KO 2 SĀMIUELA 19
19
Ko Hono Valoki ‘o Soape ‘e Tēvita
1PEA na‘e fakahā kia Sioape, Tokua ‘oku tutulu ‘a e tu‘i ko ‘ene tēngihia ‘a ‘Apisalome. 2Pea na‘e liliu leva ki he kakai kotoa ‘enau ikuna ko e fakapāpākū: he na‘e fanongo ‘e he kakai ‘i he ‘aho ko ia, tokua ‘oku fakamamahi ‘a e tu‘i koe‘uhi ko hono foha. 3Pea na‘e femoulu‘i mai ‘a e kakai ki he kolo ‘i he ‘aho ko ia, ‘o hangē ko e moulu mai ‘a e kakai kuo mā ‘i he‘enau hola mei he tau. 4He na‘e pūlou ‘e he tu‘i hono fofonga, ‘o ne fu‘u fākafoa, he‘ene pehē, ‘A hoku foha ko ‘Apisalome, si‘i ‘Apisalome, hoku foha, hoku foha!
5Pea hoko atu ‘a Sioape ki he tu‘i ki fale, ‘o ne fakatau folofola ange, Kuo ke fakamatavalea‘i he ‘aho ni ho‘o kau tamaio‘eiki kotoa pē, ‘a kimautolu kuo mau toki fakahaofi ho‘o mo‘ui, mo e mo‘ui ‘a e fale‘alo, mo e mo‘ui ‘a ho ngaahi uaifi mo sinifu; 6ho‘o ‘ofa‘i ‘a kinautolu ‘oku fehi‘a kiate koe, mo fehi‘a kiate kinautolu ‘oku ‘ofa kiate koe. He kuo ke fakamahino he ‘aho ni, ko e me‘a noa ki he ‘afiona ‘a e hou‘eiki mo e kau tamaio‘eiki: he ‘oku hā ni kiate au, ka ne mo‘ui ‘a ‘Apisalome he ‘aho ni, ka mau ‘osi he mate, tā ko ho‘o toki fiemālie ē. 7Ko ia, ke ke me‘a atu, ‘o lea fakafiemālie ki ho‘o kau tamaio‘eiki: he kapau ‘e ‘ikai te ke ‘alu atu, ‘oku ou fuakava ‘ia Sihova, ‘e ‘ikai ‘ahoia ha toko taha ‘iate koe: pea ‘e kovi lahi hake ia kiate koe ‘i he kovi kotoa kuo hoko ki he ‘afiona talu ho‘o tamasi‘i ‘o fai mai. 8Toki tu‘u ‘a e tu‘i, ‘o ne nofo ‘i he matanikolo. Pea na‘e fakahā ki he kakai kotoa, ‘o pehē; Vakai, ‘oku ‘afio ‘a e tu‘i ‘i he matanikolo: pea ha‘u ‘a e kakai kotoa ki he ‘ao ‘o e tu‘i. Pea ko ‘Isileli kuo hola takitaha ki hono tēniti.
9Pea na‘e ‘i ai ha lāutu‘u ‘a e kakai ‘i he ngaahi matakali ‘o ‘Isileli, ‘o pehē, Ko e tu‘i ē na‘e hamusi kitautolu mei he nima ‘o hotau ngaahi fili, pea ko ia na‘e fakahaofi kitautolu mei he nima ‘o e kau Filisitia; pea ko eni kuo ne hola mei he fonua telia ‘a ‘Apisalome. 10Pea ko ‘Apisalome, ‘a ia na‘a tau fakanofo ke pule kiate kitautolu, kuo ne tō ‘i he tau. Pea ko e hā ‘oku mou longo ai, ‘o ‘ikai te mou lea ke fakafoki ‘a e tu‘i?
11Pea ‘alu atu ‘a e fekau ‘a Kingi Tēvita kia Sātoki mo ‘Āpaiata ko e ongo taula‘eiki, ‘o pehē, Mo lea ki he mātu‘a Siuta, ‘o pehē,#19.11 Pea ‘alu … ‘Āpaiata; ‘Oku pehē ‘i he ngaahi hiki motu‘a ‘e ni‘ihi: Na‘e ongo atu kia Kingi Tēvita ‘a e ngaahi lau ‘a e kakai ‘Isilelí, pea ne fekau ‘a Sātoki mo ‘Āpaiata ko e ongo taula‘eiki ke na ‘eke ki he mātu‘a Siutá, ‘o pehē; ka ko hono faka-Hepeluú ‘oku pehē: Na‘e ongo atu kia Kingi Tēvita ki hono palasí ‘a e ngaahi lau ‘a e kakai ‘Isilelí, pea ‘oku toe ‘ohifo ai ‘a e kupu ko ení ki he ngata‘anga ‘o e vēsí. Ko e hā ‘oku mou fakatōtōmui ai ‘i he fakafoki ‘o e tu‘i ki hono fale? ka kuo a‘u ki he tu‘i ‘a e lea ‘a ‘Isileli kātoa ke ‘omi ia ki hono fale. 12Ko hoku kāinga kimoutolu, ko hoku hui mo hoku kakano; ko ia, ko e hā ‘oku mou fakatōtōmui ai ‘i he fakafoki ‘o e tu‘i? 13Pea mo tala kia ‘Āmasa, ‘Ikai ko hoku hui koe, mo hoku kakano? ‘Ilo ‘e au ‘o lahi hake, ‘o kapau ‘e ‘ikai te ke fakafe‘ao kiate au ma‘u pē ko e ‘eikitau ko e fetongi ‘o Sioape. 14Pea na‘a ne ‘uuni ‘a e loto ‘o e tangata Siuta fua pē ke toka taha kiate ia; ko ia na‘e ‘alu ‘enau fekau ki he tu‘i ‘o pehē, Foki koe mo ho‘o kau tamaio‘eiki kotoa pē.
15Ko ia, na‘e foki ‘a e tu‘i ‘o ne a‘u ki Soatani. Pea na‘e ha‘u ‘a Siuta ki Kilikali ke ‘alu ‘o fakafetaulaki ki he tu‘i, ‘o fakahā‘ele mai ‘i Soatani. 16Pea fakavave ‘a Simi foha ‘o Kela, ‘a e hako‘i Penisimani na‘e kau ki Pahulimi, ‘o ne ‘alu hifo mo e kau tangata Siuta ke fakafetaulaki kia Kingi Tēvita.#2 Sām 16.5-13 17Pea na‘e ō mo ia ha toko taha afe ‘o ha‘a Penisimani, mo Sipa ko e tama ‘o e fale ‘o Saula fakataha mo hono hongofulu mā nima‘i foha mo ‘ene hongofulu‘i tamaio‘eiki; pea nau a‘a ‘i Soatani ‘i he ‘ao ‘o e tu‘i. 18Pea na‘e ‘omi ha vaka fokotu‘u#19.18 na‘e… fokotu‘u; Ko hono hiki fakafo‘ileá ko e na‘e hiki atu ‘a e hikí ka ko hono hiki ‘oku ngali ‘uhinga angé ko e: na‘a nau hiki ki he kauvai ‘e taha ‘o e vaitafé. ke fokotu‘u ‘a e fale ‘o e tu‘i, pea ke fai ‘a e me‘a te ne loto ki ai.
Ko e ‘Ofa ‘a Tēvita kia Simi
Pea ko Simi foha ‘o Kela na‘a ne tō ‘i he ‘ao ‘o e tu‘i fe‘unga mo ‘ene a‘a ‘i Soatani.
19Pea ne fakatau folofola hake ki he tu‘i, ‘Ēī, ‘oua te ke lau ‘eku kovi, pea ‘oua te ke manatu ‘a e ngāue kovi ‘a ho‘o tamaio‘eiki ko au ‘i he ‘aho na‘e hū kitu‘a ai mei Selusalema ‘a e ‘afio ‘a e tu‘i: ‘oua ‘e tauhi ‘e he ‘afiona ‘i hono finangalo. 20He ‘oku mahino ki ho‘o tamaio‘eiki ko au kuo u hia: pea vakai kuo u ha‘u leva, ko e ‘uluaki ‘i he fale kotoa ‘o Siosifa, ke ‘alu hifo ‘o fakafetaulaki ki he ‘afio ‘a e tu‘i.
21Pea tali ‘e ‘Apisai tama ‘a Seluvaia, ‘o ne pehē, ‘E ‘ikai koā ‘e tāmate‘i ‘a Simi, koe‘uhi ko ‘ene me‘a ni, ‘a ‘ene kape‘i ‘a e Pani ‘a Sihova?
22Pea tali ‘e Tēvita, Ko homo hā au, ongo tama ‘a Seluvaia, kuo mo hoko ai he ‘aho ni ko hoku Sētane? ‘O tāmate‘i koā ha taha ‘Isileli he ‘aho ni? he ‘ikai kuo u ‘ilo ‘oku ou toe tu‘i ki ‘Isileli he ‘aho ni? 23Pea folofola ‘a e tu‘i kia Simi, ‘E ‘ikai te ke mate. Pea na‘e fuakava ‘e he tu‘i kiate ia.
Ko e ‘Ofa ‘a Tēvita kia Mefiposeti
24Ko Mefiposeti foki, foha ‘o Saula, na‘a ne ‘alu hifo ke fakafetaulaki ki he tu‘i; pea kuo ‘ikai te ne ngaohi hono va‘e, pe kosi hono kava, pe fō hono kofu, talu e ‘aho na‘e ‘alu ai ‘a e tu‘i ‘o a‘u ki he ‘aho na‘a ne foki lelei mai.#2 Sām 9.1-13; 16.1-4 25Pea ko ia ‘i he ha‘u ‘a Mefiposeti ki#19.25 ki: Ko hono faka-Hepeluú ia, ka ‘oku pehē he hiki fuoloa ‘e taha: mei. Selusalema ke fakafetaulaki ki he tu‘i, na‘e me‘a kiate ia ‘e he tu‘i, ‘E Mefiposeti, ko e hā na‘e ‘ikai te ke ha‘u ai ke tau ō?
26Pea tali ‘e ia, ‘Ēī ‘a e ‘afiona, ne lavaki‘i au ‘e hoku tamaio‘eiki: he na‘e pehē ‘e ho‘o tamaio‘eiki ko au, Ka u teuteu mai ‘eku ‘asi ke u heka ai, ‘o ‘alu ‘i he tu‘i; he ‘oku heke ho‘o tamaio‘eiki. 27Pea kuo ne lohiaki‘i ho‘o tamaio‘eiki ko au ki he ‘afio ‘a e tu‘i; ka ‘oku hangē ko e ‘āngelo ‘a ‘Elohimi ‘a e feitu‘u na: ko ia ke ke fai ‘a e me‘a ‘oku hā lelei ki ho finangalo. 28He ko e fale kotoa ‘o ‘eku ‘eiki, tala‘ehai ko e me‘a kehe, ko e koto ‘auha pē ki he ‘afio ‘a e tu‘i: ka ke fakakau ho‘o tamaio‘eiki ko au kiate kinautolu ‘oku kai ‘i he keinanga‘anga ‘o‘ou. Pea ko e hā haku kei tu‘unga ke u toe tautapa mei ai ki he tu‘i?
29Pea folofola ‘a e tu‘i ki ai, Koe‘uma‘ā ho‘o toe lau ki ho‘o ngaahi me‘a? Kuo u pehē, Mo vaeua mo Sipa ‘a e ‘api.
30Pea tali ‘e Mefiposeti ki he tu‘i, Seuke, tuku ke ne ma‘u kotoa, he ko e hā ia ki he foki lelei mai ‘a e ‘afio ‘a e tu‘i ki hono fale.
31Pea hoko hifo ‘a e Kiliati ko Pasiliai mei Lokelimi, ‘o ne a‘a ‘i Soatani mo e tu‘i ke moimoi‘i ia ‘i he me‘a ko ē ‘i Soatani.#2 Sām 17.27-29 32Pea ko Pasiliai na‘e motu‘a ‘aupito, ‘o valungofulu ta‘u: pea na‘a ne tauhi ‘a e tu‘i ‘i he‘ene nofo ‘i Mehanemi, he ko e matāpule lahi ‘aupito ia. 33Pea folofola ‘a e tu‘i kia Pasiliai, Ta a‘a mo au, ka u tauhi koe ‘i hoku fale ‘i Selusalema.
34Pea fakatau folofola ‘a Pasiliai ki he tu‘i, ‘Oku toe fiha ‘a e ngaahi ‘aho ‘o e ngaahi ta‘u ‘o ‘eku mo‘ui ka u ‘alu hake ai mo e tu‘i ki Selusalema? 35Kuo u valungofulu ta‘u he ‘aho ni: honou kei ongo‘i ha lelei mo ha kovi? hono kei ifo ki ho‘o tamaio‘eiki ko au ‘a e me‘a ‘oku ou kai mo ia ‘oku ou inu? honou kei tokanga ki he le‘o ‘o e kau tangata hiva mo e kau fefine hiva? pea koe‘uma‘ā ke hoko ai pē ‘a ho‘o tamaio‘eiki ko au ko e kavenga ki he ‘afio ‘a e tu‘i. 36Ke ki‘i a‘a pē ho‘o tamaio‘eiki mo e tu‘i ‘i Soatani; he ko e fie ‘omi ‘e he ‘afiona ha totongi pehē koe‘uma‘aki? 37Tuku mu‘a ‘a ho‘o tamaio‘eiki ko au ke foki, ka u mate ‘i hoku kolo ‘o‘oku, ofi ki he fa‘itoka ‘o ‘eku tamai mo ‘eku fa‘ē. Ka ko ho‘o tamaio‘eiki ko Kīmami ena; tuku ke a‘a ia mo e ‘afio ‘a e tu‘i, pea ke fai kiate ia ‘a e me‘a ‘e hā lelei ki ho finangalo.
38Pea folofola ‘a e tu‘i, Ko Kīmami ‘e a‘a atu mo au, pea te u fai ma‘ana ‘a e me‘a te ke loto ki ai; neongo pe ko e hā te ke hilifaki mai te u fai ia ma‘au. 39Pea a‘a ‘a e kakai kotoa ‘i Soatani, pea toki a‘a ‘a e tu‘i: pea ‘uma ‘a e tu‘i kia Pasiliai, ‘o ne tāpuaki‘i ia; pea ne foki ia ki hono feitu‘u.
Ko e Feke‘ike‘i ‘a Siuta mo ‘Isileli ‘ia Tēvita
40Pea a‘a atu ‘a e tu‘i ki Kilikali, pea a‘a mo ia ‘a Kīmami: pea na‘e moimoi‘i ‘a e tu‘i ‘e he kau Siuta kotoa, mo e vaeua foki ‘o e kakai ‘Isileli, 41pea ‘iloange na‘e ha‘u ‘a e kau tangata ‘Isileli ki he tu‘i, ‘o nau fakatau folofola ki ai, Ko e hā kuo fakakaiha‘asi ai koe ‘e homau kāinga ko e kau tangata Siuta, pea kuo nau fakahā‘ele ‘a e ‘afiona mo hono fale ‘i Soatani, fakataha mo e lahi ‘o Tēvita?
42Pea tali ‘a e kau tangata Siuta ki he kau tangata ‘Isileli, Koe‘uhi ko homau kāinga ‘a e tu‘i: pea koe‘uma‘ā ho‘o ‘ita ‘i he me‘a ni? he kuo mau momo‘i kai ha me‘a ‘a e ‘afio, ‘uma‘ā ha‘ane ‘omi ha‘amau me‘a?
43Pea tali ‘e he tangata ‘Isileli ki he tangata Siuta, ‘o pehē, ‘Oku hongofulu hoku konga ‘i he tu‘i, kae‘uma‘ā ‘oku lahi ‘eku kau ‘ia Tēvita ‘i ha‘au: pea ko e hā ai na‘a ke fakatakataka ‘aki au; he ‘ikai na‘e mu‘omu‘a ‘eku lea ‘a‘aku ‘i he lau ke fakafoki mai ‘a e tu‘i? Ka na‘e mālohi ‘a e lea ‘a e kau tangata Siuta ‘i he lea ‘a e kau tangata ‘Isileli,
Currently Selected:
KO 2 SĀMIUELA 19: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
