Kolosiya 2

1N ciga ta̱ i yeve uteku u na n dakakai adama a̱ ɗa̱, n adama a aza o Kutoni a na i Ladukiya, n aza o Kutoni a na ka̱ta̱ tsu saꞋwai kuyevenei ba. 2N yaꞋan ta̱ ili i nam pa adama a na n dokusu le utsura u ka̱ɗu ka̱ta̱ m ɓolongu le n ucigi. Na wi ta̱ a kuzuwa le a̱ ciya̱ ili i singai n a̱bunda̱i, ka̱ta̱ e yeve mayin ili i na yi usokongi i Ka̱shile. Mi ta̱ a kuyaꞋan kadanshi ka̱ Kirisiti Kishi. 3A̱yi ɗa vuza na wi a̱ kuɓa̱na̱ uciyi wu ugboji ra̱ka̱ n kuyeve ku na ci a̱ kukpa̱ɗa̱ kene. 4N dana ɗa̱ ta̱ ili i nam pa adama a na ka̱ta̱ vuza u fuɗa u ya̱nsa̱ ɗa̱ n ugboji ko kanananai n a̱ɗa̱ ba. 5Ko a na mi daꞋin n a̱ɗa̱, ka̱ɗu ka̱ va̱ ki ta̱ lo n a̱ɗa̱. Mi ta̱ a̱ ma̱za̱nga̱ a na yi o kuyongo tsu na u gaꞋin adama a na yi ta̱ n uneki wa̱ a̱ɗu wu ugbami n Kishi.

Kirisiti Kishi u tsu tuka̱ ta̱ wuma u mayun

6Tsu na gogo na yi isai Yesu Kishi wo okpoi Vuzavaguɗu vu ɗa̱, lyaꞋi kelime n kutono yi. 7Zuwai aralu a̱ ɗa̱ wa̱ ni ka̱ta̱ i gbonguro n a ɗa. Nannai ɗa uneki wa̱ a̱ɗu u ɗa̱ u kuciya̱ kumiꞋi ku utsura, derere tsu na o yotsongushi ɗa̱. Ta kpamu nannai i kufuɗa kuneke ogodiya n a̱bunda̱i.

8Ka̱ta̱ i ka̱sa̱kpa̱ vuza u bonoko ɗa̱ agbashi a̱ ubuta̱ u kanananai ka wasasa ba. Kanananai ka ki ta̱ a kuyaꞋan adanshi ki ta̱ n ugaꞋin, amma kuyotsongusu ku vuma ku ɗa koci. Ku uta̱ ta̱ a̱ ubuta̱ wu utsura wa aduniyan u nam pa, amma u Kirisiti Kishi u ɗa ba. 9Ili i Ka̱shile ra̱ka̱ ta punu yi a ikyamba i Kirisiti Kishi. 10A̱ɗa̱ yi ta̱ koɓolo n a̱yi. Nannai ili i nam pa ra̱ka̱ ta punu yi n a̱ɗa̱, ɗa wi a kulyaꞋa tsugono n utsura kakau n uma a gbagbaꞋin dem.

11Ana i ta̱wa̱i u Kishi u kiɗa ɗa̱ ta̱ avaja amma punu a̱ a̱ɗu. Vuma ɗa u kiɗai ikyamba i mayun i ɗa̱ ba. Ili i na Kishi u yaꞋin i ɗaɗa u kiɗai ili yu unushi wa̱ ɗa̱. 12A yaꞋanka ɗa̱ baci kusumbu ka akucina, a̱ ciɗa̱ngu ɗa̱ ta̱ n Kishi. Ɗa a̱ ɗengusa̱i ɗa̱ n wuma adama a na i neke ta̱ a̱ɗu n utsura u Ka̱shile, vuza na u ɗengusa̱i Kishi n wuma a̱ ubuta̱ wu ukpa̱. 13Yi ishi ta̱ ukpa̱ adama a̱ unushi u ɗa̱ adama a na kpamu yi ishi ta̱ n a̱ɗu a unushi. Amma Ka̱shile ka zuwai ɗa̱ i yaꞋan wuma u Kishi. U cinukpakai tsu unushi u tsu ra̱ka̱.

14Ubuta̱ wi ishi ta̱ lo u na a ɗanai unushi u tsu, ɗa ili i na a ɗanai va i shamgbai a tsurala n a̱tsu. Amma ɗa Ka̱shile ko gboroi ubuta̱ u na ishi a ɗanai unushi u tsu wa. U ɗikai u ɗa, wu unai u ɗa a maɗanga ma atakaci ma̱ Kirisiti Kishi. 15N tsu nam pa, Ka̱shile ka takpai utsura a̱ ubuta̱ wu utsura kakau n uma a gbagbaꞋin dem. U nekei le wono e keteshe a̱ ubuta̱ u na u lyaꞋi le utsura a maɗanga ma atakaci ma̱ Kishi.

16Adama a nannai, ka̱ta̱ i ka̱sa̱kpa̱ vuza wi ilukpa̱ ɗa̱ adama a ili i na i kulyaꞋa ko i kusoꞋo ba. Ka̱ta̱ i ka̱sa̱kpa̱ a̱ ilukpa̱ ɗa̱ adama a na i kpa̱ɗa̱i kuyaꞋan ka̱ɗiva̱ ka ayin a ciɗa o yoku, ko ka̱ɗiva̱ ko Wotoi u Savu, ko kutono wila̱ u kanna ka Ashibi ba. 17Adama a na wila̱ u nam pa iyoci i ɗa yi ili i mayun. Kishi a̱ ka̱ci ka̱ ni ɗa ili i mayun ya. 18Uma i ta̱ lo a na a tsu pana uyoꞋo n kugoyo ku ka̱ci ke le ka aꞋuwa ka̱ta̱ a cikpa alingata. Ka̱ta̱ i ka̱sa̱kpa̱ uma a nan lo a̱ ilukpa̱ ɗa̱ adama a na i iwain kuyaꞋan tsu na a yaꞋin ba. Vuma na wi tsu nan lo u tsu dansa ta̱ ili gbende i na we enei, ka̱ta̱ unambi u ka̱ɗu u ciɗa u ni u zuwa yi kuyaꞋan a̱ra̱ɗi n ukuna u tsulau u na wi n u ɗa. 19Uma a nam pa a buwa o kutono Kishi ba, vuza na wi Kaci ki ikyamba. A̱tsu ci ta̱ uɓolongi n ikyamba i ni n akawa a utsura a̱ ni, ci ta̱ a kufuɗa kugbonguro ci ciya̱ baci tsuwaꞋa tsu tsu n utsura a̱ ubuta̱ u Ka̱shile.

20I kuwa̱ ta̱ n Kirisiti Kishi, ɗa u nekei ɗa̱ uba̱ruwi a̱ ubuta̱ wi ili yu utsura ya aduniyan i nam pa. Yi ɗa̱i ɗa i buwai o kutono wila̱ wa aduniyan u nam pa, adanshi a̱ɗa̱ yi ta̱ a kulyaꞋa kelime n kokpo aza a aduniyan a nam pa? 21Wila̱ u nam pa u danai, “Ka̱ta̱ i reme ili i nam pa ba,” ko “I lyaꞋa ili i nam pa ba,” ko kpamu “I saꞋwa i ɗa ba.” 22Wila̱ u nam pa wi ta̱ a kadanshi ki ili i na yi a kuyaꞋan megeshe ba. Ayin a na baci ci yaꞋin ulinga n ili i nam pa tsu kotsoi, ka̱ta̱ yo okpo gbani. Ta nannai kpamu n wila̱ u na uma a zuwai. 23Wila̱ u nam pa wi ta̱ a kuyaꞋan adanshi u gaꞋan ta̱ adama a na wi ta̱ a kuzuwa uma a dakaka a yaꞋan i na Ka̱shile ka kupana uyoꞋo, ko u zuwa uma a̱ kpa̱ɗa̱ kuyongo n a̱ra̱ɗi. Na lo va aꞋuwa ɗa, i ta̱ kpamu a kuzuwa uma a takacika ka̱ci ke le adama a na a yaꞋan ili i na Ka̱shile ka kupana uyoꞋo. Amma wila̱ u nam pa wi a̱ kuɓa̱nka̱ vuza na wi a kuciga kuka̱sa̱kpa̱ kusheshe ku gbani-gbani ko a̱shawuya ba.

Currently Selected:

Kolosiya 2: asgNT

Highlight

Copy

Compare