Kene 17

Kashakanlai n ka̱di

1Ɗa vuza te a̱ ka̱tsuma̱ ka alingata e cindere a na i n akpanu e cindere a u ta̱wa̱i wa̱ va̱ ɗa u danai, “Ta̱wa̱ ka̱ta̱ n yotsonku wu uteku u na a kutakacika kashakanlai ka na yaba dem u yevei, na va ɗaɗa likuci i gbayin i na a maꞋi ɗevu nu nɗolu ma̱ a̱bunda̱i. 2Ngono ma aduniyan n yaꞋan ta̱ tsugbani n a̱yi, ulinga u wono u ni kpamu wi ta̱ an ma̱kya̱n ma na ma makai yaba dem a aduniyan.”

3A̱ ubuta̱ u kene kpamu Ayinviki a zuwai me enei, ɗa kalingata ka ɗikai mu a kubana a kakamba. Ta ɗe me enei vuka a̱ ida̱shi gaɗi vu ka̱di ka shili ka̱ɗa̱ɗa̱. A ɗana ta̱ ɗe ili yi ishikushi i Ka̱shile a ikyamba i ka̱di ya ra̱ka̱, wi ta̱ kpamu n aci e cindere n avana kupa. 4Vuka va vu ukai ntogu n tsugono n na mi n ulima̱ u kuyene n ushili ka̱ɗa̱ɗa̱. Ɗa u ukai feu ili i tsuzogu ya azanariya, n atali i ikebe ka̱u kakau nu nwaru mi ikebe.† E kukiye ku usingai ku ni wi ta̱ uka̱ni m mataꞋan ma azanariya ma na mi tukpa m ma̱kya̱n, na va ɗaɗa idabu n ulinga u kavama u tsugbani ci ni. 5A ɗana ta̱ ɗe kula ku na ki ili yi usokongi a̱ kuca̱n ku ni. Kula ku danai,

“Mpa ɗa Babila vu utsura, a̱na̱ku a ashakanlai ra̱ka̱ n vuza na u gita̱i ulinga wi idabu ra̱ka̱ a aduniyan.”

6Ɗa me enei ashe vuka va vu soꞋo ta̱ mpasa n uma a̱ Ka̱shile, aza na a unai adama a na a yaꞋan ta̱ ma̱riki n Yesu. Ili i nam pa ya i zuwa yi ta̱ wo okpoi vuza na ma̱kya̱n ma makai.

Ana me enei ni ɗa n yaꞋin mereve. 7Ɗa kalingata ka ke ecei mu, “Yi ɗa̱i i zuwai ɗa vi yaꞋin mereve? Mi ta̱ a kudana wu ili yu usokongi i vuka vu nam pa n ka̱di ka na u livanki, vuza na wi n aci e cindere n avana kupa. 8Ka̱di ka na ve enei gogo na va ki ishi ta̱ n wuma, amma wi ta̱ ukpa̱ gogo na. U yaꞋan ta̱ ɗevu an wa̱ kuta̱ e kpenle ku zururu ka̱ta̱ u bana a̱ ubuta̱ u na a̱ kula̱nga̱sa̱ yi. Uma a na i ida̱shi a aduniyan, aza a na Ka̱shile ka̱ kpa̱ɗa̱i kuɗana ula e le a Katagarda ka Aza a Wuma kafu a yaꞋan a aduniyan, i ta̱ a kuyaꞋan mereve ra̱ka̱ e ene baci ka̱di ka. Wi ishi ta̱ n wuma, gogo na wi ta̱ ukpa̱, amma wi ta̱ o kubono kpamu.

9“U gaꞋan ta̱ vi yaꞋan n ka̱ɗu ku ugboji ka̱ta̱ vi yeve ili i nam pa. Aci e cindere a a ɗaɗa nsasan n cindere n na vuka va vi ida̱shi. Aci a feu ngono n cindere n ɗa. 10Ngono n tawun n yikpa̱ ta̱ ɗe, vuza ta̱li ɗa wi o tsugono gogo na, vuza cindere tamkpamu ka̱ta̱ u ta̱wa̱ ba, amma tsugono ci ni tsa kuyaꞋan megeshe ka̱u ba. 11Ka̱di ka na ki ishi n wuma, amma ɗa gogo na ki ukpa̱, a̱yi feu mogono maꞋa ma̱ kunla̱i. Wi ta̱ a̱ ka̱tsuma̱ ko ngono n cindere ma, wi ta̱ ta na a kubana a̱ ubuta̱ wu ukpa̱.

12“Avana kupa a na ve enei va, ngono kupa ɗa n na ka̱ta̱ n gita̱i kulyaꞋa tsugono ba, amma i ta̱ a̱ kuciya̱ utsura u na a kulyaꞋa tsugono koɓolo n ka̱di ka, viyum vi te koci. 13Dem vi le i ta̱ a̱ kushuku kuneke utsura u le n tsugono u ka̱di wa. 14I ta̱ kuyaꞋan kuvon m Ma̱giri ma, amma wi ta̱ a kulyaꞋa utsura u le adama a na a̱yi ɗa Vuzagbayin va azagbagbaꞋin ra̱ka̱ m Mogono mo ngono. Uma a̱ ni ele ɗa aza a na u ɗekei, n aza a na u zagbai, ɗa i o kutono yi tutu.”

15Ɗaɗa kalingata ka danai mu, “Nɗolu n na ve enei a̱ ubuta̱ u na kashakanlai ki ida̱shi ya iɗika i ɗa, n umaci u uma n elentsu. 16Avana kupa n ka̱di ka na ve enei i ta̱ a kuꞋiwan kashakanlai ka. I ta̱ a kuɗika ili i na wi n i ɗa ra̱ka̱ ka̱ta̱ a̱ ka̱sa̱kpa̱ yi koshomboɗi. I ta̱ a kuwazala ikyamba i ni ka̱ta̱ akina o songu ili i na yo okpoi ni ra̱ka̱. 17Ngono kupa ma mi ta̱ a kuyaꞋan nannai adama a na Ka̱shile ka zuwa le ta̱ e sheshe kuyaꞋan ili i na u cigai le a yaꞋan. Adama a nannai ra̱ka̱ vi le i ta̱ a̱ kushuku kuneke ka̱di ka utsura u le ka̱ta̱ u lyaꞋa tsugono. I ta̱ o kutono ka̱di ka sai a ayin a na Ka̱shile ka zuwai kusheshe ku ni ra̱ka̱ ku shana cika. 18Vuka vu na ve enei va vu ɗa likuci yu utsura i na mogono ma̱ ni mi a kulyaꞋa tsugono tsu ngono ma aduniyan ra̱ka̱.”

Currently Selected:

Kene 17: asgNT

Highlight

Copy

Compare