Kolinitō 1 14
14
Ko e Lea Kehekehé mo e Ivi Fakapalōfitá
1MOU tuli ki he ‘ofa, kae kakapa ki he ngaahi mafai fakalaumālie, pea lahi pē ke mou malanga palofisai. 2He ko ia ‘oku ne lea ‘i ha lea kehe, ‘oku ‘ikai ko ‘ene lea ki he kakai, ka ki he ‘Otua; he ‘oku ‘ikai ‘uhinga ki ha taha, ka ‘oku ne lea‘aki ‘a e ngaahi misiteli mei hono laumālie. 3Ka ko ia ‘oku ne malanga palofisai ‘oku lea ia ki he kakai, ke langa hake mo enginaki mo fakafiemālie. 4Ko ia ‘oku ne lea ‘i ha lea kehe, ‘oku ne fai hono langa hake ‘o‘ona pē; ka ko ia ‘oku ne malanga palofisai, ‘oku ne langa hake ‘a e siasi.
5‘Oku ou ‘amusia ange ‘e au, ‘oku mou mafai kotoa pē ke lea‘aki ‘a e ngaahi lea kehe, kae lahi pē ke mou malanga palofisai: ‘ē, ‘oku lahi ‘a ia ‘oku malanga palofisai ‘iate ia ‘oku lea ‘i he ngaahi lea kehe, ‘o kapau ‘e ‘ikai te ne hiki ‘a e lea kae ma‘u tokoni ‘e he siasi. 6Pea ko eni, kāinga, kapau te u ‘alu atu, ‘o lea ‘i he ngaahi lea kehe, ko e hā haku ‘aonga kiate kimoutolu, ‘o kapau ‘e ‘ikai fou ‘eku lea ki he fakahā ‘o ha me‘a mei he ta‘ehāmai, pe ki he faka‘ilo ‘o ha me‘a loloto, pe ki ha malanga palofisai, pe ki ha akonaki?
7Ko e ngaahi me‘a ta‘e-ha-mo‘ui ‘a ia ‘oku ongo, pe ‘oku ‘alu ‘i he fa‘ahinga fangufangu, pe ko e ha‘ape; ka ‘o kapau ‘e ‘ikai tohelehele hono le‘o, ‘e ‘ilo fēfē ‘a e fasi ‘oku ifi pē ta? 8Kae‘uma‘ā kapau ‘oku ‘ikai mahino ‘a e lea ‘a e talupite, ko hai te ne teu ke fakahoko tau? 9Pehē foki mo kimoutolu ‘i he fai‘aki homou ‘elelo, kapau ‘oku ‘ikai te mou fai ha lea ‘oku ‘ilongofua, ‘e ‘ilo fēfē ‘a e me‘a ‘oku lau? ka ko ho‘omou lea ki he ‘atā pē. 10‘Oku fiha nai ‘a e fa‘ahinga lea ‘i māmani, pea tala‘ehai ‘oku ai ha taha ‘e ta‘e‘uhinga: 11ka ‘o kapau ‘oku ‘ikai te u ‘ilo ki he ‘uhinga ‘o e lea, te u hā kiate ia ‘oku lea ko e pāpeliane, pea ko ia ‘oku lea te ne hā ko ha pāpeliane kiate au. 12Pehē foki kimoutolu, he ko eni ‘oku mou kakapa ki he ngaahi faiva fakalaumālie, ko ia mou feinga ke mou hulu atu ai koe‘uhiā ke langa hake ai ‘a e siasi.
13Ko ia, ke ‘ilonga ‘a ia ‘oku mafai ke lea kehe, ke ne fai ‘ene hū ke hiki. 14He kapau te u hū ‘i ha lea kehe, ko hoku laumālie pē ‘oku hū, ka ‘oku ‘ikai ha fua mei hoku ‘atamai. 15Pea fēfē ai? ‘Ē, te te hū ‘aki hoto laumālie, pea te te hū ‘aki hoto ‘atamai foki te te hiva‘aki hoto laumālie, pea te te hiva‘aki hoto ‘atamai foki. 16He ko eni, kapau kuo fai ha fakafeta‘i, ‘aki ho laumālie pē, pea fēfē ai ‘a si‘i nofo fanongo, ha‘ane pehē ‘Ēmeni ki ho‘o fakamālō na? He ‘oku ‘ikai te ne ‘ilo ‘a e me‘a ‘oku ke lau. 17Seuke, ‘oku mālō pē ho‘o fakafeta‘i ‘au, ka ko Me‘a ē ‘oku ‘ikai hano tokoni mei ai.
18Fakafeta‘i ki he ‘Otua ‘oku lahi hake ‘iate kimoutolu kotoa pē ‘a ‘eku mafai ‘a‘aku ke lea ‘i he lea kehe. 19Ka ‘o kapau ko e lea ‘i ha fakataha, te u fili mu‘a ke fai ha kupu‘i lea ‘e nima pē ‘aki hoku ‘atamai, ‘a ia ‘e ongo foki ki ha ni‘ihi, ‘i ha‘ate fai ha kupu‘i lea ‘e mano ‘i ha lea kehe.
20Si‘i kāinga, ‘oua te mou hoko ko e kau tamaiki iiki ‘i he fakakaukau: ‘ē, ‘i he kovi ke mou hangē ha kau valevale, ka ‘i he fakakaukau ke mou fakamotu‘atangata. 21Kuo tohi ‘i he Lao,#‘Ais 28.11-12 ‘Oku folofola mai ‘a e ‘Eiki, ‘Io, te u fakafai ‘eku lea ki he kakai ni ‘i ha ni‘ihi ‘oku lea kehe, pea mo e ngaahi loungutu ‘o ha ngaahi fa‘ahinga kehe: ka na‘a mo ia ‘e ‘ikai te nau tokanga kiate au. 22‘Āua, kuo fokotu‘u ‘a e fai‘aki ‘a e ngaahi lea kehekehe ko e mana ke ongo ‘o ‘ikai ki he kakai lotu, ka ki he ta‘elotu: ka ko e malanga palofisai ke ongo, ‘o ‘ikai ki he kakai ta‘elotu, ka ki he lotu.
23Ko ia, ka kuo fakataha ‘a e siasi kātoa ki ha potu, pea nau lea kotoa pē ‘i he ngaahi lea kehe; pea hū mai ha kau fanongo pe, ha kau ta‘elotu, ‘ikai te nau pehē ‘oku mou sesele? 24Ka ‘o kapau ‘e malanga palofisai kotoa pē, pea hū mai ha toko taha ta‘elotu, pe ha taha ‘i he kau fanongo, te ne touia ‘i he fai ‘anautolu takitaha, ‘e ‘eke‘i ia ‘e he fai ‘anautolu takitaha. 25Ko e ngaahi me‘a fufū ‘o hono loto ‘e fu‘u e‘a, pea te ne toki fo‘ohifo ‘o hū ki he ‘Otua, mo fakahā atu, Tā ‘oku ‘iate kimoutolu mo‘oni ‘a e ‘Otua.
Ko e Ngaahi Feinga Lotú ke Maau
26Pea fēfē ai, kāinga? Ka ai ha‘amou fakataha, pea takitaha ha‘ane hiva, ha‘ane akonaki, ha‘ane me‘a mei he ta‘ehāmai, ha‘ane lea kehe, ha‘ane hiki lea–‘ē, ke fai kotoa pē ke ai ha langa hake. 27Kapau ko e pehē ke fai ha lea ‘i ha lea kehe, ke ngata pē ‘i ha toko ua pe tolu, pea fai fakalakanga, pea ke hiki lea ‘e ha toko taha. 28Pea kapau ‘oku ‘ikai ha hiki lea, pea ke ne longo pē ‘i he fakataha; ka ne lea kiate ia pē mo e ‘Otua. 29Pea ko e me‘a ki he kau malanga palofisai, tuku ke lea ha toko ua pe toko tolu, kae nofo ‘o sivi ‘e hono toe. 30Pea kapau ‘e fakahā ha me‘a mei he ta‘ehāmai ki ha taha ‘oku nofo, pea ke tuku ā ‘e he ‘uluaki. 31(He te mou lava ‘i he faifai taha ke malanga kotoa pē, ‘a ia ‘e ma‘u ai kotoa pē ha akonaki, pea ma‘u ai kotoa pē ha enginaki. 32Pea ko e ngaahi laumālie ‘o e kau palōfita ‘oku ala pule‘i ‘e he kau palōfita: 33he ko e ‘Otua ‘oku ‘ikai ko e fakatupu maveuveu, ka ko e fakatupu melino.) Ko e anga ia ‘oku fai‘aki ‘i he ngaahi siasi ‘o e kau Lotu.
34Ko e me‘a ki he kau fefine, ke nau longo pē ‘i he ngaahi fakataha; he ‘oku ‘ikai ngofua kiate kinautolu ke lea: kae tuku ke nau tali angi, ‘o hangē foki ko e lau ‘a e Lao. 35Pea kapau ‘oku ai ha me‘a ‘oku nau fie ‘ilo ki ai, ke nau toki fehu‘i ‘i ‘api ki honau husepāniti ‘onautolu: he ko e me‘a ta‘engali mo ha fefine ke lea ‘i ha fakataha.
36‘Io, ko kimoutolu koā na‘e fou mei ai ‘a e folofola ‘a e ‘Otua, pe ko kimoutolu pē kuo ne a‘u ki ai, ‘ō? 37Ka ai ha taha ‘oku ne pehē ko e palōfita ia, pe ko ha Laumālie‘ia, tuku ke ne fakamo‘oni ‘a e ngaahi me‘a kuo u tohi atu, ‘o pehē, ko e tu‘utu‘uni ia ‘a e ‘Eiki. 38Pea ka ai ha taha ‘oku ne ta‘e‘ilo ko ia, tā ‘oku ta‘e‘iloa ‘a ia.
39Ko ia, si‘oku kāinga, mou kakapa ki he malanga-palofisai, kae‘oua foki ‘e ta‘ofi ‘a e lea ‘i he lea kehe. 40Pea ko e me‘a kotoa pē ke fai ke taau mo maau.
Currently Selected:
Kolinitō 1 14: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
