‘ene feinga koe‘uhi ko kimoutolu, mo e kāinga ‘i Leotisia mo Hailapoli. 14‘Oku ‘ofa atu ‘a Luke ko si‘i faito‘o, pea mo Tīmasi.#2 Tīm 4.10,11; Filim 24
15Mou tala hoku ‘ofa ki he kāinga lotu ‘i Leotisia, kae‘uma‘ā ‘a Nīmifa mo e siasi ‘i hono ‘api.#4.15 Nīmifa… ‘api; ‘I he ngaahi hiki fuoloa ‘e ni‘ihi ‘oku ‘oku hā mei he kalama ‘o e kupu ko ení ko e fefine ‘a Nīmifa, ka ‘i he ngaahi hiki ‘e ni‘ihi ia ‘oku hā ai ko e tangata. 16Pea ka ‘osi leva ‘a e lau ‘o e ‘ipiseli ni kiate kimoutolu, pea tuku ke lau ia ‘i he siasi ‘o e kakai Leotisia, pea ke mou lau foki ‘a e ‘ipiseli mei Leotisia. 17Pea ke mou lea kia ‘Ākipo, ‘o pehē, Tokanga ki he lakanga kuo ke ma‘u ‘i he ngāue ‘a e ‘Eiki, ke ke ‘osiki ia.#Filim 2
18Ko e fetapa ‘eni ‘oku fai‘aki ‘a e nima ‘o‘oku, Paula. Manatu‘i si‘oku ngaahi ha‘i.
Ke nofo mo kimoutolu ‘a e kelesi.
Currently Selected:
Kolosé 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
