Aza a Ibrahim 2

Wishi u tsu ili i mereve i ɗa

1Tsu bonoko aci a̱ tsu a̱ ubuta̱ u te adama a na tsu tono ili i mayun i na o yotsongushi tsu. Ci yaꞋan baci nannai, ci a̱ kupuwa̱nka̱ ba. 2O yotsongu ta̱ a na akaka a i mayun, a na Ka̱shile ke nekei alingata e neke ikaya i tsu. Vuza na baci u iwain kupana ɗa kpamu u iwain kutono a ɗa, wi ta̱ a̱ kuciya̱ atakaci a na untsai ili i na u yaꞋin. 3Tsu bonoko baci aci a̱ tsu mayin a̱ ubuta̱ u wishi u gbayin u nam pa ba, yi ɗa̱i i tsu zuwa tsu ci sheshe ci ta̱ a kufuɗa kuwere? Vuzagbayin a̱ ka̱ci ka̱ ni a̱yi ɗa u gita̱i kusala ukuna u wishi u nam pa. Aza a na a panakai ni o yotsongi tsu a na ili ya yi mayun. 4Ka̱shile a̱ ka̱ci ka̱ ni u yotsongi a na akaka a̱ ni i mayun, ana u yaꞋin ili i mereve kakau dem. U nekei kpamu Ayinviki a̱ ni wa aza a na u zagbai.

Uye u kubana a̱ ubuta̱ u wishi

5Ka̱shile ka zagba alingata a lyaꞋa tsugono tsa aduniyan a savu a na i lo a̱ kuta̱wa̱ va ba, ɗaɗa ta na ili i na ci lo a kudansa va. 6Tsu na a ɗanai a̱ ubuta̱ u yoku a Katagarda ka Ciɗa,

“Yi ɗa̱i i tsu zuwa wu vi keɓece n uma?

Yi ɗa̱i i burai nu m maku ma vuma?

7Megeshe kenu ɗa vu bonokoi ni

adama a na utsura u ni u doku u yawa wa alingata ba,

ɗa va alai ni oroliko n tsugbayin n kucikpa.

8Vu zuwai ni u lyaꞋa tsugono ci ili ra̱ka̱.”#Ishp. 8:4-6.

Ana Ka̱shile ka zuwai ni mogono mi ili dem, babu ili i na i buwai i na u kpa̱ɗa̱i kulyaꞋaka i ɗa tsugono. Amma ka̱ta̱ ce ene i ɗa ra̱ka̱ i yaꞋin ba. 9Ili i na ce enei i ɗaɗa, Yesu vuza na wi n utsura u na u yawai wa alingata ba, a̱ ka̱tsuma̱ ke megeshe kenu. Gogo na a ala yi ta̱ oroliko n tsugbayin n kucikpa adama a na u soꞋo ta̱ atakaci a̱ ukpa̱ adama a ugaꞋin u tsu. E, adama a kasingai ka̱ Ka̱shile kaꞋa, Yesu u kuwa̱i adama a yaba dem a aduniyan ra̱ka̱.

10Ka̱shile kaꞋa vuza na u yaꞋin ili dem, ɗa ili ya ra̱ka̱ yi n wuma adama a na i neke yi tsugbayin. U ciga ta̱ muku n a̱bunda̱i n uwa a̱ ubuta̱ u tsugbayin u ni. Adama a nan lo a ɗa u zuwai Yesu u soꞋo atakaci, ɗa ta na nannai wo okpoi vuza na wu untsai o tono a kubana a̱ ubuta̱ u wishi. 11Adama a nannai, Yesu n aza a na u bonokoi ciɗa, Esheku e le o okpo ta̱ e te. I ɗaɗa i zuwai ɗa u tsu pana wono u kuɗeke le amgbu a̱ ni ba. 12U dana ta̱ Ka̱shile,

“Mi ta̱ a kudana uma a̱ va̱ ili i na vi yaꞋin.

Mi ta̱ a kucikpa wu a ayin a na baci o ɓolongi

adama a na a yaꞋanka wu tsugbashi.”#Ishp. 22:22.

13Ɗa kpamu u danai,

“Mi ta̱ a̱ kushuku n Ka̱shile.”

Ɗaɗa u danai,

“Mi ta̱ na koɓolo m muku n na Ka̱shile ke nekei mu.”#Ish. 8:17-18.

14Muku n Ka̱shile uma a ɗa a na i n ikyamba koɓolo nu mpasa, adama a nan lo Yesu a̱ ka̱ci ka̱ ni wo okpoi ci le. U yaꞋan ta̱ nannai, adama a̱ ukpa̱ u ni, wi ta̱ a kufuɗa kuna Kalijani vuza na wi n utsura wu ukpa̱. 15Nannai ɗa wi isai aza a na ishi agbashi a ayin a wuma u le dem adama o wovon wu ukpa̱ u le. 16A̱tsu ra̱ka̱ ci yeve ta̱ a na Yesu u ta̱wa̱i adama a na u ɓa̱nka̱ ntsukaya mi Ibrahim, amma alingata ba. 17Adama a nannai Ka̱shile ka zuwai Yesu u yotso uma a̱ ni a ili dem, adama a na wo okpo mogono ma anan ganu† me le, vuza na u tsu yotsongu asuvayali, ɗa kpamu Ka̱shile kushuki n a̱yi. Nannai ɗa, Yesu u kuyaꞋan alyuka a kubana u Ka̱shile adama a na Ka̱shile ka cinukpaka uma unushi u le. 18A̱yi a̱ ka̱ci ka̱ ni u soꞋo ta̱ atakaci, ɗa Kalijani ka dakakai adama a na u zuwa yi u yaꞋan kawuya. Adama a nannai gogo na wi ta̱ a kufuɗa wa̱ ɓa̱nka̱ aza a na kalijani ki a kudakaka kuzuwa a yaꞋan unushi.

Currently Selected:

Aza a Ibrahim 2: asgNT

Highlight

Copy

Compare