Proverbios 13
13
1Uchi nintimuka ni apari chicharam antuktinuitai.
Antsu wishikiartinka chikich aints chicharmasha pachiatsui.
2Pengker chichamtin ainauka ni chichaamurijai metek pengker aa nuna wainkartin ainawai.
Antsu chikich ainaun anangkinauka aya mangkartutnak nintiminawai.
3Tunau chichamnaka nakitajai tinauka pengker awajmaminawai. Antsu aints
nintimtsuk nukap chichainauka, ningki mesmamrartin ainawai.
4Nakia nuka aya wakeru pujuwitai. Antsu asumpia nuka takakmak pujau asa,
yuumatsuk pujawai.
5Aints waitrichuka wait chichaman nakitnuitai. Tura pase aintsnaka chikich
aints ainau nakitinau asaramtai, nuka natsanpiaku pujuwitai.
6Pengker nintintin pase turatniunka nakitau asa, angkan pujuwitai.
Antsu pase aintsnaka ni tunaaringkia mesratnuitai.
7Aints kuikiartichu irunuka kuikiartinua tumau pujuinawai. Tura chikich aints ainau
kuikiartichua tumau pujuinayat, kuikiartin ainawai.
8Kuikiartinun ni kuikiari ayamruktinuitai. Tura kuikiartichu ainau kuikiari
atsau asamtai, itit awajsacham pujuinawai.
9Yusen umirinauka namparing kapaawa nunisarang ainawai.
Antsu pase aintska namparing keemakmaitiat wári kajinua tumawaitai.
10Wikia miajuitjai tumamaina nuka aya maanitan chichau ainawai. Antsu
paan nintimtikiartin ainauka chikich aintsu chichamen anturin ainawai.
11Anangkartinu kuikiari wári mengkawai. Antsu aints tuke takakmak,
kuikiarin japtsuk yaitas irumrawa nuka ukunam kuikiartin wajasminuitai.
12Aints ni nakamurin wári wainchakka wake mesek pujuwitai.
Antsu aints ni nakamurin wankangka nukap waraawai.
13Aints chichaman umitan nakitakka, ningki wait wajaktinnun jukitnuitai.
Antsu aints chichaman antuk umiakka, pengkeran wainkatnuitai.
14Aints pengker nintintinu nuikiartamun antuk umiakka, tuke iwiaaku pujustinun wainkatnuitai.
Kame, jinta tuke jakatniunam jeatnua nuna amatsuk angkan wekasatnuitai.
15Aints chikich aintsjai pengker chichasar pujuinauka mai metek pengker nintimtunisar
pujuinawai. Antsu anangkartin ainauka itiurkachminnum wenawai.
16Nintipka ni nekaamurijai takakmawai. Antsu aints nintinchauka
ni nintimchau takaamurin paan wainmamtikui.
17Pase aints chicham akupkamun tenap etserchauka itiurkachminnum jeatnuitai. Antsu chichaman umiuka
chicham akupkamun tenap etseruka chikich ainaun pengker nintimtikratnuitai.
18Aints chicharmasha antichuka kuikiartichu asa, natsanpiaku pujuwitai. Antsu chikich aints chicharkam antukamtikia, aints ainauka: Nekas pengker aintsuitai tusar nintiminawai.
19Aints ningki nintimias: Nuna turatasan wakerajai tusa, nuna mash umik warastinuitai.
Tura nintimchau ainauka ni pase turutirin inaitan arantak nakitinawai.
20Aints nekau ainaujai tsanias pujauka nekau aints wajastinuitai.
Antsu netse ainaujai tsanias puja nuka wait wajaktinuitai.
21Tunaarintin ainauka pase pujusartin ainawai.
Antsu Yusen umirkaru ainauka pengker pujusartin ainawai.
22Aints Yusen umirin jakauka, wariri ainaun ni tirangki jukiarti tusa ukuktinuitai.
Tura pase aints kuikiartin jakauka, wariri ainaun chichaman umiu jukiarti tusa ukuktinuitai.
23Kuikiartichu ajarin árak ainau untsuri tsapainawai.
Antsu tunau nekamin atsau asamtai, kuikiarin pachitsuk atankiartin ainawai.
24Aints ni uchirin chichartsuk pujakka, uchirin aneatsui.
Antsu uchirin aneakka, pengker pujusti tusa chicharkatnuitai. #Heb 12.7, 8
25Aints tunaun turachuka ni yutairin wakerak pachitsuk yuawai.
Antsu pase nintiniuka ni yutairin tunau nintimias yuak tutuarchamnawaitai.
Currently Selected:
Proverbios 13: acu
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
