KO 1 SĀMIUELA 9
9
Ko e Fe‘iloaki ‘a Saula mo Sāmiuela
1PEA na‘e ai ha matāpule Penisimani ko hono hingoa ko Kisi, ko e foha ‘o ‘Apieli, foha ‘o Sīloli, foha ‘o Pekolate, foha ‘o ‘Āfaia, ko e hako‘i Penisimani, ko e tangata koloa‘ia lahi. 2Pea na‘e ai hono foha na‘e hingoa ko Saula, ko e talavou pea toulekeleka; pea na‘e ‘ikai ha tangata ‘i ha‘a ‘Isileli na‘e toulekeleka ange: ko hono uma ‘o fai ki ‘olunga na‘e hopo hake ‘i he kakai kotoa.
3Pea na‘e mole ‘a e fanga ‘asi fefine ‘a Kisi ko e tamai ‘a Saula. Pea lea ‘a Kisi ki hono foha ko Saula, ‘ave mu‘a ha taha ‘o e kau talavou, pea ke tu‘u ‘o ‘alu ‘o kumi ‘a e fanga ‘asi. 4Pea ne ‘asi atu ‘i he fonua mo‘unga ‘o ‘Ifalemi, pea ne ‘asi atu ‘i he fonua ko Sālisa, kae ‘ikai ‘iloa: pea na ‘alu atu ‘i he fonua ‘o ha‘a Sā‘ali, kae ‘ikai: pea na ‘asi atu ‘i he fonua ‘o ha‘a Penisimani, kae ‘ikai te na ‘ilo ai. 5Pea kuo na a‘u ki he fonua ko Sufi, pea pehē ‘e Saula ki he‘ene talavou na‘a na ō, Ha‘u ā ke ta foki; na‘a tuku ‘e he tangata‘eiki ‘ene tokanga ki he fanga ‘asi, ka ne hoha‘a ‘iate kitaua.
6Pea tali ‘e ia, ‘Oua koā, tokua ‘oku ‘i ai ha tangata ‘o ‘Elohimi ‘i he kolo ni, pea ko e toko taha ‘oku lahi hono tokanga‘i; ‘ilonga ha‘ane lea kuo pau ke hoko: ta ō mu‘a ki ai; hei‘ilo te ne tala kiate kitaua ‘a e hala ke ta fou ai.
7Pea lea ‘a Saula ki he‘ene talavou, Ka ko eni, kapau te ta ō ki ai, ko e hā te ta ō mo kitaua ki he matāpule? he kuo ‘osi ‘a e me‘akai ‘i he‘eta ‘angame‘a, pea ‘oku ‘ikai ha me‘a‘ofa ke ‘atu ki he tangata ‘o ‘Elohimi: ko e hā ha‘ata me‘a ‘oku ma‘u?
8Pea toe tali hake ‘e he talavou kia Saula, ‘o pehē, Tā ‘oku toe ‘iate au ‘a e vahe-faa‘i sikeli siliva: pea te u ‘atu ia ki he tangata ‘o ‘Elohimi ka ne fakahinohino hota hala.
9(‘I he taimi mu‘a ‘i ‘Isileli, ka ‘alu ha tangata ke huhū ki he ‘Otua, na‘e pehē ‘ene lau, Ha‘u ange ke tau ō ki he matalōloa: he ko e palōfita ‘o onopooni na‘e ui mu‘a ko e matalōloa.) 10Pea pehē ‘e Saula ki he‘ene talavou, ‘Oku lelei ho‘o lea; ha‘u ke ta ō. Ko ia na‘a na ō ki he kolo ‘oku ‘i ai ‘a e tangata ‘o ‘Elohimi. 11‘I he‘ena ‘alu hake ‘i he hakenga ki he kolo, na‘e ‘ilo ‘e he ongo me‘a ha tu‘unga finemui ‘oku ‘alu kitua‘ā ke ‘utuvai, pea na pehē kiate kinautolu, ‘Oku ‘i heni ‘a e matalōloa?
12Pea tali ‘e he tu‘unga fafine, ‘o nau pehē, ‘Oku ‘i ai; ‘ē, kuo ne mu‘omu‘a atu: mo to‘oto‘o atu, he kuo ne ha‘u he ‘aho ni ki he kolo; he ‘oku ai ha feilaulau ‘a e kakai he ‘aho ni ‘i he sia: 13ka mo ka a‘u ki kolo, te mo ma‘u leva ia ‘i he te‘eki ke ne ‘alu hake ki he sia ke kai; he ‘e ‘ikai tokoni ‘a e kakai kae‘oua ke ha‘u ia; he ko ia ia ‘oku ne fai ‘a e tāpuaki ‘o e feilaulau: ka lava ia, pea ‘e toki kai ‘e kinautolu ‘oku tala ki ai. Ko ia mo ō hake leva, he ko e taimi ko eni te mo ma‘u ia. 14Pea na ō hake ki he kolo: fe‘unga mo e hū ‘a e ongo me‘a ki loto kolo, tā ko Sāmiuela ena ‘oku hū ki tu‘a ke fakafetaulaki kiate kinaua, ke ‘alu hake ki he sia.
15Pea kuo fafana ‘e he ‘Eiki kia Sāmiuela ‘i he ‘aho ‘e taha kae ha‘u ‘a Saula ‘apongipongi, ‘o pehē, 16Fe‘unga mo e houa ni ‘apongipongi, te u fekau atu kiate koe ha tangata mei he fonua ‘o Penisimani, pea te ke pani ia ke ‘eiki ki hoku kakai ‘Isileli, pea te ne fakahaofi hoku kakai mei he nima ‘o e kau Filisitia: he kuo u vakai hoku kakai, koe‘uhi kuo a‘u kiate au ‘enau tautapa.
17Pea ‘i he vakai ‘e Sāmiuela ‘a Saula, pea tali ‘e Sihova, Ko eni ‘a e tangata na‘a ku lea ai kiate koe! 18ko eni ia te ne pule‘i hoku kakai. Pea ‘unu‘unu ‘a Saula kia Sāmiuela ki he matanikolo, ‘o ne pehē, Fakamolemole ka ke tala mai pe ko e fē ‘a e fale ‘o e matalōloa.
19Pea tali ‘e Sāmiuela kia Saula, ‘o pehē, Ko au ‘a e matalōloa; mu‘omu‘a hake koe ki he sia, he te tau tokoni mo au he ‘aho ni; pea te u tuku atu koe ‘apongipongi, pea te u tala ‘a e me‘a kotoa ‘oku ‘i ho loto. 20Pea ko e me‘a ki ho‘o fanga ‘asi na‘e mole, ko hono ‘aho tolu eni, ‘oua te ke lotomo‘ua ai; he kuo ‘iloa. Pea ko hai ‘oku fai ki ai ‘a e manako ‘a ‘Isileli?#9.20 ko hai… ‘Isileli?; pe ko hai te ne ma‘u ‘a e me‘a manakoa taha ‘i ‘Isilelí? ‘Ikai kia koe, mo e fale kotoa ‘o ho‘o tamai?
21Pea tali ‘e Saula, ‘o ne pehē, ‘ikai ko e Penisimani au, ‘o kau ki he si‘i taha ‘i he ngaahi matakali ‘Isileli? Pea ko hoku fāmili ko e kihi‘i si‘i ‘i he ngaahi fāmili ‘o Penisimani? ko e hā ‘oku ke lea pehē ai kiate au?
22Pea ‘ave ‘e Sāmiuela ‘a Saula mo ‘ene talavou, ‘o ne fakahū ki he falekai, ‘o ne tuku kinaua ki he potu ‘oku ‘i ai ‘a e tu‘ukimu‘a ‘o e kakai kuo tala, ‘a ia na‘a nau toko tolungofulu nai. 23Pea pehē ‘e Sāmiuela ki he ngaohi kai, ‘omi ‘a e ‘inasi na‘a ku tuku kiate koe, ‘a ia na‘a ku pehē ai kiate koe, ‘Ave ia ‘o tauhi pē. 24Pea hiki ‘e he ngaohi kai ‘a e tefito alanga, mo e me‘a na‘e kau ai, ‘o ne tuku ‘i he ‘ao ‘o Saula. Pea ne#9.24 ‘o ne me‘a [ko e tangata ngaohi me‘akaí ia] Ko hono faka-Hepeluú ia, ka ‘oku pehē he ngaahi hiki ‘e ni‘ihi: Pea na‘e pehē ‘e Sāmiuela. ki ai, Ko eni ‘a e me‘a na‘e ta‘ofi! tuku ‘i ho ‘ao ‘o tokoni; he na‘e ta‘ofi ma‘au ki he fe‘iloaki, he‘eku pehē, Kuo u tala ‘a e kakai.#9.24 he na‘e ta‘ofi… kakaí. ‘Oku ‘ikai ke mahino faka-Hepeluú, ka ‘oku ngali tonu hono hiki ‘o na‘á ku ta‘ofi ke mou ma‘u fakataha mo e kakai na‘á ku fakaafe‘í. Ko ia, na‘e taumafa ‘a Saula mo Sāmiuela ‘i he ‘aho ko ia.
25Pea kuo nau ō hifo mei he sia ki he kolo, pea ne talanoa mo Saula#9.25 peá ne talanoa mo Saula; Ko hono faka-Hepeluú ia, ka ‘oku pehē he hiki fuoloa ‘e taha pea nau teuteu e mohe‘anga mo‘o Saula. ‘i he tu‘a fale.#9.25 ‘i he tu‘a falé; ‘Oku ngali tonu hono hiki ‘o ‘i he funga falé. ‘I he kuonga ko iá na‘e ‘ato lafalafa ‘a e ngaahi falé, pea na‘e angamaheni‘aki ‘a e mohe ‘a e kakaí he funga falé. 26Pea na tutu‘u hengihengi:#9.26 Peá na tutu‘u hengihengi; Ko hono hiki faka-Hepeluú ia, ka ‘oku pehē he ngaahi hiki fuoloa ‘e ni‘ihi: peá ne mohe ai. pea fe‘unga mo e fakalau hake ‘a e ‘ata, na‘e ui ‘e Sāmiuela kia Saula ‘i he tu‘a fale, ‘o pehē, Tu‘u, ka u moimoi koe. Pea tu‘u ‘a Saula, pea na fakatou hū ki tu‘a, ‘a ia mo Sāmiuela.
27Fe‘unga mo e ō hifo ‘a e ongo me‘a ‘i he taupotu ‘o e kolo, pea pehē ‘a Sāmiuela kia Saula, Tala ki he talavou ke ne mu‘omu‘a atu (pea ne laka atu); ka ke tu‘u si‘i pē koe, ka u ongoongo kiate koe ‘a e folofola ‘a e ‘Otua.
Currently Selected:
KO 1 SĀMIUELA 9: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
