2 Korintiya 13
13
Bulusu u kotso ta̱ kuyaꞋan odoki a̱ ni
1Mi ta̱ a̱ kuta̱wa̱ wa̱ ɗa̱ a̱ uta̱wi u tatsu. Katagarda ka Ciɗa ka danai, “U gaꞋan ta̱ ngan n re ko n tatsu a̱ ushuku nu nsata ma mayun ɗa.”#K.Wil. 19:15. 2Ayin a na mi ishi n a̱ɗa̱ a̱ uta̱wi u ire, n dansuka ta̱ aza a na ishi a kuyaꞋan unushi. An mi daꞋin na n kuyaꞋan ta̱ kadanshi ka̱ ni kpamu: Kanna ka na baci n doku n ta̱wa̱i, babu vuza na u kusula atakaci a.
3Mi ta̱ o kuyotsongu ɗa̱ a na Kirisiti Kishi ɗa wi a kuyaꞋan kadanshi a̱ ubuta̱ u va̱. Ayin a na baci u yaꞋin ulinga wa̱ ɗa̱, utsura u ni wi e kujebe ba, amma wi ta̱ a kushana derere. 4Ikyamba i ni yo okpo ta̱ babu utsura a ayin a na a unai ni a maɗanga ma atakaci, amma wi ta̱ n wuma gogo na adama a utsura u Ka̱shile. Ikyamba i tsu yi n utsura ba, tsu na Kirisiti Kishi wi ishi. Amma yi ta̱ e kene a na ci o kuyongo n wuma adama a utsura u Ka̱shile, tsu na Kishi u ci yaꞋan.
5Indai ka̱ci ka̱ ɗa̱ mayin. Kondoi ka̱ci ka̱ ɗa̱ adama a na ye ene ko i buwa ta̱ a̱ kuɓa̱na̱ ili i na i nekei a̱ɗu a. I yeve baci a na Yesu Kirisiti Kishi wi n a̱ɗa̱ ba, i yikpa̱ ta̱ kukondo ka. 6Amma n zuwa ta̱ a̱pa̱Ꞌa̱ yi ta̱ e kene uteku u na a̱tsu a̱ ka̱ci ka̱ tsu tsu kpa̱ɗa̱i kuyikpa̱ kukondo ka.
7Ci yaꞋin avasa u Ka̱shile adama a na ka̱ta̱ i yaꞋan ili i gbani-gbani ba. Ci yaꞋan kavasa ka nannai adama a na uma e ene tsu lapula ta̱ ka̱ci ka̱ tsu ba, amma adama a na i yaꞋan ili i na i gaꞋin, ko u yotso baci adanshi a̱tsu ci yikpa̱ ta̱. 8Ili i na tsa kuyaꞋan i ɗaɗa tsu zuwa ili i mayun i lyaꞋa kelime. Tsa kuyaꞋan ili i na i kusa̱nka̱ kulyaꞋa kelime ba. 9Ko uma e ene tsu baci adanshi ci n utsura ba, ci yaꞋan ta̱ ma̱za̱nga̱ a na a̱ɗa̱ yi n utsura. Avasa a̱ tsu a ɗa, i bono tsu na yi ishi i tsurakpa derere. 10Mi ta̱ a kuɗanaka ɗa̱ ili i nam pa kafu ayin a na n kuyawa. Nannai ɗa n kukpa̱ɗa̱ kuɓarangu ɗa̱ n wali a ayin a na baci n dansai n utsura u na Vuzagbayin u nekei mu. U neke mu ta̱ utsura u nam pa, adama a na m ɓa̱nka̱ ɗa̱, amma adama a na mu una ɗa̱ ba.
Ikya̱shi yu ukocishi
11Gogo na uma a̱ va̱, mi ta̱ o kukotso akaka a nam pa. N danai ɗa̱: YaꞋin ma̱za̱nga̱! SabaꞋi kuyongo ku ɗa̱. Zukai n ili i na n danai ɗa̱. Yongoi koɓolo n ka̱ɗu ke te. I yongo koɓolo m ma̱ta̱na̱. Ka̱ta̱ Ka̱shile ku ucigi m ma̱ta̱na̱ ko yongo n a̱ɗa̱.
12Kya̱sa̱na̱i n ucigi wa aza o Kutoni. 13Aza o Kutoni a na i na ra̱ka̱ i ta̱ e kukya̱sa̱ ɗa̱.
14YaꞋan kasingai ka Vuzagbayin Yesu Kirisiti Kishi, n ucigi u Ka̱shile, n koɓolo ka Ayinviki a̱ Ka̱shile o yongo koɓolo n a̱ɗa̱ dem.
Currently Selected:
2 Korintiya 13: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
