KO ‘ĒMOSI 1
1
1KO E ngaahi lea ‘a ‘Ēmosi, ‘a ia na‘a ne ‘i he kau tauhimanu ‘o Tekoa; ‘a e me‘a na‘e hā kiate ia ‘o kau ki ‘Isileli, ‘i he taimi ‘o ‘Ūsaia Tu‘i Siuta, pea ‘i he taimi ‘o Selopoame foha ‘o Soasi ko e Tu‘i ‘Isileli, ko e ta‘u ‘e ua ki mu‘a ‘i he mofuike.#2 Tu‘i 15.1-7; 2 Kal 26.1-23; 2 Tu‘i 14.23-29
2Pea ne pehē:#Sioelí 3.16
‘E kālou ‘a Sihova mei Saione,
‘Io, te ne tukuna atu hono le‘o mei Selusalema;
Pea ‘oku tangi ‘a e ngaahi kaikai‘anga ‘o e kau tauhi,
Pea ‘e mae ‘a e tumutumu ‘o Kāmeli.
Ko Hano Fakamāu‘i ‘e he ‘Otuá ‘a e ngaahi Fonua Kaungā‘api ‘o ‘Isileli
Ko Sīlia
3Ko e folofola eni ‘a Sihova:
He ‘oku tolu pē ‘a e angahala ‘a Tāmasikusi,
Pe ‘oku fā pē?
‘E ‘ikai te u lolou:
He na‘a nau haha ‘a Kiliati ‘aki ‘a e ngaahi haha‘anga ‘aione.#‘Ais 17.1-3; Sel 49.23-27; Sāk 9.1
4Pea te u fekau atu ha afi ki he fale ‘o Hesaeli,
Pea te ne keina ‘a e ngaahi palasi ‘o Peni-Hētati.
5Pea te u maumau‘i ‘a e ‘aonga ‘o Tāmasikusi,
Pea te u tu‘usi ‘a e nofo ‘i Pika-‘Āveni,
Mo ia ‘oku to‘o ‘a e sēpita ‘i Pete-‘Ēteni;
Pea ‘e ‘alu pōpula ‘a e kakai Sīlia ki Kili–
ko e folofola ia ‘a Sihova.
Ko Filisitia
6Ko e folofola eni ‘a Sihova:
He ‘oku tolu pē ‘a e angahala ‘a Kesa,
Pe ‘oku fā pē?
‘E ‘ikai te u lolou:
He na‘a nau hiki mo e faliki ‘enau taki pōpula kinautolu, ke tukuange ki ‘Ītomi.#‘Ais 14.29-31; Sel 47.1-7; ‘Isi 25.15-17; Sioelí 3.4-8; Sef 2.4-7; Sāk 9.5-7
7Pea te u fekau atu ha afi ki he ‘ā ‘o Kesa,
Pea te ne keina hono ngaahi palasi.
8Pea te u tu‘usi ‘a e nofo meia ‘Asitoti,
Mo ia ‘oku to‘o ‘a e sēpita meia ‘Asikeloni,
Pea te u tu‘anima‘i ‘eku tā ki ‘Ekeloni,
Pea ko e toenga ‘o kau Filisitia te nau ‘auha–
Ko e folofola ia ‘a ‘Ātonai Sihova.
Ko Taia
9Ko e folofola eni ‘a Sihova;
He ‘oku tolu pē ‘a e angahala ‘ā Taia,
Pe ‘oku fā pē?
‘E ‘ikai te u lolou:
He na‘e hiki mo e faliki ‘enau tukuange kinautolu ki
‘Ītomi, pea na‘e ‘ikai te nau manatu ki he kovinānite fakakāinga.#‘Ais 23.1-18; ‘Isi 26.1–28.19; Sioelí 3.4-8; Sāk 9.1-4; Māt 11.21-22; Luk 10.13-14
10Pea te u fekau atu ha afi ki he ‘ā ‘o Taia,
Pea te ne keina hono palasi.
Ko ‘Ītomi
11Ko e folofola eni ‘a Sihova:
He ‘oku tolu pē ‘a e angahala ‘a ‘Ītomi,
Pe ‘oku fā pē?
‘E ‘ikai te u lolou:
He na‘a ne tuli mo e heletā ki hono tokoua,#1.11 hono tokoua; Na‘e tupu ‘a e kakai ‘Isilelí meia Sēkope, ko e tokoua ‘o ‘Īsoa, ‘a ia na‘e tupu mei ai ‘a e kakai Ītomí. pea ne fakafefeka ‘ene ‘ofa kotoa, pea na‘e taukete ai pe ‘ene ‘ita, pea ne tauhi ‘ene kakaha ‘o ta‘engata.#‘Ais 34.5-17; 63.1-6; Sel 49.7-22; ‘Isi 25.12-14; 35.1-15; ‘Opa 1-14; Mal 1.2-5
12Pea te u fekau atu ha afi ki Tīmani,
Pea te ne keina ‘a e ngaahi palasi ‘o Pōsila.
Ko ‘Āmoni
13Ko e folofola eni ‘a Sihova:
He ‘oku tolu pē ‘a e angahala ‘a Ha‘a ‘Āmoni,
Pe ‘oku fā pē?
‘E ‘ikai te u lolou:
He na‘a nau tafa ‘a e kau fefine feitama ‘i Kiliati, ko ‘enau fie toloaki honau kau‘ā.#Sel 49.1-6; ‘Isi 21.28-32; 25.1-7; Sef 2.8-11
14Pea te u tafu ha afi ‘i he ‘ā ‘o Lapa,
Pea te ne keina hono ngaahi palasi,
He fai ‘a e kaila tau ‘i he ‘aho ‘o e tau,
Pea ō mo e ‘ahiohio ‘i he ‘aho ‘o e afā:
15Pea ‘alu pōpula ‘a honau tu‘i,
‘A ia mo hono hou‘eiki fakataha–ko e folofola ia ‘a Sihova.
Currently Selected:
KO ‘ĒMOSI 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
