KO 1 SĀMIUELA 8
8
Ko e Kole ‘a e Kakai ke ‘i ai Hānau Tu‘i
1PEA ‘i he faifai pea motu‘a ‘a Sāmiuela, na‘a ne fokotu‘u hono ngaahi foha ko e kau fakamaau ki ‘Isileli. 2Pea ko e hingoa ‘o hono ‘uluaki foha ko Sioeli; pea ko e hingoa ‘o hono ua ko ‘Āpaia: ko kinaua na‘e fakamaau ‘i Peasipa. 3Ka na‘e ‘ikai fou ‘ene fānau ‘i hono ngaahi founga ‘o‘ona, ka na‘a na afe ko e sio koloa, pea nau tali me‘a‘ofa, ‘o nau le‘ei ‘a e fakamaau.
4Pea toki fakataha mai ‘a e kau mātu‘a ‘o ‘Isileli, ‘o nau a‘u kia Sāmiuela ki Lama; 5pea nau pehē kiate ia, Ko eni ‘oku ke motu‘a, pea ko ho‘o fānau ‘oku ‘ikai te nau fou ‘i ho ngaahi founga: ko ia ke ke fokotu‘u hatau tu‘i ke fakamaau kitautolu, ‘o hangē ko e ngaahi kakai kotoa pē.#Teu 17.14 6Ka na‘e hā kovi kia Sāmiuela ‘a e me‘a, ‘a ‘enau pehē, ‘Omi hatau tu‘i ke fakamaau kitautolu. Pea lotu ‘a Sāmiuela kia Sihova. 7Pea folofola ‘a Sihova kia Sāmiuela, Fakaongo ki he lea ‘a e kakai ‘i he me‘a kotoa kuo nau lea‘aki kiate koe: he ‘oku ‘ikai ko koe kuo nau li‘aki, ka kuo nau li‘aki au mei he nofo ko honau tu‘i. 8Ko e anga ai pē ia ‘o e me‘a kotoa kuo nau fai, mei he ‘aho na‘a ku ‘ohake kinautolu mei ‘Isipite, ‘o a‘u ki he ‘aho ko eni, ‘a ‘enau li‘aki au, mo tauhi ‘otua kehe, kuo pehē foki ‘enau fai kiate koe. 9Pea ko eni ke ke fakaongo ki he‘enau lea; ngata pē te ke mātu‘aki na‘ina‘i kiate kinautolu, ‘o hīnoi‘i kinautolu ‘a e konisitūtone ‘o e tu‘i te ne pule kiate kinautolu.
10Pea na‘e tala ‘e Sāmiuela ‘a e ngaahi folofola kotoa ‘a Sihova ki he kakai na‘e kole ha tu‘i meiate ia. 11Pea ne pehē, Ko eni ‘a e konisitūtone ‘a e tu‘i te ne pule kiate kimoutolu; te ne to‘o ho‘omou fānau tangata, ‘o fokotu‘u ke fai lakanga ma‘ana, ki he‘ene ngaahi sāliote, pea ki he‘ene ka‘ate heka hoosi; pea te nau lele mu‘omu‘a ‘i he‘ene ngaahi sāliote: 12pea te ne tu‘utu‘uni ma‘ane hou‘eiki tau, ke pule ki he toko‘i afe mo e toko‘i nimangofulu; pea ke huo ‘ene ngoue‘anga, pea ke utu hono ta‘u, pea ke ngaohi ‘a e nāunau ‘o e tau mo e nāunau ‘o e sāliote. 13Pea te ne to‘o ho‘omou fānau fefine ma‘ane kau fai lolo, pea ma‘ane kau ngaohi kai, pea ma‘ane kau ta‘o mā. 14Pea te ne to‘o homou ngaahi konga vao, mo ho‘omou ngaahi vaine, mo ho‘omou ngaahi ngoue ‘ōlive, ‘a honau lelei, ‘o foaki ki he‘ene kau tamaio‘eiki. 15Pea te ne to‘o ‘a e vahehongofulu ‘o ho‘omou pulopula, pea mo ho‘omou ngoue vaine, ‘o foaki ki he‘ene kau ‘iunoke mo ‘ene kau tamaio‘eiki. 16Pea te ne to‘o ho‘omou tamaio‘eiki, mo ho‘omou kau kaunanga, mo e lelei ‘o ho‘omou fanga pulu,#8.16 fanga pulu: ‘Oku pehē ‘a e hiki fuoloa ‘e taha, ka ko hono faka-Hepeluú, ko e kau talavou. mo ho‘omou fanga ‘asi, ‘o ngāue‘aki ‘i he‘ene me‘a ‘a‘ana– 17‘a e vahehongofulu ‘o ho‘omou fanga sipi mo e kosi: pea ko kimoutolu te mou tamaio‘eiki kiate ia. 18Pea te mou tautapa ‘i he ‘aho ko ia, koe‘uhi ko e tu‘i na‘a mou fili ma‘amoutolu; kae ‘ikai tali kimoutolu ‘e he ‘Eiki ‘i he ‘aho ko ia.
19Ka ka ‘ikai fie fanongo ‘e he kakai ki he lea ‘a Sāmiuela; pea nau pehē, ‘Ikai; ka kuo pau ke ‘ai hatau tu‘i; koe‘uhi foki ke tau tatau mo e pule‘anga kotoa pē; 20pea ke fai fakamaau ma‘atautolu ‘e hotau tu‘i, pea ke ne taki kitautolu, ‘o angi ‘i he‘etau ngaahi tau. 21Pea ongona ‘e Sāmiuela ‘a e ngaahi lea kotoa ‘a e kakai, ‘o ne ‘a‘au ‘i he fofonga ‘o Sihova. 22Pea folofola ‘a Sihova kia Sāmiuela, Fakaongo pē ki he‘enau lea, ‘o fakanofo hanau tu‘i. Pea pehē ‘e Sāmiuela ki he kau tangata ‘Isileli, takitaha ‘alu ki hono kolo.
Currently Selected:
KO 1 SĀMIUELA 8: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
