Tīmoté 1 1
1
1TŪ KO AU PAULA, ko e ‘aposetolo ‘a Sīsū Kalaisi ‘i he fekau ‘a e ‘Otua ko hotau Fakamo‘ui, mo Sīsū Kalaisi ko hotau ‘Amanaki‘anga.
2Ko ‘eku tohi kia Tīmote ko hoku foha mo‘oni ‘i he lotu.#Ngā 16.1
‘Ofa ke ke ma‘u kelesi mo e meesi mo e fiemālie, mei he ‘Otua ko e Tamai, mo Kalaisi Sīsū ko hotau ‘Eiki.
Ko e ngaahi Fakatokanga he Akonaki Hala
3Hangē ko ‘eku kole koe ‘i he‘eku ‘alu ki Masitōnia, ke ke nofo hifo ‘i ‘Efesō, koe‘uhi ke ke fekau ha ni‘ihi ke tuku ‘enau ako‘aki ‘a e me‘a kehe; 4kae‘uma‘ā ‘enau nofo ki he ngaahi talatupu‘a, mo e lau hokohoko ta‘e-hano-iku‘anga–‘a ia ko e fa‘ahinga me‘a ‘oku ngali tupu mei ai ha me‘a ke fakakikihi ki ai, ‘o ‘ikai ko e tokāteline faka‘otua ‘a ia ‘oku ‘o tui– 5Ka ko e me‘a ‘oku sio ki ai ‘a e fekau, ke ai ha ‘ofa tu‘u ‘i he loto ma‘a, mo e konisēnisi ‘ata‘atā, mo e tui ta‘eloi; 6‘a ia kuo le‘eia mei ai ha ni‘ihi, ‘o nau afe ki he laufanō: 7lolotonga ‘oku nau lau ko e kau faiako ‘i he Lao kinautolu, ka tā ‘oku ‘ikai ‘uhinga kiate kinautolu ‘a e ngaahi lea ‘oku nau fai, pe ko e ngaahi me‘a ‘oku nau fu‘u fakapapau ki ai.
8Pea ko eni ‘oku tau ‘ilo ‘oku lelei pē ‘a e Lao ‘o kapau ‘e fakalao pē ‘ete ngāue‘aki, 9‘o te ‘ilo ‘eni, ‘oku ‘ikai ke fokotu‘u ‘a e Lao ma‘ana ‘oku mā‘oni‘oni; ka ma‘a e kau malaki lao mo e angatu‘u, ma‘a e kau faka‘otuamate mo e angahala, ma‘a e kau ta‘eanga molumalu mo e maumau tapu, ma‘a e kau tā tamai mo e tā fa‘ē, 10ma‘a e kau fakapō, ‘a e kau fe‘auaki, ‘a e kau fai fakasōtoma, ‘a e kau kaiha‘a tangata, ‘a e kau loi, ‘a e kau maumau fuakava; pea mo e me‘a kehekehe neongo pe ko e hā, ‘a ia ‘oku fehālaaki mo e tokāteline haohaoa. 11Ko e ‘alunga ē ‘o e Kōsipeli ‘o e lāngilangi ‘o e ‘Otua Mohu Monū‘ia; ‘a e Kōsipeli ko ia ne tu‘anaki au ‘o tuku ki ai.
Ko e Fakahounga‘i e ‘Ofa ‘a e ‘Otuá
12‘Oku ou fakafeta‘i kiate ia na‘a ne fakamafeia au, ‘io, kia Kalaisi Sīsū ko hotau ‘Eiki, koe‘uhi ko ‘ene lau au ko e toko taha ke ala falala‘anga, he‘ene fokotu‘u au ki he lakanga ni. 13Neongo ko e toko taha au na‘e laukovi ki he ‘Otua ‘i mu‘a, mo fakatanga mo pau‘u; ka na‘e fai meesi kiate au, koe‘uhi na‘a ku fai ta‘e‘ilo pē, he ko e ta‘etui.#Ngā 8.3; 9.4-5 14‘Io, na‘e mātu‘aki ope mai ‘a e kelesi ‘a hotau ‘Eiki, pea ō mo ia ‘a e tui mo e ‘ofa, ‘a ia ‘oku tu‘u ‘ia Kalaisi Sīsū. 15‘Ē, ‘oku mo‘oni ‘a e lea, pea taau ke tali ‘e he loto kotoa–
“Na‘e ha‘u ‘a Kalaisi Sīsū ki māmani ke fakamo‘ui ‘a e kakai angahala.”
16‘A ia ‘oku ou fungani ai: ka na‘e fai meesi kiate au koe‘uhi ko e me‘a ni, koe‘uhi ke fakahā ‘e Kalaisi Sīsū ‘iate au ko e fungani angahala hono kātokatoa ‘o ‘ene kātaki, mo‘o taipe ma‘anautolu te nau tui falala kiate ia ‘amui ke ma‘u ‘a e mo‘ui ta‘engata. 17Pea ke ‘o e Tu‘i ‘Itāniti, ko e Ta‘e‘auha, ko e Ta‘ehāmai, ko e ‘Otua pē Taha, ke ‘o ‘Ene ‘Afio ‘a e faka‘apa‘apa mo e kolōlia ‘o laui kuonga pea ta‘engata. ‘Ēmeni.
18Ko e fekau ko eni ‘oku ou tuku kiate koe, nga‘ata Tīmote, ‘i he funga ‘o e ngaahi palofisai na‘e fai mu‘a kiate koe. Ke ke kofu ‘aki ‘a e ngaahi palofisai ko ia, ka ke fai ‘a e tau lelei. 19‘Oku ke puke ma‘u ‘a e tui, kae‘uma‘ā ‘a e konisēnisi ‘ata‘atā: he ko e ni‘ihi, ‘i he‘enau teke‘i ‘a e me‘a ko ia, kuo nau tūkia ‘i he me‘a ‘oku kau ki he tui: 20‘a ia ‘oku ‘i ai ‘a ‘Aiminia mo ‘Ālekisānita, ‘a ia na‘a ku tuku ange kia Sētane mōna kinisi, ke na tuku ‘ena laukovi ki he ‘Otua.
Currently Selected:
Tīmoté 1 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
