Proverbios 19
19
1Aints kuikiartichu ayat, anangmichuka nekas pengkeraitai. Antsu netse aints chikich aints ainaun tsanumak puja nuka nekas paseetai. 2Aints nuimiarchauka waurak takatrin wári umistas wakerakka,
nukap nuwaktinuitai.
3Aints ainau ningki wakerinak pase pujuinauka Apu Yusen wiasmatkatin— ainawai.
4Kuikiartinu amikingkia untsuri ainawai. Tura kuikiartichu amikringka niin ajapawar ukukiartinuitai.
5Aints nekas aa nuna nekayat, anangkak chicham nekaschaun etsera nuka ni wait wajaktintrin
nekas jukitnuitai. Tura waitrin ainauka angkanka pujuschartinuitai. #Prov 19.9
6Aints tsangka nuna aints untsuri eainawai. Tura tsangkamin asamtai,
aints ainau mash ni amikri wajasartas wakerinawai.
7Aints kuikiartichun ni yachii ainauka jiitnasha nakitinawai. Tura asaramtai ¿ni amikri ainausha iturak niin ajapawar ukukcharting? Tura yainkata tusa untsukmasha mash ukukmiausha ¿yáki yainkat?
8Aints pengker nintimniuka nangkamikia anenmamakapujatsui. Antsu nintip wajastaj tusa, nukap nuimiaru asa, nekas pengker pujustinuitai.
9Aints nekas aa nuna nekayat, chicham nekaschaun anangkak etsera nuka
ni wait wajaktintrin nekas jukitnuitai. Turasha waitrinka nekas jakatnuitai.
10Aints nintinchauka kuikian tura warinchuchin nukap achik nuna inakmaschatnuitai.
¿Tura aintsu inatirisha iturak apu ainaun iniartinuita?
11Aints paan nintimniuka wárikia kajekchatnuitai. Tura chikich aints ainau
niin pachisar pase chichainamtai, ningki titi tusa pachischatnuitai.
12Aintsu apuri kajetiri juun yawaa kajeawa nunisketai.
Tura ni wait anengkratairi sana chirichrinam tepawa nunisketai.
13Uchi nintinchauka aparin wake mesemtikui. Tura nuwa katsekmin
kichkitiat itit awajkartinua nunisketai.
14Uchirtin ainauka ni uchirin jeancha, tura kuikiancha susartin ainawai. Antsu nuwa pengker nintinniuka Yusnumiayaintai.
15Aints nakia nuka aya kanú tepestas wakerawai. Tura aints takakmichuka tsukajai waitjaktinuitai.
16Aints umiktin chichaman Apu Yus akupkamia nuna umirak pujakka,
wikia itur pujaja tusa wainkatnuitai. Antsu nuna umirtan nakitniuka jakatnuitai.
17Aints kuikiartichun waring achat susatata nuka Apu Yusen ikiastinuitai.
Tura asamtai Apu Yus ni ikiasmaurin awangtuktinuitai.
18Uchiram anturtamchamtaikia chicharkata. Tura mesrai tu nintaimsam waurtsuk turata.
19Aints nukap kajeunka ni wait wajaktintrin susatnuitai.
Nu turachmaka nuna nangkamasang pase wajastinuitai.
20Aints ainau amin chichartaminamtaikia umirkata. Turasha nuitaminamtaikia
pengker anturkata. Nu turakmeka ukunam paan nintimin atinuitme.
21Aints ainau ningki wakerinak: Wikia nuna turatatjai tusar nukap nintimsar pujuinawai.
Antsu Apu Yus ningki wakerak: Tu ati tusa tsangkatkatnuitai.
22Aints ainau wait anengkratin arti tusar timiá wakeruktinuitai.
Turasha anangkartin wajatsuk kuikiartichu wajastinka nekas pengkeraitai.
23Apu Yusen umirinak pujuinauka tuke iwiaaku pujusartin ainawai. Tura asar
aints tu pujuinauka pengker nintimsar pujusar iturkachminaka waintsuk ayamsartin ainawai.
24Aints nakia nuka tachaun achiayat, yutairin yuatniunka pachis: Nuka takataintai tawai.
25Wishiikiartiniun awatraramtai, nintinchau ainauka nuna jiisar: Winasha turutawarai tusar nuimiarartinuitai. Tura paan nintimin ainauka aya chicharam nuimiarartinuitai.
26Aints ni apariniun kasamak puja nuka tura ni nukurin ni jeenian jiiki akupkauka
nekas paseetai, turasha natsanpiakuitai.
27Uchiru, wi chicharkartamur antutsuk pujakmeka, nekatai chichamka nuimiarchatnuitme.
28Aints waitrina nuka wait chichaman etserin asa, chichaman nekamtikniunka anangkatnuitai.
Tura pase nintiniuka aya pase chichamnak chichaawai.
29Wishiikiartin ainaun tura nintinchau ainauncha antukarat tusar awatrartinuitai.
Currently Selected:
Proverbios 19: acu
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
