Kolinitō 1 16
16
Ko ha Me‘a‘ofa Ma‘á e Kakai ‘a e ‘Otuá
1PEA ko e me‘a ki he tānaki tokoni ma‘a e kāinga lotu hangē ko ia na‘a ku tu‘utu‘uni ki he ngaahi siasi ‘i Kalētia, ke pehē pē ho‘omou fai ‘e kimoutolu.#Lom 15.25-26 2‘I he ‘uluaki ‘aho ‘o e uike kotoa pē, ke takitaha ta‘ofi ‘i ‘api, ‘o tauhi, ha me‘a kuo hulu atu ‘i he‘ene koloa: koe‘uhi ke ‘oua na‘a ai ha fu‘u tānaki ‘e fai ‘i he‘eku ‘alu atu. 3Pea ‘oka u ka hoko atu, ‘ilonga ha ni‘ihi te mou fili ki ai, te u fekau atu kinautolu mo e ngaahi tohi, ke ‘ave ho‘omou ‘ofa ki Selusalema. 4Pea kapau ‘e taau mo e ‘alu ‘a‘aku, pea te nau ‘alu mo au.
Ko e Teu Fononga ‘a Paula
5Pea ko eni, te u ‘alu atu kiate kimoutolu hili ‘eku foli ‘a Masitōnia; he ‘oku ou teu ke foli ‘a Masitōnia.#Ngā 19.21 6Pea hei‘ilo te u nofonofo atu, ‘io, ‘o fa‘ahita‘u momoko nai mo kimoutolu; kae ‘amoutolu hoku moimoi‘i ‘i haku fononga ‘e toki fai. 7He ‘oku ‘ikai te u loto ke fai ni ha ‘ahitu‘u kiate kimoutolu; he ‘oku ou ‘unaloto ke nofonofo hifo mo kimoutolu, ‘o kapau ‘e toki finangalo ki ai ‘a e ‘Eiki.
8Ka te u nofo pē ‘i ‘Efesō, ‘o a‘u ki he Penitekosi;#Lev 23.15-21; Teu 16.9-11 #Ngā 19.8-10 9he kuo fakaava kiate au ha matapā lahi mo ‘aonga, pea ‘oku tokolahi ‘a e ta‘ofi.
10Pea ko eni, kapau ‘e hoko atu ‘a Tīmote, pea mou tokanga ke ‘oua na‘a ai ha me‘a te ne fai manavasi‘i ai ‘ene feangai mo kimoutolu: he ko e ngāue ‘a e ‘Eiki ia ‘oku ne fai, ‘o tatau pē mo au.#1 Kol 4.17 11Ko ia, ke ‘oua na‘a ai ha taha te ne ta‘etoka‘i ia; ka mou moimoi‘i lelei pē ke ne hoko mai kiate au: he ‘oku ou talitali kiate ia, ha‘ane ha‘u mo e kāinga.
12Pea ko e me‘a ki si‘i tokoua ko ‘Āpolosi, ne u kole lahi kiate ia ke ‘alu atu kiate kimoutolu ‘i he ‘alu ‘a e kāinga: ka na‘e ‘ikai te ne momo‘i loto#16.12 na‘e ‘ikai… loto; pe ‘oku ‘ikai ‘aupito ko e finangalo ‘o e ‘Otuá. ke ‘alu ‘i he taimi ni; ka te ne ‘alu pē ‘oka ai ha faingamālie.
Ko e Ngaahi Maea Fakafo‘ituitui ‘a Paula mo ‘Ene Ngaahi Pōpoaki ‘Ofa
13Mou ‘ā ‘o le‘o; mou tu‘u ‘aki ‘a e tui; mou fai ‘o ngali tangata; mou fakama‘u hifo. 14‘Ilonga ha‘amou me‘a ‘e fai, fai pē ‘i he ‘ofa.
15Pea ko si‘eku enginaki atu, kāinga. ‘Oku mou ‘ilo ‘a e fāmili ‘o Setivena, ko e fua tapu ia ‘o ‘Akeia, pea na‘a nau tuku kinautolu ‘e kinautolu ke fai ‘a e tauhi ‘o e kakai lotu.#1 Kol 1.16 16Ko ia, ‘oku ou enginaki atu, ke mou tuku foki ‘a kimoutolu ki he me‘a ko ia, mo fakaongo ki he fa‘ahinga ko ia; ‘io, pea kiate ia kotoa pē ‘oku kaungā ngāue mo ia mo fakafitefita‘a.
17Pea ‘oku ou fakafeta‘i ‘i he ha‘u ‘a Setivena mo Fotunato mo ‘Akeiko: he ko ‘enau ‘i heni kuo lelu ai ‘eku mamahi ‘i he ‘ikai te tau fe‘ilongaki: 18he kuo nau fakafiemālie hoku loto mo ho‘omoutolu foki. Ko ia ke mou ‘ilo ‘a e fa‘ahinga pehē.
19‘Oku ‘ofa atu ‘a e ngaahi siasi ‘Ēsia. ‘Oku ‘ofa lahi kiate kimoutolu ‘i he ‘Eiki ‘e ‘Akuila mo Pīsila, mo e siasi ‘oku ‘i hona ‘api.#Ngā 18.2 20‘Oku ‘ofa atu ‘a e kāinga lotu kotoa pē.
Mou fefekita‘aki ‘aki ha ‘uma tapu.
21Ko e fetapa ‘eni ‘oku fai‘aki ‘a e nima ‘o‘oku, Paula.
22Ka ai ha taha ‘oku ‘ikai te ne ‘ofa ki he ‘Eiki, ke ne hoko koe mala‘ia!
MALANATA!#16.22 Ko hono ‘uhinga ‘o e lea Malanatá ‘a ‘eni: ‘Oku tu‘unuku mai ‘a e ‘Eiki.
23Ko e kelesi ‘a e ‘Eiki ko Sīsū, ‘ofa ke ‘iate kimoutolu ia!
24Si‘oku ‘ofa atu kiate kimoutolu kotoa pē ‘ia Kalaisi Sīsū. ‘Ēmeni.
Currently Selected:
Kolinitō 1 16: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
