Kene 16

Akpanu a wupa u Ka̱shile

1Ɗaɗa m panai ka̱la̱ka̱tsu ka̱u a̱ A̱Ꞌisa̱ a Gbayin a kudana alingata e cindere a, “Banai i tsuwa̱n akpanu e cindere a wupa u Ka̱shile a aduniyan.” 2Kalingata ka iyain ka banai ɗa ka̱ tsuwa̱in a aduniyan ili i na yi punu a kakpanu ka̱ ni. Ajakata a gbani-gbani a na i nu mɓa̱la̱ a̱ ka̱na̱i uma a na i n urotu u ka̱di wa, ɗa kpamu a cikpai ka̱ma̱li ka̱ ni.

3Kalingata ke ire ka̱ tsuwa̱in ili i na yi punu a kakpanu ka̱ ni a mala, ɗa mini ma mo okpoi ana mpasa n vuza na u kuwa̱i, ɗaɗa ili i wuma i na yi punu a̱ mala ma dem i kuwa̱i.

4Ɗa kalingata ka tatsu ka̱ tsuwa̱in ili i na yi a kakpanu ka̱ ni o nɗolu koɓolo n a̱shi a̱ mini, ɗa o bonoi tsu mpasa. 5Ɗa m panai kalingata ka na ki a̱ kula̱na̱ mini ka danai,

“Avu ɗa Ka̱shile ka Ciɗa.

Avu ɗa Ka̱shile ka na ki n wuma gogo na n ayin a ɗe!

U gaꞋan ta̱ vi yaꞋanka aduniyan afada tsu nam pa.

6Uma a gbani-gbani a̱ tsuwa̱n ta̱ mpasa n uma a̱ nu n eneki a̱ nu.

Adama a nannai vi nekei le mpasa o soꞋo.

I ta̱ a̱ kuciya̱ ili i na i gaꞋin a̱ ciya̱!”

7Ɗa m panai ka̱la̱ka̱tsu ka̱ uta̱i a̱ ubuta̱ u katalikalyuka a kudana:

“E, Vuzavaguɗu Ka̱shile MalaꞋimili,

tsu na vu ci neke uma a gbani-gbani atakaci mayun ɗa n derere kpamu.”

8Ɗaɗa kpamu kalingata ka̱ na̱shi ka̱ tsuwa̱in kakpanu ka̱ ni a kanna, ɗa u ka̱sa̱kpa̱i kanna ka̱ kpa̱ra̱i uma a aduniyan n usuɗukpi u ni. 9Ɗa usuɗukpi wa̱ a̱bunda̱i wa u bakulai yaba dem, ɗa a shikai kula ku Ka̱shile, vuza na u suki ndukpa̱ n nan lo ra̱ka̱. Amma a iwain kuka̱sa̱kpa̱ unushi u le koɓolo n kucikpa tsugbayin tsu Ka̱shile.

10-11Kalingata ka tawun ka̱ tsuwa̱in kakpanu ka̱ ni a kakuba ko tsugono ka̱ ka̱di ka, ɗa iɗika i na wi a kulyaꞋa tsugono tsa yo okpoi n ka̱yimbi. Uma a̱ ka̱na̱i kuluma a̱jivu e le n a kapatsai adama a ajakata a na i n a ɗa va, mɓa̱la̱ n le ma n laꞋa ta̱ kadanshi. Amma a yaꞋankai Ka̱shile ka zuva una̱ u gbani-gbani ɗa a̱ kpa̱ɗa̱i kuka̱sa̱kpa̱ kuyaꞋan ku unushi.

12Kalingata ka̱ ta̱li ka̱ tsuwa̱in ili i na yi punu a kakpanu ka̱ ni e kuyene ku gbayin ku Yufiriti adama a na mini ma na mi punu me ɗekpe gbende. Ili i nan lo i yaꞋan baci, ka̱ta̱ ngono n kasana n ciya̱ ubuta̱ u na a uwa n osoji e le. 13Ɗa me enei wunla̱i u gbani-gbani u tatsu tso opoɗo a̱ kuta̱ a̱ una̱ u vungu va, una̱ u ka̱di ka iyain, koɓolo n una̱ u ka̱di ke ire, vuza na wi keneki ka aꞋuwa. 14Wunla̱i u gbani-gbani† u nam pa wi ta̱ n utsura u na a kuyaꞋan ili i mereve. A banai wu ngono dem ma aduniyan, u ɓolongi le a yaꞋan kuvon n Ka̱shile MalaꞋimili a kanna ka gbayin ka na u kuyaꞋanka uma afada.

15Vuzavaguɗu u danai, “Zukai mayin! Mi ta̱ lo a̱ kuta̱wa̱ tsu na koboki ka̱ tsu ta̱wa̱ babu uyevi. Ka̱shile ki ta̱ a kuzuwaka vuza na u foɓusoi ntogu n ni a kuvana mayin una̱singai, adama a na u wala a̱ ubuta̱ u uma babu vuza kene ciyampa ci ni ka̱ta̱ wo okpo n wono.”

16Ɗaɗa wunla̱i u gbani-gbani wa u ɓolongi ngono ma a̱ ubuta̱ u te u na e ci ɗeke Aramagedon n Ciyahuda.

17Ɗa kalingata ke cindere ka̱ tsuwa̱in ili i na yi punu a kakpanu ka̱ ni na ɗe zuva. Ka̱shile ka yaꞋin kadanshi n ka̱la̱ka̱tsu ka̱u a kakuba ko tsugono ka̱ ni a̱ A̱Ꞌisa̱ a Gbayin, u danai, “N kotso ta̱ ili ra̱ka̱.” 18Ɗa ulaɗi u ka̱na̱i kuyaꞋan maru-maru n cigiriwi n kacaꞋa ka akpanga, n kugba̱ɗa̱ ki iɗika n utsura ali u laꞋi uteku u na iɗika yi ishi i tsu gba̱ɗa̱ a ayin a na uma i a aduniyan. 19Kugba̱ɗa̱ ki iɗika ka ku ɓatsai likuci i gbayin i Babila yo okpoi ugboku u tatsu. Likuci i yoku n a̱bunda̱i punu a aduniyan yo okpoi agali gbende-gbende. Ka̱shile ka ciɓai n unushi u Babila ra̱ka̱, ɗa u gutsakai ni u soꞋo ma̱kya̱n punu a mataꞋan ma na wupa u gbagbaꞋin u ni wi. 20Ana iɗika i gba̱ɗa̱i nannai, ɗa otogu nu nsasan dem n niꞋwa̱in. 21Mini ma atali a gbagbaꞋin a̱ ka̱na̱i kuvara uma. Katali dem ki ta̱ n a̱miki a na a yawai mudu amangatawun.#16:21 A̱miki a katali ka̱ mini dem a laza ta̱ a̱miki a̱ ka̱bufu ka̱ ka̱didi. Amma adama a na Ka̱shile ke neke le ta̱ atakaci n a̱bunda̱i ana u tsuwa̱nka̱i le mini ma atali, ɗa a yaꞋankai ni una̱ u gbani-gbani.

Currently Selected:

Kene 16: asgNT

Highlight

Copy

Compare