KO 2 SĀMIUELA 18
18
Ko Hono Ikuna‘i mo Tāmate‘i ‘o ‘Apisalome
1PEA na‘e lau ‘e Tēvita ‘a e kakai na‘e ‘iate ia, ‘o ne fakanofo hanau kapiteni toko‘i afe mo e kapiteni ‘o e toko‘i teau. 2Pea tuku atu ‘e Tēvita ‘a e kakai; ko hono vahetolu na‘e ma‘u ‘e Sioape, pea ko hono vahetolu na‘e ma‘u ‘e ‘Apisai ko e tama ‘a Seluvaia mo e tokoua ‘o Sioape, pea ko hono vahetolu ne ma‘u ‘e ‘Ītai ko e motu‘a Kati. Pea folofola ‘a e tu‘i ki he kakai, Te u mātu‘aki ‘alu atu mo au foki ke tau ō.
3Pea tali ‘a e kakai, ‘E ‘ikai te ke ‘alu koe; he neongo te mau hola kotoa, ‘e ‘ikai te nau tokanga kiate kimautolu; pea neongo ‘e mate hamau vaeua, ‘e ‘ikai te nau tokanga mai: he ‘oku ke tatau koe mo homau toko mano: ko ia ko hono lelei eni ke ke tau fakafonua mei kolo.
4Pea folofola ‘a e tu‘i kiate kinautolu, Ha me‘a pē ‘oku lelei kiate kimoutolu pea te u fai. Pea tu‘u ‘a e tu‘i ‘i he ve‘e matanikolo, kae ‘alu atu ‘a e kakai kātoa, ‘o fakateau mo fakaafe. 5Pea fai tu‘utu‘uni ‘a e tu‘i kia Sioape, mo ‘Apisai, mo ‘Ītai, ‘o pehē, Fai fakaalaala ki he tama ko ‘Apisalome telia au. Pea fanongo ‘e he kakai kotoa ki he fai tu‘utu‘uni ‘e he tu‘i ki he kau kapiteni ko e me‘a kia ‘Apisalome.
6Ko ia na‘e ‘alu atu ‘a e kakai ki ‘uta, ke fakafetaulaki ki ‘Isileli: pea na‘e fai ‘a e tau ‘i he vao ‘o ‘Ifalemi. 7Pea na‘e te‘ia ai ‘a e kakai ‘Isileli ‘i he ‘ao ‘o e kau tamaio‘eiki ‘a Tēvita, pea na‘e lahi ‘a e tō ‘i he ‘aho ko ia, ko e toko ua mano. 8Pea na‘e movetevete ‘a e tau ‘i he funga fonua kotoa: pea na‘e lahi ‘a e kakai na‘e keina ‘e he vao ‘i he ‘aho ko ia ‘i he kakai na‘e keina ‘e he heletā.
9Pea fetaulaki tu‘u ‘a ‘Apisalome mo e kau tamaio‘eiki ‘a Tēvita. Pea ‘oku heka ‘a ‘Apisalome ki he‘ene miuli, pea ‘alu ‘a e miuli ki he lalo fihifihi‘i ‘oke lahi, pea na‘e mo‘ua hono ‘ulu ‘i he ‘oke, pea na‘e tuku ia ‘i he vaha‘a ‘o langi mo māmani; he na‘e laka atu ‘a e miuli ‘oku ne heka ai. 10Pea mamata ki ai ha siana ‘e taha, ‘o ne tala kia Sioape, ‘o ne pehē; Vakai, na‘a ku sio kia ‘Apisalome ‘oku ne tāupe ‘i ha lalo ‘oke.
11Pea tali ‘e Sioape ki he siana na‘e fakahā, ‘Io, ko ia, na‘a ke sio kiate ia, pea ko e hā na‘e ‘ikai te ke taa‘i ai leva ki he kelekele? pea pehē kuo u ‘atu ha hongofulu‘i siliva mo ha no‘o.
12Pea tali ‘a e tangata kia Sioape, Ka neongo ‘e fua ki hoku ‘aofinima ni ha afe‘i siliva, ka ‘e ‘ikai te u ala ki he foha ‘o e tu‘i: he na‘a mau fanongo ki he fekau ‘e he tu‘i kia koe mo ‘Apisai mo ‘Ītai, ‘o pehē, Mou tokanga, neongo pe ko hai, ki he tama ko ‘Apisalome. 13‘Io, ka ne u fai kākā ki he‘ene mo‘ui, pea tala‘ehai ‘oku momo‘i fufū ha me‘a mei he tu‘i, pea ko koe te ke tāimu‘a hoku talatalaaki‘i.
14Pea pehē ‘e Sioape, ‘E ‘ikai te u fa‘a maumau taimi pehē mo koe. Pea ne to‘o ha tolu‘i tokotoko, ‘o ne tui ‘aki ‘a e mafu ‘o ‘Apisalome ‘oku ne kei mo‘ui ‘i he fihifihi‘i ‘oke. 15Pea kapui ia ‘e ha hongofulu‘i talavou na‘e fua ‘a e mahafu ‘a Sioape, ‘o nau taa‘i ‘a ‘Apisalome, ‘o tāmate‘i.
16Pea ifi talupite ‘e Sioape, pea na‘e foki ‘a e kakai mei he tuli ki ‘Isileli: he na‘e ta‘ofi ‘e Sioape ‘a e kakai. 17Pea nau to‘o ‘a ‘Apisalome, ‘o lī ki he fu‘u luo ‘i he vao, pea nau fokotu‘u ‘i hono funga ha ‘esi maka lahi ‘aupito: pea hola ‘a ‘Isileli takitaha ki hono tēniti.
Ko Hono Fakahā kia Tēvita ‘a e Mate ‘a ‘Apisalomé
18Ka kuo hanga ‘e ‘Apisalome lolotonga ‘ene mo‘ui, ‘o fokotu‘u hano pou fakamanatu, ‘a ia ‘oku ‘i Talalo-‘a-Tu‘i: he na‘a ne pehē, ‘Oku ‘ikai haku foha ke fakamo‘ui ai hoku hingoa: pea ne fakahingoa ‘a e pou fakamanatu kiate ia, pea ‘oku kei ui ko e Pou Fakamanatu ‘a ‘Apisalome.
19Pea toki pehē ‘e ‘Ahima‘asi foha ‘o Sātoki, Ka u lele mu‘a ‘o ongoongo ki he tu‘i kuo taukapo‘i ia ‘e Sihova mei hono ngaahi fili.
20Ka ka tali ki ai ‘e Sioape, ‘Oku ‘ikai ko koe ‘e ‘ave ongoongo he ‘aho ni, kae ‘a‘au ‘a e ‘ave ongoongo ‘i ha ‘aho kehe: ka ko e ‘aho ni ‘e ‘ikai te ke ‘ave ongoongo, koe‘uhiā kuo pekia ‘a e foha ‘o e tu‘i. 21Pea lea ‘a Sioape ki he Kusa,#18.21 Kusa; ‘a ia ko e ‘Itiopea ia. Vakai ki he “Ngaahi Huluhulu”. ‘Alu, fakahā ki he tu‘i ‘a e me‘a kuo ke mamata ki ai. Pea fai ‘e he Kusa ‘ene faka‘apa‘apa kia Sioape, ‘o ne lele.
22Pea toe ‘ahi‘ahi ‘e ‘Ahima‘asi foha ‘o Sātoki, ‘o ne pehē kia Sioape, Ka neongo pe ko e hā ha me‘a ‘e hoko, tuku mai mu‘a ke u lele mo au, ‘o tuli ki he Kusa. Pea tali ‘e Sioape, Koe‘uma‘ā ho‘o lele ‘au, tama; he tala‘ehai ‘e fakakoloa ‘a e ongoongo te ke ‘alu mo koe.
23“Ka neongo pe ko e hā ‘a e me‘a ‘e hoko, ka u lele” (ko ‘Ahima‘asi ia); pea ne toki pehē ki ai, Lele. Pea lele ‘a ‘Ahima‘asi ‘i he hala ‘o e Seakale, ‘o ne liia ‘a e Kusa.
24Pea ko Tēvita ē ‘oku ne nofo ‘i he vaha‘a ‘o e ongo matanikolo: kae ‘alu ‘a e taulama ki he tu‘a fale ‘o e matanikolo ki he ‘ā, pea ne tāngaki hake, ‘o ne vakai tā ko e tangata ‘oku lele toko taha mai. 25Pea kalanga ‘a e taulama, ‘o fakahā ki he tu‘i. Pea folofola ‘a e tu‘i, Kapau ‘oku ne toko taha ‘oku ne ha‘u mo e ongoongo. Pea ha‘u pē, ha‘u pē ia, ‘o ofi.
26Pea sio ‘e he taulama ki he tangata ‘e taha ‘oku lele mai. Pea kalanga ‘a e taulama ki he le‘o, ‘o ne pehē, Ko e tangata ena ‘oku lele toko taha. Pea pehē ‘e he tu‘i, Ko e tangata ongoongo mo ia foki.
27Pea lea ‘a e taulama, ‘Oku matamata kiate au ko e lele ‘a e ‘uluaki ‘oku hangē ko e lele ‘a ‘Ahima‘asi foha ‘o Sātoki. Pea folofola ‘a e tu‘i, Ko e tangata lelei ia, pea ko e ongoongo lelei ‘oku ha‘u mo ia.
28Pea kalanga ‘a ‘Ahima‘asi, ‘o ne pehē ki he tu‘i, Kuo lelei. Pea ne fakafo‘ohifo ki he kelekele, ‘o faka‘apa‘apa ki he tu‘i, ‘o ne pehē, Mālō mo e ‘Eiki ko ho ‘Otua, ‘a ia kuo ne tukuange ‘a e kau tangata na‘e hiki honau nima ki he ‘afio ‘a e tu‘i.
29Pea folofola ‘a e tu‘i, ‘Oku lelei ‘a e tama, ‘a ‘Apisalome? Pea tali ‘a ‘Ahima‘asi, Na‘a ku tokanga‘i ha fu‘u maveuveu ‘i he fekau ‘e Sioape ‘a e tamaio‘eiki ‘a e ‘afiona, pea mo ho‘o tamaio‘eiki ko au: ka na‘e ‘ikai te u lave‘i pe ko e hā.
30Pea me‘a ‘a e tu‘i, ‘Alu hake, ‘o tu‘u mei hē. Pea ne afe atu, ‘o tu‘u.
31Pea ‘iloange na‘e ha‘u ‘a e Kusa;#18.31 Kusa; ‘a ia ko e ‘Itiopea ia. Vakai ki he “Ngaahi Huluhulu”. pea lau mai ‘e he Kusa, ‘Ēī, ko e ongoongo ki he ‘afiona; he kuo taukapo‘i koe he ‘aho ni ‘e Sihova mei he nima ‘o e kakai kotoa na‘e tu‘u ki he ‘afiona.
32Pea me‘a ‘a e tu‘i ki he Kusa, Kuo lelei ‘a e tama ko ‘Apisalome? Pea tali ‘e he Kusa, Taumaiā ke hangē ko e tama ko ē ‘a e ngaahi fili ‘o e ‘Afio ‘a e tui, mo kinautolu kotoa ‘oku tu‘u ke fai ha kovi ki he ‘Afiona.
33Pea fu‘u ngaue ai ‘a e finangalo ‘o e tu‘i, ‘o ne ‘alu hake ki he loki ‘i ‘olunga ‘i he funga matanikolo mo tangi: pea ‘i he‘ene ‘alu na‘a ne lea ‘o pehē, ‘E hoku foha ko ‘Apisalome, hoku foha; hoku foha ko ‘Apisalome! taumaiā ne u mate au ko ho fetongi, ‘e ‘Apisalome, hoku foha, hoku foha!
Currently Selected:
KO 2 SĀMIUELA 18: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
