KO ‘ĒMOSI 7
7
Ko ha Vīsone ki ha Fanga He‘e
1KO eni ‘a e me‘a na‘e tuku ke u sio ki ai ‘e ‘Ātonai Sihova; tā ‘oku ne lolotonga ngaohi ha fuifui he‘e, fe‘unga mo e kamata tupu hake ‘a e tei‘ulu: pea tā ko e tei‘ulu hili ‘a e polopolo ‘a e tu‘i. 2Pea ‘i he faifai pea ‘osi ‘enau keina ‘a e mohuku kai ‘o e fonua, pea u pehē, ‘Ātonai Sihova ē, fakamolemole mu‘a; he tu‘u fēfē ‘a Sēkope? he ko e si‘i.
3Fakatomala ai ‘a Sihova ‘i he mala ko ē: folofola ai ‘a Sihova, ‘E ‘ikai hoko ia.
Ko ha Vīsone ki ha Afi
4Ko e me‘a ni na‘e tuku ke u sio ki ai ‘e ‘Ātonai Sihova: tā ‘oku ui mai ‘e ‘Ātonai Sihova ke fai ha hopo ‘aki ha afi: pea hanga ia ‘o keina ‘a e fu‘u moana, ‘io, ‘o ne kamata keina mo e tofi‘a. 5Pea u pehē, ‘Ātonai Sihova ē, ma‘u ā mu‘a: ‘e tu‘u fēfē ‘a Sēkope? he ko e si‘i.
6Fakatomala ai ‘a Sihova ‘i he mala ko ē, Folofola ai ‘a ‘Ātonai Sihova, ‘E ‘ikai hoko mo ia foki.
Ko ha Vīsone ki ha Fuavai
7Ko e me‘a eni na‘a ne tuku ke u sio ki ai; pea tā ‘oku tu‘u ‘a ‘Ātonai ‘i ha funga ‘ā ne ngaohi ‘aki ha fakavai, pea ‘oku ‘i hono nima ha fuavai. 8Pea folofola ‘a Sihova kiate au, “‘Ēmosi, ko e hā ‘oku ke sio ni ki ai?”
Pea u tali, Ko e fuavai. Pea folofola ‘a ‘Ātonai, Ko au eni ‘oku ou ‘ai ha fuavai ki he lotolotonga ‘o hoku kakai ‘Isileli: ‘e ‘ikai te u toe lakai ia.
9Pea ‘e lala ‘a e ngaahi sia ‘o ‘Aisake, pea ‘e faka‘auha ‘a e ngaahi faletapu ‘o ‘Isileli; pea te u tuku ke fai mo e fale ‘o Selopoame ‘aki ‘a e heletā.
Ko ‘Ēmosi mo ‘Amasaia
10Pea ‘alu ai ‘a e fekau ‘a ‘Amasaia ko e taula‘eiki ‘o Pēteli kia Selopoame ko e Tu‘i ‘Isileli, ke fakahā, Kuo puleaki‘i koe ‘e ‘Ēmosi ‘i he lotolotonga ‘o e fale ‘o ‘Isileli: ‘oku ‘ikai lava ‘e he fonua ke matu‘uaki ‘ene ngaahi lea. 11He ko eni ‘a e lea ‘oku fai ‘e ‘Ēmosi, Tokua ‘e mate ‘a Selopoame ‘i he heletā, pea ‘e mātu‘aki taki pōpula ‘a ‘Isileli mei hono kelekele.
12Pea lea ‘a ‘Amasaia kia ‘Ēmosi, Si‘i tongafisi, ‘alu: fei mo hola ki he fonua ‘o Siuta, pea ke kai me‘akai ‘i he potu ko ia, pea fai ‘i he potu ko ia ho‘o palofisai. 13Kae‘oua te ke toe palofisai ‘i Pēteli; he ko e falelotu ia ‘o e tu‘i, pea ko e fale fakapule‘anga.
14Pea tali ‘e ‘Ēmosi, ‘o ne pehē kia ‘Amasaia, Na‘e ‘ikai ko e palōfita au, pea na‘e ‘ikai te u kau ki ha‘a palōfita; ka ko e tauhimanu au, mo e tama tele sukamino: 15pea na‘e to‘o au ‘e Sihova mei he muimui ki he tākanga, pea folofola mai ‘a Sihova, ‘Alu ‘o fai palofisai ki hoku kakai ‘Isileli, 16pea ko eni fanongo ā ki he folofola ‘a Sihova: ‘Oku ke pehē mai ‘e koe, ‘oua te ke palofisai ki ‘Isileli, pea ‘oua ‘e mokulu ho‘o lea ki he fale ‘o ‘Aisake. 17Ko ia ko e folofola eni ‘a Sihova, ‘E hoko ho uaifi ko e pa‘umutu ‘i he kolo, pea ko ho‘o fānau tangata mo fānau fefine te nau tō ‘i he heletā, pea ‘e tufa ho kelekele ‘aki ‘a e afo; pea te ke pekia ‘e koe ‘i ha kelekele ‘oku ta‘ema‘a, pea ‘e mātu‘aki ‘ave pōpula ‘a ‘Isileli mei hono kelekele.
Currently Selected:
KO ‘ĒMOSI 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
