Kene 6

Ma̱giri ma kulukpai urotu u cirupa̱

1Ɗaɗa me enei Ma̱giri ma kulukpai urotu u cirupa̱ u iyain a̱ ka̱tsuma̱ ku u cindere, ɗa m panai ili i wuma i te a̱ ka̱tsuma̱ ki ili i na̱shi i nan lo a kudana n ka̱la̱ka̱tsu gba̱ra̱ an kakpanga, “Ta̱wa̱!” 2Mi indanai, ɗa me enei kodoku ka̱ a̱ri. Vuza na u kumbai kaꞋa a̱ kuɓa̱na̱ utan, ɗa wi isai oroliko o tsugono. Wu uta̱i pulai an vuza na u lyaꞋi ɗe kuvon n a̱bunda̱i, ɗa kpamu wi o kudoku kulyaꞋa.

3Ɗa Ma̱giri ma kulukpai urotu u cirupa̱ u i re, ɗa m panai ili i wuma i ire i danai, “Ta̱wa̱!” 4Ɗaɗa kodoku ko yoku ka na ki ushili tsa akina ku uta̱i. Vuza na u kumbai kaꞋa ɗa wi isai utsura u na u kuzuwa uma a yaꞋan vishili uteku u le punu na aduniyan, adama a na a unanai a̱ ubuta̱ u kuvon. Kakumbi ka ka isai kotokobi ka gbayin.

5Ɗa Ma̱giri ma kulukpai urotu u cirupa̱ u tatsu. Ɗa m panai ili i wuma i tatsu i danai, “Ta̱wa̱!” Mi indai, ɗa me enei kodoku ka̱ lima̱. Vuza na u kumbai kaꞋa u ɓa̱na̱i ili i kugisanku a̱miki e kukiye ku ni. 6Ɗa m panai ili yu ura̱i an ka̱la̱ka̱tsu a̱ kuta̱wa̱ punu e mere mi ili i wuma i na̱shi ya. Ka̱la̱ka̱tsu ka danai, “Ikebe#6:6 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. i na vuza u kuciya̱ u liva̱ baci ulinga i ɗa a kutsupa kakpanu ke te ko ki itabi.† Ta kpamu a tsu tsupa kakpanu kutatsu ki ilya nannai. Ka̱ta̱ vu la̱nga̱sa̱ maniꞋin ko ma̱kya̱n† ma ba!”

7Ɗa Ma̱giri ma kulukpai urotu u cirupa̱ u na̱shi. Ɗa m panai ili i wuma i na̱shi i danai, “Ta̱wa̱!” 8Mi indai ɗa me enei kodoku kparasha. Vuza na wi ukumbi a kaꞋa wi ta̱ n kula Ukpa̱, ɗa ili i wuma i yoku yi n kula Ubuta̱ wu Ukpisa̱ o kutono ɗevu n a̱yi. Ka̱shile ke pecei aduniyan ali ugboku u na̱shi. Ukpa̱ n Ubuta̱ wu Ukpisa̱ wi isai utsura adama a na wu una ugboku u te a̱ ka̱tsuma̱ ku ugboku u na̱shi n kuvon, n kambulu, m ma̱dukpa̱ kakau, nu nnama n kakamba.

9Ɗa Ma̱giri ma kulukpai urotu u cirupa̱ u tawun. Ɗa me enei a̱kpisa̱ o yoku lo a̱ kumiꞋi ku katalikalyuka. Uma a nan lo a ele ɗa aza a na irala i le yu unai adama a na a dansa ta̱ ukuna u kadanshi ka̱ Ka̱shile mayun. 10A̱kpisa̱ a nam pa o orukpoi n ka̱la̱ka̱tsu ka̱u a danai, “Ka̱shile MalaꞋimili, vi ta̱ ciɗa m mayun kpamu! Tsu folono wu ta̱, ka̱ta̱ vi shamgba kula̱nga̱sa̱ ayin ba, yaꞋanka uma a aduniyan a na a unai tsu afada n atakaci.” 11Ka̱shile ke nekei a̱kpisa̱ a dem aminya a̱ a̱ri ɗa u danai le ka̱ta̱ e reme a̱ɗu kpamu ayin kenu. A yaꞋan ili i nam pa ali sai ayin a na irala i le i nan lo yu unai itoku i le agbashi ra̱ka̱ n aza e le tsu na a unai le, ali a shatangu ka̱bunda̱i ka na Ka̱shile ka zuwai.

12Ɗa Ma̱giri ma kulukpai urotu u cirupa̱ u ta̱li. Ɗa iɗika i gba̱ɗa̱i n utsura. Ɗa kanna ka̱ kpa̱ɗa̱i kudoku ka akana, ɗa ka̱yimbi ka̱ kimba̱i a̱ ubuta̱ dem. Ɗa kpamu wotoi u bonoi ushili an mpasa. 13Azangata a̱ uta̱i gaɗi ɗa a̱ yikpa̱i a iɗika tsa agbawa a̱ ma̱biri a ayin a na baci wunla̱i u gba̱ɗa̱sa̱i maɗanga ma. 14Gaɗi u puwa̱nka̱i tsu na a̱ tsu ka̱ta̱la̱ kajiba ka̱ta̱ a lazaka. Nsasan n wawaꞋa nu m gbagbaꞋin dem n otogu a yaꞋansakai adama uteku u na iɗika i gba̱ɗa̱i.

15Ɗaɗa uma ra̱ka̱ ali nu ngono, a̱ ka̱na̱i kusokongu ka̱ci ke le a aɓatsu ko e mere ma atali a gbagbaꞋin a na i a kusan kakau. Uma a nam pa a feu a̱ ka̱na̱i kusokongu: aza a̱ gba̱ra̱-gba̱ra̱ o tsugono, anan kovonshi,† aza a ikebe, aza a utsura, n uma o yoku a na a buwai ra̱ka̱, ko agbashi ko aza a na i agbashi ba. 16E ɗekei nsasan n akpanlai, a danai, “Tsu folono ɗa̱ ta̱, yikpa̱i ka̱ta̱ i pala tsu adama a na vuza na wi ida̱shi a kakuba ko tsugono tsa wa̱ kukpa̱ɗa̱ kene tsu, Ma̱giri ma feu wa kufuɗa we neke tsu atakaci ba. 17Mayun ɗa a Kanna ka na Ka̱shile m Ma̱giri e kuneke uma atakaci a yawa baci, babu vuza na u kulaꞋa a kanna ka atakaci ka nan lo.”

Currently Selected:

Kene 6: asgNT

Highlight

Copy

Compare