KO 1 SĀMIUELA 14
14
Ko e To‘a ‘a Sonatane
1PEA ko e ‘aho ‘e taha na‘e pehē ‘e Sonatane, foha ‘o Saula, ki he tama na‘e fua ‘ene mahafu, Ha‘u, ta laka ange ki he le‘o Filisitia mei hena. Ka na‘e ‘ikai te ne tala ki he‘ene tamai. 2Pea ko Saula na‘e nofo ‘i he taupotu ‘o Kipea, ‘i he lolo pomikānite na‘e ‘i Mikiloni; pea ko e kakai na‘e ‘iate ia na‘e toko onongeau nai; 3pea ko ‘Āhaia na‘e ‘ai ‘ēfoti, ‘a ia ko e foha ‘o ‘Ahitupi, ko e tokoua ‘o ‘Ikapote, foha ‘o Finiasi, foha ‘o ‘Īlai, ko e taula‘eiki ‘a Sihova ‘i Sailo. Pea na‘e ‘ikai ‘ilo ‘e he kakai kuo ‘alu ‘a Sonatane.
4Pea ‘i he vaha‘a ‘o e ongo hū‘anga, ‘a ia na‘e feinga ai ‘a Sonatane ke laka atu ki he le‘o Filisitia, na‘e hopo hake ha fu‘u makatu‘u mei he potu ko ē mo e fu‘u makatu‘u mei he potu ko ē: pea ko e hingoa ‘o e taha ko Pōsesi, mo e taha ko Sene. 5Na‘e hopo ‘a e maka ‘e taha hangē ha pou mei he tokelau, ‘i he hāngai ki Mikimasi, pea ko e taha mei he tonga ‘i he hāngai ki Kepa.
6Pea pehē ‘e Sonatane ki he talavou na‘e fua ‘ene mahafu, Ha‘u, ta laka ange ki he le‘o ‘a e kau ta‘ekamu na: hei‘ilo ‘e ngāue ‘a e ‘Eiki ma‘ataua: he ‘oku ‘ikai loki ‘a Sihova ke fai ha fakamo‘ui ‘aki ha tokolahi pe ha toko si‘i.
7Pea tali ‘ene to‘o mahafu, Fai pē ‘a e me‘a kotoa ‘oku ‘i ho loto: afe atu,#14.7 ‘a e me‘a kotoa ‘oku ‘i ho loto: afe atu; Ko hono faka-Hepeluú ia, ka ‘oku pehē he hiki fuoloa ‘e taha: ‘a e me‘a kotoa ‘oku ‘i ho loto. te u ‘iate koe ‘o hangē ko ho loto.
8Pea pehē ‘e Sonatane, Ko eni, ta laka ange ki he kau tangata, ‘o fakahā kitaua kiate kinautolu. 9Kapau te nau pehē mai, Mo tatali pē kae‘oua ke mau a‘u atu; pea te ta tu‘u ai pē, ‘o ‘ikai ‘alu hake kiate kinautolu. 10Ka ‘o kapau te nau lea ‘o pehē, Hake mai: pea te ta ‘alu hake: he kuo tuku mai kinautolu ‘e he ‘Eiki ki hota nima; pea ko e faka‘ilonga ia kiate kitaua.
11Pea na fakahā kinaua ki he le‘o Filisitia: pea pehē ‘e he kau Filisitia, Uoi! ‘oku hū mai hani Hepelū mei he ngaahi ‘ana na‘a nau toi ai! 12Pea tali ‘a e kau le‘o kia Sonatane mo ‘ene fua mahafu, Hake mai, ka mau faka‘ilo#14.12 faka‘ilo; pe fakahā. ha me‘a kiate kimoua. Pea pehē ‘e Sonatane ki he‘ene fua mahafu, Muimui mai; he kuo tuku kinautolu ‘e Sihova ki he nima ‘o ‘Isileli.
13Pea totolo hake ‘a Sonatane, pea muimui ki ai ‘ene fua mahafu: pea nau tō ‘i he ‘ao ‘o Sonatane; pea na‘e tā atu ‘ene fua mahafu ‘i hono tu‘a. 14Pea ko e ‘uluaki tā ko ia ‘a Sonatane mo ‘ene fua mahafu na‘e fe‘unga mo e toko uofulu ‘i he vaeua ‘o e ‘eka#14.14 na‘e fe‘unga… ‘eka; ‘Oku ‘ikai ke mahino ‘a hono faka-Hepeluú. ‘Oku hiki ‘i he Sepituakiní: ‘aki ‘a e ngaahi tao, mo e maka, mo e maka tekanoa. 15Pea na‘e hoko ha tete ‘i he ‘apitanga tau, ‘i he vao pea ‘i he kakai kotoa; ko e le‘o foki mo e pāpani na‘e tete mo kinautolu: pea na‘e mofuike ‘a e fonua; ko ia na‘e ai ha tete fakafa‘ahikehe.
Ko Hono Ikuna‘i ‘o e Kakai Filisitiá
16Pea fakasio ‘e he kau taulama na‘e ‘ia Saula ‘i Kipea-Penisimani, pea tā ‘oku faka‘a‘au hifo ai pē ‘a e hōsitē, ‘o movete ki hē mo ē. 17Pea lea ‘a Saula ki he kakai na‘e ‘iate ia, Lau mu‘a, ‘o vakai pe ko hai kuo ‘alu meiate kitautolu. Pea nau lau, pea tā na‘e ‘ikai ‘i ai ‘a Sonatane mo ‘ene fua mahafu. 18Pea me‘a ‘a Saula kia ‘Āhaia, ‘Unuaki mai ‘a e ‘A‘ake ‘o ‘Elohimi.#14.18 ‘A‘ake ‘o ‘Elohimi; Ko hono faka-Hepeluú ia. ‘Oku hiki ‘i he Sepituakiní: ko e ‘ēfoti. Vakai ki he 2.28. He ko e ‘a‘ake ‘o ‘Elohimí na‘e ‘i ha‘a ‘Isileli ‘i he taimi ko iá.#14.18 He ko e ‘a‘ake ‘o ‘Elohimi na‘e ‘i ha‘a ‘Isileli ‘i he taimi ko ia; ‘Oku pehē he hiki fuoloa ‘e taha: ‘I he ‘aho ko iá na‘e mu‘a atu ‘a ‘Āhaia mo e ‘A‘ake ‘o ‘Elohimí ‘i he kakaí, ka ko hono faka-Hepeluú ko e He ‘i he ‘aho kiá ko e ‘A‘ake ‘o e ‘Otuá mo e kakai ‘Isilelí [pea ngata ai]. 19Pea faifai, pea lolotonga ‘a e alea ‘a Saula mo e taula‘eiki, pea ko e maveuveu ‘i he ‘apitanga Filisitia na‘e fakautuutu hono lahi: pea pehē ‘e Saula ki he taula‘eiki, Ta‘ofi ho nima. 20Pea na‘e fakataha ‘a Saula mo e kakai na‘e ‘iate ia ‘o nau a‘u ki he tau: pea tā ‘oku nau fetā‘aki heletā fakaekinautolu, ko e ‘ohovale lahi ‘aupito. 21He ko e kau Hepelū na‘e ‘i he kau Filisitia mu‘a, pea kuo nau ‘alu hake mo kinautolu ‘o nofo ‘i he ‘apitanga tau ‘i he potu kehekehe, na‘e kau;#14.21 ‘i he potu kehekehe; Ko hono faka-epeluú ia, ka ‘oku pehē he ngaahi hiki fuoloa ‘e ni‘ihi: na‘a nau toe mafuli hake ‘o kau. mo kinautolu ki he kakai ‘Isileli na‘e ‘ia Saula mo Sonatane. 22Pea ko e kau tangata ‘Isileli ne toi ‘i Mo‘unga ‘Ifalemi, ‘i he‘enau fanongo kuo hola ‘a e kau Filisitia, na‘e tuli tā ‘e kinautolu foki kiate kinautolu ‘i he tau. 23Ko ia na‘e fakamo‘ui ‘e Sihova ‘a ‘Isileli ‘i he ‘aho ko ia: pea na‘e fai atu ‘a e tau ‘o tuku ki mui ‘a Peteaveni.
Ko e ngaahi Me‘a na‘e Hoko ‘i he Hili ‘a e Taú
24Ka na‘e mafasia ‘a e tangata ‘Isileli ‘i he ‘aho ko ia: he na‘e fakafuakava‘i ‘e Saula ‘a e kakai, ‘o pehē, Ke mala‘ia ‘a e tangata te ne kai me‘akai kae‘oua ke po‘uli, pea ke ‘oua ke u sauni hoku ngaahi fili. Ko ia, na‘e ‘ikai ke momo‘i mama ‘e he kakai ha me‘akai. 25Pea na‘e a‘u ‘a e fonua kotoa#14.25 na‘e a‘u ‘a e fonuá kotoa; Ko hono faka-Hepeluú ia, ka ‘oku ngali tonu hono hiki ‘o na‘a nau a‘u kotoa. ki he vao tātā; pea na‘e ai ha honi ‘i he funga kelekele. 26Pea ‘i he a‘u ‘a e kakai ki he vao, tā ‘oku tafe ‘a e honi: ka na‘e ‘ikai ‘ai ‘e ha taha hono nima ki hono ngutu; he na‘e manavahē ‘a e kakai ki he fuakava. 27Ka ko Sonatane na‘e ‘ikai te ne fanongo ki he fakafuakava‘i ‘e he‘ene ‘eiki ‘a e kakai: pea ne tuku atu ‘a e tokotoko na‘a ne to‘o, ‘o ne unu hono mui ki he vao honi, ‘o ne toe ‘ai hono mui ki hono ngutu; pea na‘e maama hono mata. 28Pea fakalea ange ‘e ha taha mei he kakai ‘o pehē, Na‘e mātu‘aki fakafuakava‘i ‘e ho‘o ‘eiki ‘a e kakai, ‘o pehē, Ke mala‘ia ‘a e tangata te ne kai me‘akai he ‘aho ni. Pea kuo vaivai ‘a e kakai.
29Pea pehē ‘e Sonatane, Kuo fakamamahi ‘a e fonua ‘e he‘eku tamai: vakai mai ki he maama hoku mata, neongo ko ‘eku ki‘i kamata pē ‘a e honi ni. 30Huanoa ‘oka ne fu‘u kai ‘a e kakai he ‘aho ni mei he vete ‘o honau fili kuo nau ma‘u; pehē hono ‘ikai kuo lahi ange ‘a e te‘ia ‘o e kau Filisitia?
31Pea nau tā holo ‘a e kau Filisitia ‘i he ‘aho ko ē mei Mikimasi ki ‘Esialoni: pea na‘e vaivai ‘aupito ‘a e kakai. 32Pea na‘e ‘oho ‘a e kakai ki he vete, pea nau to‘o sipi, mo e fanga pulu, mo e fanga kafi, ‘o nau te‘ia ‘i he kelekele: pea na‘e kai ‘e he kakai kuo pani toto. 33Pea na‘e fakapā kia Saula, ‘o pehē; Vakai, ‘oku fai angahala kia Sihova, he‘enau kai kuo pani toto.#Sēn 9.4; Lev 7.26-27; 17.10-14; 19.26; Teu 12.16,23; 15.23 Pea ne pehē, Kuo mou fai kākā: fakateka mai#14.33 mai; Ko hono faka-Hepelū kakató ko e mai he ‘ahó ni; ka ‘oku pehē he hiki fuoloa ‘e taha: mai ki heni. leva ha fu‘u maka.
34Pea pehē ‘e Saula, Mou movete atu ki he kakai, pea mou tala kiate kinautolu, Mou takitaha ‘omi kiate au ‘ene pulu, ‘ene sipi, ‘o tāmate‘i heni, pea mou kai; ‘o ‘oua ‘e fai angahala kia Sihova he kai mo e toto. Pea ‘omi ‘e he kakai takitaha ‘ene pulu, ‘o ne ha‘u mo ia ‘i he pō ko ia, ‘o ne tāmate‘i ‘i he potu ko ia. 35Pea langa ‘e Saula ha ‘ōlita kia Sihova: ko e ‘uluaki ‘ōlita ‘o Sihova ia na‘a ne langa.
36Pea me‘a ‘e Saula, Tau tuli hifo po‘uli ki he kau Filisitia, ‘o vete kinautolu ‘o a‘u ki he ma‘a ‘a e ‘aho: ‘o ‘oua na‘a tuku hanau taha ke toe. Pea nau tali, Ko e me‘a kotoa ‘oku hā lelei ki he ‘Afiona pea fai. Pea pehē ‘e he taula‘eiki, Tau ‘unu‘unu kia ‘Elohimi heni.
37Pea huhū ‘e Saula ki he ‘Otua, Te u tuli hifo koā ki he kau Filisitia? Te ke tuku kinautolu ki he nima ‘o ‘Isileli? Ka na‘e ‘ikai ha‘ane tali ‘i he ‘aho ko ia. 38Pea me‘a ‘a Saula, Mou ‘unu‘unu mai ki heni, ‘a e ngaahi pou tuliki ‘o e kakai; pea mou ‘ilo ‘o vakai pe kuo tupu ‘i he hā ‘etau hia he ‘aho ni. 39He tangi mo‘ui ‘a e ‘Eiki ko e Fakamo‘ui ‘o ‘Isileli, neongo ko hoku foha ko Sonatane, te ne mātu‘aki mate. Pea na‘e ‘ikai ha taha ‘i he kakai kotoa ‘e tali. 40Pea me‘a ia ki ‘Isileli kātoa, Ke fa‘ahi ‘e taha kimoutolu, pea fa‘ahi ‘e taha au mo hoku foha ko Sonatane. Pea pehē ‘a e kakai kia Saula, Ha me‘a ‘oku hā lelei ki he ‘Afiona pea fai.
41Pea fakatau folofola ‘a Saula kia Sihova ko e ‘Otua ‘o ‘Isileli, Fakahā ‘a e totonu.#14.41 Fakahā ‘a e totonu; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: tali mai ‘aki ‘a e ongo maka tapú. Kapau ko Sonatane pe ko au ‘oku halaiá, tali mai he ongo maka tapú. Kapau ko Sonatane pe ko au ‘oku halaiá, tali mai he ‘Ūlimí; pea kapau leva ko ho kakaí ‘oku halaiá, tali mai he Tūmemí. Ko e tali mai he Tūmemí ‘oku tu‘u ‘i he faka-Hepeluú, neongo ‘oku ‘ikai ke tu‘u ‘i he faka-Tongá. Ko e ‘Ūlimí mo e Tūmemí; Ko e ongo nāunau na‘e fai ‘aki e fekumi pe ko e hā e finangalo ‘o e ‘Otuá. ‘Oku ‘ikai ‘ilo pau ‘a e anga hono ngāue‘akí. Pea na‘e tonu kia Saula mo Sonatane, kae hao ‘a e kakai.#Nōm 27.21; 1 Sām 28.6 42Pea pehē ‘e Saula, Fai talotalo kiate kimaua mo hoku foha ko Sonatane. Pea na‘e tonu kia Sonatane. 43Pea pehē ‘e Saula kia Sonatane, Tala mai pe ko e hā ‘a e me‘a kuo ke fai. Pea fakahā ki ai ‘e Sonatane, ‘o pehē, Ko ‘eku ki‘i kamata pē ha momo‘i honi ‘i he mui tokotoko na‘a ku to‘o, pea tā te u mate ‘apē.
44Pea me‘a ‘a Saula, ‘Ilo ‘e au ‘o lahi hake, ‘o kapau ‘e ‘ikai te ke mate, Sonatane.
45Pea fakatau folofola ‘a e kakai kia Saula, ‘O mate koā ‘a Sonatane, ‘a ia kuo ne fai ‘a e fakamo‘ui lahi ni ma‘a ‘Isileli? Molekemama‘o! Tangi mo‘ui ‘a e ‘Eiki, ‘e ‘ikai tō kelekele hano tu‘oni lou‘ulu; he kuo ne ngāue mo e ‘Otua he ‘aho ni. Ko ia na‘e huhu‘i ‘e he kakai ‘a Sonatane, pea na‘e ‘ikai te ne mate.
46Pea me‘a hake ‘a Saula mei he tuli ‘o e kau Filisitia, pea ‘alu ‘a e kau Filisitia ki honau feitu‘u.
Ko e Tu‘i ‘a Saulá mo Hono Fāmilí
47Pea hili ‘a e puke ‘e Saula ‘a e pule ki ‘Isileli, na‘a ne fai tau ‘i he potu kotoa pē ki hono ngaahi fili, ki Moape, pea ki ha‘a ‘Āmoni, pea ki ‘Ītomi, pea ki he ngaahi Tu‘i Sopa, pea ki he kau Filisitia. 48Pea ‘ilonga kinautolu na‘a ne hanga ki ai, na‘a ne ngaohikovi‘i:#14.48 na‘a ne ngaohikovi‘i; Ko hono faka-Hepeluú ia, ka ‘oku pehē he hiki fuoloa ‘e taha: na‘á ne ikuna‘i. ‘io, na‘a ne fai fita, ‘o ne taa‘i ‘a ‘Amaleki; ‘o ne hamusi ‘a ‘Isileli mei he nima ‘o hono kau vete.
49Pea ko e hako ‘o Saula ko Sonatane, mo Sisui, mo Malikisua: pea ko e hingoa ‘o hono ongo ‘ōfefine; ko e ‘uluaki ko Mēlape, pea ko e tehina ko Maikale: 50pea ko e hingoa ‘o e uaifi ‘a Saula ko ‘Ahinoami ko e ‘ōfefine ‘o ‘Ahima‘asi: pea ko e hingoa ‘o e kapiteni ‘o ‘ene tau ko ‘Āpina ko e foha ‘o Nā ko e tokoua ‘o e tamai ‘a Saula. 51Pea ko Kisi ko e tamai ‘a Saula, mo Na‘a ko e tamai ‘a ‘Āpina, ko e hako ‘o ‘Apieli kinaua.
52Pea na‘e fai mālohi ‘a e tau ki he kau Filisitia ‘i he taimi kotoa pē ‘o Saula: pea ka vakai ‘e Saula ha tangata kaukaua, pe ha tangata to‘a, na‘a ne to‘o mo‘ona.
Currently Selected:
KO 1 SĀMIUELA 14: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
