Kene 1

Yahaya u yaꞋin kadanshi ka katagarda ka nam pa

1Na va ɗaɗa ili i na Ka̱shile ko yotsongi Vuzagbayin Yesu Kirisiti, adama a na u dana agbashi a̱ ni ili i na Ka̱shile ka kuzuwa i yaꞋan, babu megeshe. Ɗa Yesu u suki kalingata ka̱ ni u yotsongu kagbashi ka̱ ni Yahaya. 2Ɗa Yahaya u danai ili ra̱ka̱ i na we enei adama a akaka a̱ Ka̱shile n ukuna u na Yesu Kirisiti u dansai ɗa u yaꞋin kpamu. 3Ka̱shile ki ta̱ a kuzuwaka yaba dem vu na u kecekei aza o yoku kadanshi ka akaka a nam pa a una̱singai, ka̱ta̱ kpamu u zuwaka yaba dem vu na u panai una̱singai ɗa u tonoi kaꞋa. Ayin a buwa m megeshe ba ana ili i nam pa ya̱ gita̱.

Yahaya u kya̱sa̱i a̱Ꞌisa̱ a aza o Kutoni e cindere

4Akaka a na Yahaya u ɗanakai a̱Ꞌisa̱ a aza o Kutoni e cindere a Asiya#1:4 “Asiya” punu a iɗika i Roma uɓon u ni u yoku u ɗa gogo na uɓon u Tokuyo. a ɗa na:

N vasa ta̱ Ka̱shile ko yotsongu ɗa̱ kasingai ka̱ ni m ma̱ta̱na̱. Ka̱shile ka na ki ali n ugiti, n gogo na, n vuza na kpamu wi lo a̱ kuta̱wa̱. Ayinviki e cindere a̱ Ka̱shile feu a na i e kelime ka kakuba ko tsugono i ta̱ a kuyaꞋanka ɗa̱ nannai. 5Yesu Kirisiti kpamu, vuza na wi ngan mi ili i mayun adama ka mayun ka̱ Ka̱shile. A̱yi ɗa feu vuza vi iyain vu na u ɗenga̱i a kasaun. A̱yi ɗa vuza na u ci lyaꞋa tsugono tsu ngono ma aduniyan.

A̱yi ɗa vuza na u cigai tsu, n vuza na u zuwai ɗa tsu laꞋakai a̱ ubuta̱ wu utsura wu unushi u tsu ana u tsuwa̱in mpasa n ni ɗa u kuwa̱i adama a̱ tsu. 6Adama a nan lo ɗa tso okpoi umaci u anan ganu vi ni aza a na a kucikpa Ka̱shile Esheku a̱ ni. Ka̱sa̱kpa̱ Yesu Kirisiti u ciya̱ tsugbayin n utsura ko wanai! Ta nannai.

7Indai, wi ta̱ lo a̱ kuta̱wa̱ zuva ve eleshu!

Yaba dem wi ta̱ e kene yi, ali n aza na a zuwai a sapa yi m masara.

Umaci wa aduniyan ra̱ka̱ kpamu wi ta̱ a̱ kushika̱ ka̱u adama a̱ ni.

E, ta ki o kokpo nannai! Ta nannai.

8Vuzavaguɗu Ka̱shile u danai, “Mpa ɗa Alfa n Omega.† Ɗaɗa feu, mpa ɗa Ugiti n Ukocishi. Ka̱shile ka na ki ali n ugiti, n gogo na, n vuza na kpamu wi lo a̱ kuta̱wa̱. Mpa ɗa Ka̱shile MalaꞋimili.”

Kene ku Yahaya adama e Yesu

9Mpa ɗa Yahaya, mpa ɗa toku ɗa̱ a̱ ubuta̱ wu uneki u ka̱ɗu n Kirisiti, a takacika mu ta̱ kpamu tsu ɗa̱. Mi ta̱ a̱ ka̱tsuma̱ ku uye u Ka̱shile tsu ɗa̱, mayun ɗa kpamu n lulukpa̱ n atakaci a̱ va̱ tsu na yi a̱ kululukpa̱. A banka mu ta̱ o kotogu ka Patamosu ɗa a̱ ka̱sa̱kpa̱i mu ɗe adama a na n dana ta̱ kadanshi ka̱ Ka̱shile n ili i mayun i na Yesu u yotsongi. 10A kanna ka Vuzavaguɗu, Ayinviki a̱ Ka̱shile† a shanai punu a̱ ka̱ɗu ka̱ va̱, ɗa m panai ka̱la̱ka̱tsu ka gbayin an kavana ka na ko orukpoi a̱ kucina̱ ku va̱. 11Ɗa ka̱la̱ka̱tsu ka ka danai, “Ɗana punu a katagarda ili i na ve enei ka̱ta̱ vu suꞋuku kaꞋa a̱ a̱Ꞌisa̱ a aza o Kutoni e cindere a na i punu a̱ likuci i cindere i nam pa: Afisu, n Simina, m Birigama, n Tayatira, n Sadisu, n Filadafiya, n Ladukiya.”

12M kpatalai adama a na me ene vuza na wi a kadanshi nu mpa, ɗa me enei ashamkpatsu a̱ nkuni e cindere a na a yaꞋin n azanariya. 13E mere ma ashamkpatsu a vuza u shamgbai punu kashani an vuma. U ukai kuminya ku gbayin ali sai e ene, koɓolo n kakashi ka kuminya ka azanariya ulapangi a̱ ma̱ka̱nga̱ ma̱ ni. 14Ka̱nji ka̱ ni wa̱ri pushe-pushe an tsugbere, n a̱shi kpamu a kutasa tsa akina. 15Ene a̱ ni a kutasa an viyum vi shili vu na o gboroi. Ka̱la̱ka̱tsu ka̱ ni ki ta̱ n kacaꞋa an mini ma na me ci yene n kurara. 16U ɓa̱na̱i azangata e cindere e kukiye ku usingai ku ni, koɓolo n kotokobi ka na e temgbei una̱ u re dem alyu a̱ kuta̱ a̱ una̱ u ni. A̱shi a̱ ni a kutasa ka̱u uteku u na kanna ka tsu tasa ka yawa baci a kaci.

17Ana me enei ni, ɗa n yikpa̱i ma̱kpa̱ɓa̱ n za̱lika̱i bini. U kiyangi kukiye ku usingai ku ni wa̱ va̱ ɗa u danai, “Ka̱ta̱ vu pana wovon ba. Mpa ɗa Ugiti n Ukocishi. 18Mpa ɗa vuza na u ci neke wuma. Mi ishi ta̱ n kuwa̱, amma gogo na mi ta̱ wuma u babu uteku. Mi ta̱ n agbaguratsu a na e nekei mu utsura m ɓa̱yuwa̱ ko m ɓa̱ya̱ngu ubuta̱ u na a̱kpisa̱ i, ka̱ta̱ m bonoko le n wuma kpamu.

19“Ɗana a katagarda ili i na vi e kene gogo na ra̱ka̱, koɓolo n ili i na i kuta̱wa̱ na kelime. 20Na va ɗaɗa kadanshi ku usokongi ka azangata e cindere a na ve enei e kukiye ku usingai ku va̱, koɓolo n ashamkpatsu a̱ nkuni a azanariya e cindere a: Ashamkpatsu e cindere a ɗaɗa a̱Ꞌisa̱ a aza o Kutoni e cindere, azangata e cindere tamkpamu a ɗaɗa alingata a na a kinda a̱Ꞌisa̱ a aza o Kutoni e cindere a.”

Currently Selected:

Kene 1: asgNT

Highlight

Copy

Compare