Galatiya 4

1Mi ta̱ a kuyaꞋanka ɗa̱ agisana: kolobo ka na ka yawai utsura ba, ka na esheku a̱ ni a̱ kuwa̱i, ka̱ tsu la̱na̱ ucanuku u na esheku a̱ ni a danai u kuciya̱ ba. Wi ta̱ an kagbashi ko a̱yi ɗa baci wi n ucanuku wa ra̱ka̱ mayun. 2Aza a na a̱ kuɗengusa̱ yi ele ɗa a̱ kula̱na̱ ili dem, sai a ayin a na kolobo ka ka shanai utsura uteku u na esheku a danai. 3Ta ki ishi nannai n a̱tsu. Ci ishi ta̱ an muku ɗa kpamu utsura kakau wa aduniyan a nam pa u lyaꞋi tsugono wa̱ tsu.

4Amma ana ayin a yawai derere, Ka̱shile ka̱ suki Maku ma̱ ni, ɗa vuka vu matsai ni. Maku ma̱ ni mo tonoi Wila̱ wa, 5ciya̱ u zuwa tsu tsu ba̱ruwa̱ tsu kpa̱ɗa̱ kutono Wila̱, ka̱ta̱ kpamu tso okpo muku n Ka̱shile. 6Tsu na yi muku n Ka̱shile, u suku ta̱ Ayinviki a Maku ma̱ ni a̱ a̱ɗu a̱ ɗa̱, ɗa kpamu Ayinviki a i e kuɗekeshe “Dada, Esheku a̱ va̱.” 7Adama a nannai gogo na kagbashi kaꞋa vi ba; maku ma̱ Ka̱shile maꞋa vi, tsu nan lo tsu ɗa kpamu u kuneke wu ili i na u yaꞋin uzuwakpani.

Bulusu u yotsongi aza a Galatiya ucigi

8A ayin a na i kpa̱ɗa̱i kuyeve Ka̱shile, agbashi a ɗa yi a̱ ubuta̱ wi ili i na yi ya̱ a̱ma̱li, amma ili i nam pa i Ka̱shile i ɗa ba, ko kenu. 9Amma gogo na i yeve ta̱ Ka̱shile, amma u gaꞋan ta̱ n dana Ka̱shile ke yeve ɗa̱ ta̱. Adama a nannai, nini ɗai i kubono a̱ ubuta̱ wu utsura kakau wa aduniyan a nam pa u na wi lekeɗi n wasasa kpamu? Yi ɗa̱i i zuwai ɗa i cigai kokpo agbashi e le kpamu? 10Ali i ci yaꞋan ta̱ ka̱ɗiva̱ ka kanna kakau, n ko wotoi, n ayin a irana ni lyushi kakau, n a̱ya̱ feu. 11Gogo na mi ta̱ a kupana wovon a na ayin a̱ va̱ a na n yaꞋin ulinga n a̱ɗa̱ o okpo ta̱ wasasa. 12Uma a̱ va̱, n folono ɗa̱ ta̱ i yongo uba̱ruwi n ili i nam pa, uteku u na mi o kuyongo. Adama a na m bonoko ta̱ ka̱ci ka̱ va̱ tsu na a̱ɗa̱ Aza̱ka̱yimbi yi ishi, ili i na mi a kudana i ɗaɗa, mi ta̱ a̱ uba̱ruwi a̱ ubuta̱ u Wila̱.

Ana n yaꞋankai ɗa̱ kadanshi n ugiti, i yaꞋanka mu kawuya ba. 13Mayun i ciɓa ta̱ a na n yaꞋin mbanaki ana n tuka̱i ɗa̱ n Arabali a Singai a̱ Kishi n ugiti. 14Ko a na mbanaki n va̱ mi kukondo wa̱ ɗa̱, i goyo mu ko i iwan mu ba. Ɗa i kucikpa i rabasai mu adanshi mpa kalingata ka̱ Ka̱shile kaꞋa. I rabasai mu adanshi mpa ɗa Yesu Kishi a̱ ka̱ci ka̱ ni. 15Mayun mi ta̱ a kudana, yi ishi ta̱ a kufuɗa yo kobo a̱ a̱shi a̱ ɗa̱ ka̱ta̱ i neke mu a ɗa. Gogo na, te ɗai ugaꞋin u ɗa̱ wi adama a̱ va̱? 16Mpa vurala vu ɗa̱ ɗa gogo na adama a na n danai ɗa̱ ukuna u mayun?

17Nlum ma aꞋuwa n nan lo mi a kuyaꞋan ili i nam pa adama a ugaꞋin u ɗa̱ ba. A ciga ta̱ ka̱u a̱ ciya̱ o rono ɗa̱ i tono le. I ta̱ a kugbagbala adama a na e pece ɗa̱ nu mpa adama a na i laꞋa n kubonoko a̱ɗu a̱ ɗa̱ we le. 18Gogo na u gaꞋan ta̱ a na yi m mali ma kuyaꞋan kasingai, u laꞋa ta̱ kpamu n kugaꞋan adama a na yi ta̱ a kuyaꞋan nannai a ayin a na mi n a̱ɗa̱ ba. 19Amma ko n nannai, muku mu ucigi n va̱, wi ta̱ adanshi mi ta̱ a kupana mɓa̱la̱ tsa̱ a̱ga̱nda̱ a limata adama a̱ ɗa̱ uteku u na n yaꞋin ɗe n ci cau, mɓa̱la̱ ma ta na mi ta̱ a kulyaꞋa kelime sai uma e ene Kishi o kuyongo a asuvu a̱ ɗa̱. 20N cikala ta̱ ka̱u n yaꞋan lo koɓolo n a̱ɗa̱ gogo na. N tsu nan lo n kulaꞋa ta̱ n kudansa yuwu n a̱ɗa̱. Amma gogo na ka̱ɗu ka̱ va̱ ka̱ da̱sa̱ngu ba adama a kakuna ka nam pa.

Olobo e re a Ibrahim

21A̱ɗa̱ vi yoku i ciga ta̱ kuyongo o kutono Wila̱ ali n gogo na. Danai mu, i yeve ta̱ ili i na Wila̱ u danai? 22Katagarda ka Ciɗa ka danai Ibrahim wi ta̱ n olobo e re. A̱na̱ku o kolobo ke te kagbashi kaꞋa, amma a̱na̱ku o kolobo ka na ka buwai va kagbashi kaꞋa ba. 23Vuka vu na vi kagbashi ka u matsai uteku u na a kiwanai. Amma vuka vu na vi uba̱ruwi va u matsai adama a na ta Ka̱shile ka yaꞋin uzuwakpani n Ibrahim nannai.

24Ili i nam pa ya ra̱ka̱ yi ta̱ o kuyotsongusu ili i yoku: A̱ma̱ci e re a i ta̱ tsu uzuwakpani u re u Ka̱shile n uma a̱ ni. Uzuwakpani u te u ɗaɗa Wila̱ u na Ka̱shile ke nekei Musa a Kusan ku Sinai,† uma a na kpamu o tonoi uzuwakpani u nam pa i ta̱ tsa agbashi. A̱na̱ku a na e ci ɗeke Hajara† kagbashi wi ta̱ tsu uzuwakpani u nan lo. 25A̱yi wi ta̱ tsa agisana a Kusan ku Sinai a Alaraba. Gogo na kpamu ubirini u Urishelima wi ta̱ tsu Kusan ku Sinai, adama a na ubirini wa n uma a̱ ni i ta̱ o kuyongo tsa agbashi a̱ Wila̱. 26Amma Saratu, vuka vu uba̱ruwi va, a̱yi ɗa agisana a Urishelima vu gaɗi. A̱yi ɗa ta na a̱na̱ku a̱ tsu. 27Katagarda ka Ciɗa ka danai adama a̱ ni,

“YaꞋan ma̱za̱nga̱, avu madari ma vuka!

Vu saꞋwa kupana mɓa̱la̱ n limata ba,

gita̱ kucanana ishipa ka̱ta̱ vi kya̱na̱ adama a̱ ma̱za̱nga̱.

Adama a na muku m madari ma vuka ma

gogo na n laꞋa ta̱ n vuka vu na vi n vali n a̱bunda̱i.”#Ish. 54:1.

28Uma a̱ va̱, a̱ɗa̱ muku n Ka̱shile n ɗa yi adama a uzuwakpani u ni, uteku u na Ishaku wi ishi. 29A ayin a nan lo, IsmaꞋila,† maku ma na a matsai a uye u na a kiwanai, u zuwai Ishaku u takacika, vuza na a matsai adama a Ayinviki a̱ Ka̱shile. Ta ki nannai anana. 30Amma yi ɗa̱i Katagarda ka Ciɗa ka danai adama a nan lo? Ka danai, “Lokoi kagbashi ka vuka ka m maku ma̱ ni. Maku ma kagbashi ka vuka ka ma̱ kuciya̱ ko agadu a esheku a̱ ni ba. Maku ma vuka vu uba̱ruwi va a̱yi ɗa u kuciya̱ a ɗa ra̱ka̱.”#Ugi. 21:10. 31Uma a̱ va̱, a̱tsu muku n vuka vu uba̱ruwi n ɗa ci, amma n kagbashi ka vuka ba.

Currently Selected:

Galatiya 4: asgNT

Highlight

Copy

Compare