Kene 5
5
Ma̱giri ma̱ ɓa̱yuwa̱i katagarda
1Ili i na me enei kpamu a tsalatani tsu va̱ i ɗaɗa vuza a̱ ida̱shi a kakuba ko tsu tsugono ɗa wi uka̱ni kpamu n katagarda ka na ki an kepepa ku ugaɗi ka na ki n iɗani punu a ukambu dem.#5:1 Katagarda ka na a yaꞋin n ukpan: N ayin a cau a ci yaꞋan ta̱ atagarda ugaɗi ka̱ta̱ a̱ ka̱ta̱la̱ an kajiba amma m macaka e mere. Ɗa Ka̱shile ka̱ ka̱ta̱la̱i kaꞋa mayin ɗa u paɗarai kaꞋa kpan-kpaꞋan n urotu u ka̱ta̱mba̱ri† u cirupa̱ u cindere.#5:1 N ayin a cau a tsu paɗara ta̱ katagarda ka akaka n “makangulu” ka̱ta̱ a zuwa urotu adama a na o yotsongu ko ka yayi. A̱ ɓa̱yuwa̱ baci kaꞋa, makangulu ma mi ta̱ o kuɓoso babu vuza na u kufuɗa kuɓa̱ya̱ngu ka̱ta̱ u bono adanshi ka̱ta̱ a saꞋwa kuɓa̱yuwa̱ kaꞋa ba. Vuza vi ili ɗa koci wi n utsura u kuɓoso makangulu ma nan lo. 2Ɗa me enei kalingata ku utsura, vuza na u salai n ka̱la̱ka̱tsu ku utsura: “Yayi u yawai a na wa kulukpa urotu u cirupa̱ u katagarda ka nam pa ka̱ta̱ u ɓa̱yuwa̱ kaꞋa?” 3Amma babu vuza gaɗi ko a aduniyan ko ɗaka vi iɗika i nam pa vu na u yawai u ɓa̱yuwa̱ kaꞋa ka̱ta̱ u kece kaꞋa.
4Ɗa n shika̱i ka̱u, adama a na vuza u yawa u ɓa̱yuwa̱ ka̱ta̱ u kece kaꞋa ba. 5Ɗaɗa mokoshi ma̱ gba̱ra̱† mo yoku ma danai mu, “Ka̱sa̱kpa̱ ma̱shi! Inda, vuza wi ta̱ lo vu na u lyaꞋi ɗe utsura. E ci ɗeke yi ta̱ Kawu, mogono ma gbayin mu umaci u Yahuza.† A̱yi ɗa matsukaya mo Mogono Dawuda. A̱yi ɗa vuza na u kufuɗa wa kulukpa urotu u cirupa̱ u cindere wa ka̱ta̱ u ɓa̱yuwa̱ katagarda ka.”
6Ɗa me enei Ma̱giri a kashani ɗevu n kakuba ko tsugono ka, ili i wuma i na̱shi nu nkoshi m gba̱ra̱-gba̱ra̱ ma n kanzai ni. Ikyamba i ni yi ta̱ n usa̱n adanshi uma a una yi ta̱ tsa alyuka. Wi ta̱ n avana e cindere n a̱shi e cindere, ɗaɗa ayinviki e cindere a na Ka̱shile ka̱ suki a ukambu dem wa aduniyan. 7Ɗaɗa Ma̱giri ma banai ma ɗikai katagarda ka na vuza na wi ida̱shi a kakuba ka wi a̱ kuɓa̱na̱ e kukiye ku usingai ku ni. 8Ana wi a kuyaꞋan nannai, ili i wuma i na̱shi ya nu nkoshi m gba̱ra̱-gba̱ra̱ kamanga n na̱shi a lyaꞋi kayala wa̱ ni. Yaba dem a̱ ubuta̱ u nan lo u ka̱na̱i umolu n kakpanu ka na a̱ luwa̱i n azanariya. Kakpanu ka ki ta̱ tukpa n ili i ma̱gula̱ni† i na yi kavasa ka uma a na a ci yaꞋanka Ka̱shile tsugbashi. 9Ra̱ka̱ vi le a canana ta̱ vishipa vu savu vu nam pa:
“Vi yawa ta̱ vi ɗika katagarda ka
ka̱ta̱ vu kulukpa urotu u cirupa̱ u ni ka̱ta̱ vu ɓa̱yuwa̱ u ɗa.
Ili i na i zuwai i ɗaɗa uma a una wu ta̱,
ɗa mpasa n nu mo okpoi katsupu
a na vu uta̱ka̱i uma a iɗika dem, n umaci, n elentsu, n ka̱tsura̱ feu,
ɗa gogo na o okpoi uma a̱ Ka̱shile.
10Vu zuwa le ta̱ o okpo umaci u ni
aza a na i anan ganu vu na a kucikpa Ka̱shile.
Ele kpamu i ta̱ a kulyaꞋa tsugono tsa aduniyan.”
11Ɗa n la̱na̱i kpamu, ɗa m panai alingata a ishipa. Ele i ta̱ mbana mbana n a̱bunda̱i ka̱u. A kanzai kakuba ko tsugono ka n ili wuma nu nkoshi m gba̱ra̱-gba̱ra̱ ma. 12Ɗa a yaꞋin vishipa n ka̱la̱ka̱tsu ka̱u:
“Ci cikpai Ma̱giri ma na a unai va,
adama a utsura u gbayin,
n uciyi, n kuyeve, n katsura ka̱ ni.
Wi isa tsugbayin n tsugono n a̱bunda̱i!”
13Ɗaɗa n panai ili i wuma dem a kuyaꞋan vishipa, ili i na yi gaɗi, n aduniyan, n ɗaka vi iɗika, m mala. Vishipa vi le vu ɗa na:
“Vuza na wi ida̱shi a kakuba koɓolo m Ma̱giri ma
i ta̱ n tsugbayin ka̱u, n kucikpa, n utsura n tsugono tsu ayin a babu uteku.”
14Ɗa ili i wuma i na̱shi ya yu ushuki, “Ta nannai.” Ɗa nkoshi m gba̱ra̱-gba̱ra̱ ma n kuɗa̱ngi ɗa a cikpai ni.
Currently Selected:
Kene 5: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
