Yahuza 1

Kuɓa̱yuwa̱

1Akaka a nam pa a̱ uta̱ ta̱ a̱ va̱, mpa ɗa Yahuza. Mpa kagbashi kaꞋa ke Yesu Kirisiti Kishi, Mpa ɗa kpamu vangu vi Yakubu.

Ka̱shile, vuza na wi Esheku a̱ tsu, u ɗeke ta̱ uma o yoku a yaꞋan ida̱shi a̱ ubuta̱ wu ucigi u ni, a̱ ubuta̱ u na Yesu Kirisiti Kishi u kinda le kpamu. Mi ta̱ a kuɗanaka uma a nan lo.

2Ka̱sa̱kpa̱ vi isa asuvayali a̱ Ka̱shile, m ma̱ta̱na̱, n ucigi u ni ka̱u.

Atakaci a nlum ma aꞋuwa

3A̱ja̱Ꞌa̱ a ucigi a̱ va̱, n ciga ta̱ ma ɗanaka ɗa̱ ka̱u ukuna u wishi u na ci n u ɗa dem. Amma gogo na me ene ta̱ yaꞋan n kucikpa n ɗanaka ɗa̱ kakuna ko yoku kau. U gaꞋan ta̱ n ɗanaka ɗa̱ adama a na n yaꞋanka ɗa̱ odoki i shamgba n utsura, i ka̱na̱ kpamu kadanshi ka Arabali a Singai a mayun n utsura. Ka̱shile ke neke ta̱ uma a̱ ni a ciɗa† akaka a mayun a nam pa kute, a ɗa kpamu a kusabaꞋa ba, ko kenu ayin dem.

4N dana ta̱ nahannai adama a na uma o yoku a na o goyoi Ka̱shile o bono ta̱ o ɓolongu n a̱ɗa̱ n ka̱bini. I ta̱ o kuyotsongusu uma n a danai, “Ka̱shile ka gaꞋan ta̱, u ci cinukpaka ta̱ kpamu uma unushi u le.” Mayun ɗa, amma ɗa kpamu a danai, “Ci ta̱ a kufuɗa tsa yaꞋan kuyongo ku kavama tsu na ci cigai.” Ka̱shile ke sheshe ta̱ ɗe uteku u na u kuyaꞋan n uma a gbani-gbani a nam pa n ayin a ɗe, adama a na a nana ta̱ Vuzagbayin vu tsu n Vuzavaguɗu, Yesu Kirisiti Kishi.

5N ciga ta̱ ma ciɓaka ɗa̱ ukuna u na i yevei ɗe: Vuzavaguɗu u saꞋwa ta̱ kisa uma a̱ ni a ayin a na wu uta̱ka̱i le a iɗika i Masar.† Amma ayin o yoku ɗa wu unai aza a na a iwain kuneke a̱ɗu. 6Mi ta̱ kpamu a kuciɓaka ɗa̱ alingata a̱ Ka̱shile a na a iwain kushamgba uteku wu utsura u na Ka̱shile ke nekei le. A̱ ka̱sa̱kpa̱ ta̱ ubuta̱ u na ishi ugaꞋin o yongo, ɗa Ka̱shile ko foɓoi le ushiyi n ikani a̱ ubuta̱ wu ugbashi n ka̱yimbi punu. Gogo na i ta̱ a kuvana kanna ka afada. 7Ka̱ta̱ kpamu i cinukpa n likuci i Sodom n Gomora† ba, koɓolo n likuci i na yi ɗevu ɗevu n ele. Likuci i nan lo yi ta̱ tukpa n tsugbani koɓolo n ili i gbani-gbani kakau. Akina o songu ta̱ likuci i nan lo; likuci ya kpamu yo okpo ta̱ agisana a akina a babu uteku a na a kutakacika uma a gbani-gbani.

8Ko n nannai dem, nlum ma aꞋuwa n nam pa a ɗika ta̱ utsura e ekiye e le adama a ili ya alatani i le. Ka̱ta̱ ta na a zuwa ikyamba i le yo okpo n a̱shinda̱ a̱ unushi u tsugbani. O goyoi tsugono, ɗa kpamu a shikai utsura wa aza a tsugbayin a gaɗi. 9Amma ko a̱yi kalingata MikaꞋilu u ɓarangu Kalijani n kadanshi ku utsura ba, a̱yi ta na vuzagbayin ɗa feu a̱ ka̱tsuma̱ ka a alingata a̱ Ka̱shile.† Ana wi a kanananai n Kalijani adama e keven ka Musa ili i na u danakai Kalijani i ɗa na, “YaꞋan Vuzavaguɗu u ɓarangu wu.”

10Amma uma a nam pa i ta̱ a kuyaꞋan ulami wi ili i na e yevei ba, i a kuyaꞋan una̱ u wuya kpamu wi ili i na e yevei ba. I ta̱ tsu nnama. A ci yaꞋan ta̱ ili dem i na ikyamba i le i danai le, nannai ɗa ta na a̱ tsu tuka̱ ka̱ci ke le n ukpa̱. 11Ili ya atakaci i ɗa we le! Ili i na i zuwai i ɗaɗa o tono ta̱ agisana a ili i gbani-gbani i Kayinu,† vuza na wu unai vangu vi ni. Uteku tsu Balam#11 A̱ ubuta̱ wa arabali a Balam punu a katagarda ku Uteku u na Musa u Yongoi (Mkc. 22:1—23:12, a kapashi ka 73-75), ce ene ta̱ tsu na Balam u danai Mogono Balaku ili i na Vuzavaguɗu u danai ni u dansa. Na va ɗaɗa arabali a Balam gbende ba. A ayin o yoku, Balam wi isa ta̱ ikebe a̱ ubuta̱ u Balaku ɗa u zuwai aza a Israila kucikpa a̱ma̱li (Mkc. 31:16). Arabali a nam pa a i punu a̱ ubuta̱ wi ili i na tsu zagbai a̱ ubuta̱, Uteku u na Musa u Yongoi ba.† tsu ɗa i, i ta̱ a kuyaꞋan ili dem adama a na a̱ ciya̱ ikebe. I ta̱ a̱ kukuwa̱ adama a ngoyomadama n le, uteku u na Kora† u kuwa̱i.

12Uma a nam pa o ɓolongu baci n a̱ɗa̱ a̱ ubuta̱ u koɓolo ka̱ ka̱ɗiva̱ ka kulyaꞋa ilikulyaꞋa yu ucigi i Vuzagbayin Yesu, i ta̱ an ajakata a na a kufuɗa a̱ la̱nga̱sa̱ ɗa̱. I ta̱ a̱ kula̱na̱ ka̱ci ke le koci n uye u na u kutuka̱ le n wono. I ta̱ an eleshu a na a tsu ɓolongu a iɗika i ɗekpu ka̱ta̱ a̱ kpa̱ɗa̱ kuyoꞋo mini. I ta̱ a na nɗanga n na mi a limata ba. Ukpa̱ u ɗa i koci ba, amma a̱ kuwa̱ ta̱ ɗe ali ukpa̱ u ire adama a na a̱ muɗa̱ le ta̱ n aralu e le. 13O ci yotsongu ta̱ ulinga u wono u le an aɓau a utsura a mala a na a̱ tsu uta̱ka̱ n a̱shinda̱ a̱ mini. I ta̱ an azangata a na o ci yongo a̱ ka̱ka̱ra̱sa̱, ali a banka le a̱ ubuta̱ u na kpamu ka̱yimbi ka laꞋi n a̱bunda̱i babu uteku a kubana.

14Anuhu u yongo ta̱ n wuma ali tsukaya ci cindere a̱ ka̱ca̱pa̱ ka̱ A̱da̱mu, ɗa a̱yi u yaꞋin kene adama a uma a nam pa. U danai,

“Inda, Vuzavaguɗu wi ta̱ a̱ kuta̱wa̱

n alingata a̱ ni n a̱bunda̱i a laꞋa ta̱ kukece.

15A̱yi wi ta̱ a kuyaꞋanka uma a aduniyan ra̱ka̱ afada.

Wi ta̱ o kuyotsongu uma a na o goyoi Ka̱shile

i ta̱ n unushi wi ili i kavama i na a yaꞋin

ɗa a iwain Ka̱shile.

Wi ta̱ feu o kuyotsongu aza a na i nu unushi,

aza a na i babu Ka̱shile kpamu.

I ta̱ n unushi adama a na a yaꞋan ta̱ kadanshi ka tsurala n Ka̱shile,

ana kpamu a yaꞋin kadanshi ɗa a shikai ni.”

16Uma a nam pa aza o mololo a ɗa, ayin tutu a ci yaꞋan ma̱za̱nga̱ n kakuna ba. A ci yaꞋan ta̱ ili i kavama i na e sheshei kuyaꞋan dem. A ci yaꞋan ta̱ kadanshi ka̱ a̱ra̱ɗi n ka̱ci ke le, a ci yaꞋan ta̱ kpamu una̱ wu uyoꞋo a kubana a̱ ubuta̱ u uma, adama a na a̱ ya̱nsa̱ le, ka̱ta̱ uma a o tono le.

LyaꞋi kelime n kuyaꞋan ulinga

17Amma a̱ɗa̱ a̱ja̱Ꞌa̱ va̱ a ucigi, ciɓai n ili i na azusuki a Vuzagbayin Yesu Kirisiti Kishi a danai ɗa̱. 18A danai, “A kubana a ayin o ukocishi i ta̱ a̱ kuciya̱ uma a na o kugoyo n o zoꞋosoi Ka̱shile. Ili i na a kuciga i ta̱ o kutono kusheshe ku kavama ku le ku na ku tsu nusaka Ka̱shile.” 19Gogo na kpamu a ayin a nam pa, i ta̱ lo, ele ɗa kpamu aza a na i e kupece ɗa̱. I ta̱ a kuyaꞋan ida̱shi i le o kutono ili i na ikyamba i le i cigai adama a na Ayinviki a̱ Ka̱shile i ida̱shi we le ba.

20Amma a̱ɗa̱ a̱ja̱Ꞌa̱ a̱ va̱ a ucigi, i lyaꞋa kelime n kuzuwa enene a kumaꞋa a wuma u ɗa̱ a̱ ubuta̱ wu uneki wa̱ a̱ɗu u ciɗa u ɗa̱ koci. Ka̱ta̱ i lyaꞋa kelime n kuyaꞋan avasa uteku u na Ayinviki a̱ Ka̱shile o tonoi n a̱ɗa̱. 21Yongoi uteku u na ucigi u Ka̱shile u fuɗai u zuwakai ɗa̱ una̱singai, ana yi a kuvana wuma u babu uteku, u na Vuzagbayin Yesu Kirisiti Kishi u yaꞋankai ɗa̱ uzuwakpani u kuneke ɗa̱ adama a asuvayali a̱ ni. 22Panai asuvayali a aza a na i a̱ munla̱i mu uneki u ka̱ɗu u le. 23Wawai aza o yoku ka̱ta̱ yi isa le a̱ ubuta̱ wa akina a afada. Uma o yoku i ta̱ lo feu a na i kupana asuvayali e le, amma ka̱ta̱ i yaꞋan cicoꞋo mayin. I iwan ili i na i n i ɗa dem ali nu ntogu n le feu, adanshi uye wu unushi u le u zuwa le ta̱ nu ntogu n le mo okpoi n unata feu.

Avasa a kucikpa Ka̱shile

24Gogo na kpamu, nekei Ka̱shile tsugbayin ra̱ka̱, adama a na wi ta̱ a kufuɗa wa kinda ɗa̱ ta lo ya̱ yikpa̱, ka̱ta̱ u zuwa ɗa̱ yo okpo ciɗa babu unushi, ka̱ta̱ kpamu u neke ɗa̱ ma̱za̱nga̱ ka̱u. Ka̱ta̱ u banka ɗa̱ a̱ ubuta̱ u tsugbayin u ni. 25M mani-mani va ɗe, a ayin a nam pa a, ali ulaji u babu uteku, Ka̱shile kaꞋa Kishi ka̱ tsu adama e Yesu Kirisiti Kishi Vuzagbayin vu tsu. Tsugbayin ra̱ka̱ ci ni tsu ɗa. Tsugono ra̱ka̱ ci ni tsu ɗa. Utsura ra̱ka̱ u ni u ɗa. Afada kpamu ra̱ka̱ feu a̱ ni a ɗa.

Ta nannai.

Currently Selected:

Yahuza 1: asgNT

Highlight

Copy

Compare