Galatiya 1

Kuɓa̱yuwa̱

1-2Mpa ɗa Bulusu, mi ta̱ a kuɗana akaka a nam pa a kubana wa aza o Kutoni kakau a na i a iɗika i Galatiya. Mpa vuzavusuki ɗa. Vuza ɗa u zagbai mu mo okpo nannai ba. Ka̱bunda̱i ka uma ka ta na feu ka yaꞋin nannai ba. Amma Yesu Kirisiti Kishi a̱ ka̱ci ka̱ ni ɗa u zagbai mu. U yaꞋan ta̱ nannai koɓolo n Ka̱shile Dada, vuza na u ɗengusa̱i Yesu a kasaun. Uma a̱ tsu a na i na ra̱ka̱ koɓolo nu mpa ci ta̱ a̱ kusuꞋuku ɗa̱ ikya̱shi.

3YaꞋan Ka̱shile Esheku n Vuzagbayin Yesu Kishi u yaꞋanka ɗa̱ kasingai ka̱ta̱ u neke ɗa̱ ma̱ta̱na̱. 4Yesu Kishi u kuwa̱i adama a unushi u tsu, uteku u na Ka̱shile Esheku a̱ tsu e sheshei, ka̱ta̱ u ciya̱ wi isa tsu a̱ ubuta̱ wa aduniyan a gbani-gbani a nam pa a̱ ubuta̱ u na ci o kuyongo gogo na. 5I ɗaɗa i zuwai ɗa tsugbayin ra̱ka̱ tso okpoi tsu Ka̱shile a ayin ra̱ka̱ babu uteku. Ta nannai.

Arabali a Singai a nam pa koci

6N yaꞋan ta̱ mereve ka̱u a na yi a̱ kushirikpa̱ka̱ Ka̱shile kucina̱ gogoꞋo lo. U zagba ɗa̱ ta̱ adama a kasingai ka̱ Kirisiti Kishi. Amma ɗa gogo na yi o kutono akaka o yoku kau. 7Mayun ɗa, akaka o yoku i lo a na i tsa Arabali a Singai ba, amma uma o yoku i ta̱ lo a na i a kugbandarasa ɗa̱. A ciga ta̱ a sabaꞋa Arabali a Singai adama a̱ Kishi o okpo ili i yoku kau. 8YaꞋan Ka̱shile ka zuwa una̱ u wuya u yaba dem vu na u yaꞋin kadanshi ko yoku kau n akaka a na tsu dansai a kubana wa̱ ɗa̱! Ka̱shile ka yaꞋan nannai, ko a̱tsu a̱ ka̱ci ka̱ tsu ɗa baci ci n akaka o yoku kau, ko kalingata kaꞋa baci ku uta̱i gaɗi n akaka o yoku kau. 9N dansa ta̱ ɗe kaꞋa, n kudoku ta̱ ma dansa kpamu kaꞋa: Vuza yoku u dansa baci akaka o yoku kau n a na yi isai a̱ ugiti, yaꞋan una̱ u wuya u Ka̱shile u ka̱na̱ vuma vu nan lo.

10Mi a kugbagbala adama a na uma a pana uyoꞋo ba. N ciga ta̱ Ka̱shile ka pana uyoꞋo. I sheshe ta̱ mi ta̱ a kugbagbala adama a na n zuwa uma a ciga mu? Mi baci a kuyaꞋan nannai, mi o kokpo kagbashi ka̱ Kishi ba.

Ka̱shile ke ɗekei Bulusu

11Uma a̱ va̱, n ciga ta̱ i yeve a na Arabali a Singai a na n danai ɗa̱ ili i ɗa i na uma a yaꞋin ba. 12N ciya̱ a ɗa a̱ ubuta̱ u uma ba. Vuza wi lo u yotsongushi mu a ɗa ba. Yesu Kishi ɗa u yotsongi mu kuyotsongusu ku nam pa.

13I yeve ta̱ uteku u na mi ishi a ayin a na mi o kutono uye wa Ayahuda. N takacika ta̱ aza o Kutoni a̱ Ka̱shile ɗa n gbagbalai adama a na mu una le. 14Ayahuda i ta̱ lo a na i ushan u va̱, amma n laꞋa le ta̱ n a̱bunda̱i o kutono wila̱ wi ikaya i va̱. Mi ta̱ m mali n yaꞋan nannai.

15Amma ko kafu na a matsa mu, Ka̱shile ka zagba mu ta̱ ɗe. U yaꞋan ta̱ nannai adama a kasingai ka̱ ni. 16Ɗa ayin a yawai ana u yotsongi Maku ma̱ ni wa̱ va̱ adama a na n yaꞋan kadanshi ka̱ ni wa Aza̱ka̱yimbi. A ayin a nan lo ko vuza me ece u yaꞋanka mu odoki ba. 17M bana a Urishelima adama a na n gasa n aza a na o okpoi azusuki kafu mpa mo okpo vuzavusuki ba. Ili i na n yaꞋin a ayin a nan lo i ɗaɗa, m banai Alaraba ɗa n yongoi ɗe ayin ukeci. Ɗa m bonoi a Dimaska.

18A̱ya̱ a tatsu a lazai, ɗa m banai a Urishelima adama a na me ene Biturusu, ɗa n yongoi ɗe ali ayin gendu. 19Me ene ta̱ feu Yakubu, vangu vu Vuzagbayin, amma a ayin a nan lo a me ene azusuki a na a buwai va ba. 20N kucina ta̱ n Ka̱shile, aꞋuwa a ɗa mi a kudansa ba.

21Ayin kenu a lazai, ɗa n yaꞋin nwalu a kubana a uɓon u Siriya n uɓon u Silisiya feu. 22A ayin a nan lo aza o Kutoni a uɓon u Yahuda a saꞋwa kene mu ba. 23A pana ta̱ de kadanshi adama a̱ va̱ koci a kudana: “Vuma vu nan lo ɗaɗa u tuka̱i n atakaci wa̱ tsu, ɗa u gbagbalai adama a na u la̱nga̱sa̱ aza o Kutoni. Amma gogo na wi ta̱ a kudana uma o tono akaka a.” 24Ɗa a cikpai Ka̱shile adama a̱ va̱.

Currently Selected:

Galatiya 1: asgNT

Highlight

Copy

Compare