KO ‘ĒMOSI 8
8
Ko ha Vīsone ki ha Kato Fua‘i‘akau
1KO E me‘a eni na‘e tuku ke u sio ki ai ‘e ‘Ātonai Sihova: pea tā ko e kato fua‘i ‘akau kuo momoho. Pea ne folofola mai kiate au, ‘Ēmosi, ko e hā ‘oku ke sio ni ki ai? 2Pea u tali, Ko e kato fua‘i ‘akau kuo momoho.
Pea folofola ‘a Sihova kiate au, Kuo hoko ‘a e faka‘osi#8.2 faka‘osi; ‘Oku vāofi ‘a hono pu‘aki ‘o e faka-Hepelū ‘o e faka‘osingá mo e faka-Hepelū ‘o e fua‘i ‘akaú. ki hoku kakai ‘Isileli; ‘e ‘ikai te u toe lakai ia.
3Pea ‘e hoko ko e koto ‘Oiauē ‘a e ngaahi hiva ‘i he temipale ‘i he ‘aho ko ia–ko ‘Ātonai Sihova ia mei he Ta‘ehāmai–‘e lahi ‘a e ngaahi ‘anga‘anga; te ne laku kinautolu ki tu‘a ‘i he potu kehekehe–sī! ‘oua ‘e lea!#8.3 te ne… lea! pe te ne laku kinautolu ki tu‘a ‘i he sīlongo.
Ko Hono Faka‘auha ‘o ‘Isileli
4Fanongoā ki he me‘a ni, ‘a e fa‘ahinga ‘oku fakamanga ke folo ‘a e masiva, pea ke fakaeve ‘a e vaivai ‘o e fonua; 5he‘enau pehē, ‘Afē kuo laka atu ‘a e fakamāhina fo‘ou, ke tau fai atu ‘etau fakatau me‘akai? pea ke ‘osi ‘a e Sāpate, ke mau fakaava ‘a e fale koloa uite? ke fakasi‘isi‘i ‘a e ‘efa, pea ke fakalahi ‘a e mamafa ‘o e sikeli, pea ke fakakehe ‘a e fuatautau kākā: 6ke fakatau ‘a e vaivai ‘aki ha pa‘anga pe pea ko e masiva koe‘uhi ko ha hoa‘i sū: te tau fakatau foki ‘a e patepate‘i uite.
7Kuo fuakava ‘e Sihova ‘i he lāngilangi, ‘o Sēkope, ‘Ilo ‘e au ‘o kapau te u fakangalongalo‘i ‘o ta‘engata ha taha ‘o e ngaahi me‘a kuo nau fai. 8‘Ikai koā ‘e tete ‘a e fonua koe‘uhi ko e me‘a ko ia, pea tangi ‘a e nofo kotoa ‘i ai? ‘Āua, ‘e hake kotoa hangē ko Naila; pea ‘e hou mo fonohifo, hangē ko e vaitafe ‘i ‘Isipite. 9Pea ‘e hoko ‘i he ‘aho ko ia–ko ‘Ātonai Sihova ia mei he Ta‘ehāmai–te u ‘ai ke tō ‘a e la‘ā kei ho‘atā, pea te u ‘ai ke fakapo‘uli ‘a e fonua lolotonga ‘ene ‘aho maama. 10Pea te u liliu ho‘omou ngaahi kātoanga ko e koto tangi, pea ko ho‘omou ngaahi hiva kotoa ko e koto tangilāulau; pea te u ‘ai ‘a e tauanga‘a ki homou kongaloto, mo e tula ki he tumu‘aki kotoa pē; pea te u ngaohi ia ke hangē ko e tēngihia ‘o ‘ete me‘a pē taha, pea ko hono iku‘anga ke tatau mo e ‘aho mala.
11Tala atu, ‘oku ‘unu mai ha taimi–ko ‘Ātonai Sihova ia mei he Ta‘ehāmai–‘a ia te u fekau atu ai ha honge ki he fonua; ‘o ‘ikai ko ha honge me‘akai, pe ko e honge me‘ainu, ka ko e honge ‘i he fanongo ki he folofola ‘a Sihova. 12Pea te nau sipi holo mei tahi ki tahi, pea mei he tokelau ki hahake; te nau lele holo ko e kumi ki he folofola ‘a Sihova, kae ‘ikai te nau ma‘u. 13‘I he taimi ko ia ‘e pongia ‘a e kau finemui hōihoifua mo e kau talavou ko e fie inua. 14Ko e fa‘ahinga ‘oku fuakava ‘i he angahala ‘a Samēlia, pea ‘oku nau pehē, “Tangi ‘a e mo‘ui ‘a ho ‘Otua, Tani,” pē, “Tangi ‘a e hala ki Peasipa”–‘io ‘e tō ‘a kinautolu, ‘o ‘ikai toe tu‘u.
Currently Selected:
KO ‘ĒMOSI 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
