Aza a Ibrahim 1
1
Yesu Kirisiti Kishi Maku ma̱ Ka̱shile maꞋa
1N ayin a ɗe, Ka̱shile ka yaꞋansa ta̱ kadanshi n ikaya i tsu a̱ ubuta̱ u eneki a uye kakau n a̱bunda̱i. 2Amma gogo na a ayin a ukocishi, Ka̱shile ka yaꞋanka tsu ta̱ ɗe kadanshi a̱ ubuta̱ u Maku ma̱ ni. Ka̱shile ka yaꞋin aduniyan n ili i na yi punu dem a̱ ubuta̱ u ni. A̱yi ɗa Ka̱shile ka zagbai wo okpo vuza vi ili ra̱ka̱. 3Maku ma tsa akana ta̱ adama a tsugbayin tsu Ka̱shile, u yotso ta̱ ta na feu Ka̱shile derere. U tsu zuwa ta̱ ili i lyaꞋa kelime n utsura wa akaka a̱ ni. Ana Maku ma mo bonokoi uma ciɗa a̱ ubuta̱ wu unushi u le, ɗa u da̱sa̱ngi e kukiye ku usingai ku Ka̱shile, Uba̱nga̱ri.
Kishi ka laꞋa ta̱ alingata
4Maku ma̱ ciya̱i tsugbayin ka̱u u laꞋi alingata, ɗa kpamu Ka̱shile ke nekei ni kula ku na ku laꞋi ula e le.
5Ili i na i zuwai i ɗaɗa Ka̱shile ka saꞋwa kudana alingata ili i na u danai Maku ma̱ ni ba,
“Avu ɗa Maku ma̱ va̱.
Anana mo okpo ta̱ Eshevu.”#Ishp. 2:7.
Ɗa u danai kpamu,
“Mi ta̱ o kokpo Esheku a̱ ni,
ka̱ta̱ a̱yi wo okpo Maku ma̱ va̱.”#2 Sam. 7:14.
6Ɗa ayin a na Ka̱shile ka cigai kusuku magaji ma̱ ni a aduniyan, ɗa u danai,
“Alingata a̱ Ka̱shile ra̱ka̱ sai a yaꞋanka yi tsugbashi.”#K.Wil. 32:43.
7Ili i na Ka̱shile ka danai adama a alingata i ɗa na,
“N zuwai alingata a̱ va̱ o okpoi tsu wunla̱i.
N zuwai agbashi a̱ va̱ o okpoi tsu nlentsu ma akina.”#Ishp. 104:4.
8Amma Ka̱shile ka dansai ili i nam pa adama a Maku ma̱ ni,
“Avu ɗa Ka̱shile, tsugono tsu nu ci ta̱ a kulyaꞋa kelime babu uteku.
Vi ta̱ a kulyaꞋa tsugono n afada a na a gaꞋin derere.
9Vi ci ciga ta̱ ili i na yi derere,
ka̱ta̱ vi iwan i na i kpa̱ɗa̱i kugaꞋan.
I ɗaɗa i zuwai Ka̱shile, Ka̱shile ka̱ nu,
u zagbai nu ɗa u nekei nu tsugbayin tsu na ci nekei nu ma̱za̱nga̱.
Tsugbayin tsu nam pa tsu laꞋa ta̱ tsu na u nekei aza a na a buwai.”#Ishp. 45:6-7.
10U danai kpamu,
“Vuzagbayin, n ayin a̱ ugiti vi yaꞋin aduniyan,
ɗa ekiye a̱ nu a yaꞋin gaɗi.
11Ayin i ta̱ lo a̱ kuta̱wa̱ babu vuza na u kudoku we kene le,
amma a̱ɗa̱ yi ta̱ lo.
I ta̱ o koꞋo ra̱ka̱ tsu na aminya o tsu kotso.
12Yi ta̱ a̱ kuka̱ta̱la̱ le tsu mayaga ma̱ kuku.
I ta̱ a kusabaꞋa tsa aminya a̱ kuku.
Amma a̱ɗa̱ yi ta̱ tsu na yi ayin tutu,
wuma u ɗa̱ kpamu wi o kukotso ba.”#Ishp. 102:25-27.
13Ka̱shile ka saꞋwa kudana alingata a̱ ni ili i na u danai Maku ma̱ ni ba,
“Da̱sa̱ngu na e kukiye ku usingai ku va̱
sai ayin a na n zuwai irala i nu
yo okpo ɗaka vi idasakpatsu i nu.”#Ishp. 110:1.
14Alingata† ra̱ka̱ a na a ci yaꞋanka Ka̱shile tsugbashi ayinviki a ɗa i, ɗa u suki le a̱ ɓa̱nka̱ aza a na a̱ kuciya̱ wishi.†
Currently Selected:
Aza a Ibrahim 1: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
