Kolosiya 1

Kuɓa̱yuwa̱

1Mpa ɗa Bulusu. Ka̱shile ka zagba mu ta̱ mo okpo vuzavusuki vi Yesu Kirisiti Kishi. Timoti wi ta̱ na koɓolo nu mpa, a̱yi kpamu vuza tsu ɗa.

2Mi ta̱ a kuɗanaka uma a̱ Ka̱shile a na i o Kolosiya. Aza a̱ tsu a ɗa, i ta̱ kpamu o kutono Kishi mayin.

YaꞋan Ka̱shile ko yotsongu ɗa̱ kasingai ka̱ ni m ma̱ta̱na̱ ma̱ ni.

Kavasa ko ogodiya

3Ci ci yongo ta̱ a kuyaꞋan kavasa adama a̱ ɗa̱ ayin tutu, ka̱ta̱ ci cikpa Ka̱shile, vuza na wi Esheku a Vuzagbayin vu tsu Yesu Kishi. 4Ili i na i zuwai i ɗaɗa tsu pana ta̱ yu ushuku ta̱ n Yesu Kishi, ɗa kpamu tsu panai a dana i ciga ta̱ uma a̱ Ka̱shile ra̱ka̱. 5Yi ta̱ n uneki wa̱ a̱ɗu n ucigi u nam pa adama a̱ a̱pa̱Ꞌa̱ a̱ ɗa̱. Ka̱shile ta na ka zuwaka ta̱ ɗe ili i na i keɗekei a̱pa̱Ꞌa̱ a na ɗe gaɗi, a̱ ubuta̱ u na i kene i ɗa gogo na ba. A̱ɗa̱ i pana ta̱ ukuna u kukeɗe wa̱ a̱pa̱Ꞌa̱ u nam pa a ayin a na i panai akaka a mayun, Arabali a Singai a na a danai ɗa̱. 6Arabali a Singai a nam pa a sabaꞋa ta̱ wuma u ɗa̱ a kanna ka na i gita̱i kupana mayin ili i mayun i kasingai ka na Ka̱shile ko yotsongi aza a unushi. Arabali a Singai a nan lo ta na i ta̱ a̱ kuka̱ra̱Ꞌa̱ aduniyan ra̱ka̱. I ta̱ a kumatsa ili a sabaꞋa baci wuma u uma a̱ ubuta̱ dem tsu na a yaꞋin n a̱ɗa̱.

7Abafa ka̱ja̱Ꞌa̱ ka̱ tsu kaꞋa ku ulinga, ci ciga yi ta̱ ta na ka̱u. A̱yi ɗa vuza na u tuka̱i ɗa̱ n Arabali a Singai a. U yaꞋanka ta̱ Kishi tsugbashi mayin tsu kalingata ka̱ tsu wa̱ ɗa̱. 8A̱yi ɗa vuza na u danai tsu tsu na Ayinviki a̱ Ka̱shile e nekei ɗa̱ ucigi u gbayin a kubana wa aza o yoku.

9Adama a nannai, ci ta̱ a kuyaꞋan kavasa ayin tutu adama a̱ ɗa̱. Ci yaꞋan ta̱ nannai ana tsu panai ukuna u ɗa̱, tsu ka̱sa̱kpa̱ ta na kuyaꞋan avasa ba. Tsu folonoi Ka̱shile ke neke ɗa̱ kuyeve mayin ki ili i na u cigai ɗa̱ i yaꞋan, ɗa tsu folonoi ni kpamu u neke ɗa̱ ugboji wu ukuna u ciɗa. 10Nannai kpamu tsu na i kuyongo wi ta̱ e kuneke Vuzagbayin tsugbayin ayin tutu, ka̱ta̱ u pana ma̱za̱nga̱ n a̱ɗa̱. Ayin tutu i matsa ili i singai adama a ulinga u singai u ɗa̱, ka̱ta̱ a̱ɗa̱ kpamu ayin tutu i yotsongu ucigi a kubana wa aza o yoku. I yaꞋan baci nannai, yi ta̱ a kuyaꞋan utsura ka̱ta̱ i gbonguro n kuyeve ku Ka̱shile ayin dem.

11Kavasa ka̱ tsu kaꞋa Vuzagbayin u neke ɗa̱ utsura u na wi tsu utsura u tsugbayin u ni adama a na i ciya̱ uremi u ka̱ɗu n ka̱lulu, adama a na yo oꞋo ba. Ka̱sa̱kpa̱ a̱yi u shatangu ɗa̱ m ma̱za̱nga̱. 12Ci ciga ɗa̱ ta̱ ayin tutu i cikpa Dada. U zuwa ɗa̱ ta̱ i ciya̱ upecu wi ili i na yi i uma a̱ ni na ɗe o tsugono tsu kutashi. 13Ka̱shile ki isa tsu ta̱ a̱ ubuta̱ u vuza na wi a kulyaꞋa tsugono tsu ka̱yimbi. Ka̱shile kpamu ka̱ tuka̱ tsu ta̱ o tsugono tsu Maku ma̱ ni ma na u cigai ka̱u. 14Ka̱shile ka tsupaka tsu ta̱ uba̱ruwi a̱ ubuta̱ wu mpasa m Maku ma̱ ni, nannai ɗa u cinukpakai tsu unushi u tsu ra̱ka̱.

Kishi ka laꞋa ta̱ uma ra̱ka̱

15Yesu Kirisiti Kishi wi ta̱ derere n Ka̱shile, uma a kufuɗa kene Ka̱shile n a̱shi e le ba. A̱yi ɗa Magaji ma̱ Ka̱shile, wi ta̱ ta na n tsugono ci ili dem i na Ka̱shile ka yaꞋin. 16Ili i na i zuwai i ɗaɗa Ka̱shile ka yaꞋan ta̱ ili ra̱ka̱ wa̱ ni. Yesu u yaꞋan ta̱ ili ra̱ka̱ i na yi gaɗi n ili ra̱ka̱ i na yi a iɗika na feu. U yaꞋin ili ra̱ka̱ i na ci e kene, ɗa u yaꞋin kpamu ili ra̱ka̱ i na ci a̱ kukpa̱ɗa̱ kene. U yaꞋin icuꞋu i tsugono ra̱ka̱ nu utsura kakau ra̱ka̱ a̱ a̱da̱nga̱shile. Mayun ɗa Maku ma̱ Ka̱shile ma yaꞋin ili ra̱ka̱ adama a na ili ya ra̱ka̱ i neke yi tsugbayin. 17Wi ta̱ lo kafu ili i na i buwai, a̱yi ɗa vuza na u tsu zuwa ili ra̱ka̱ yo okpo derere koɓolo mayin.

18Kirisiti Kishi a̱yi ɗa Kaci ka kpaꞋa ka aza o Kutoni a̱ ni, ele ɗa ikyamba i ni. A̱yi ɗa vuza na wi ira̱i kpaꞋa ko otoni ka, a̱yi ɗa kpamu vuza iyain vu na Ka̱shile ka̱ ɗengusa̱i a kasaun ɗa u bonokoi ni n wuma kpamu. Adama a nannai, u laꞋa ta̱ ili dem. 19Ka̱shile ke enei u gaꞋan ta̱ ili dem adama a̱ ni i yaꞋan feu punu a̱ ubuta̱ u Kirisiti Kishi. 20Ɗa Ka̱shile ke sheshei u danai Kishi feu wo okpo uye u na u zagbai ɗa u bonokoi ili i gaɗi n yi iɗika yo okpo ciɗa a̱ ubuta̱ u ni. Mpasa n Yesu n ɗa n tuka̱i m ma̱ta̱na̱ ma̱ Ka̱shile ana n ɗa n loloi a̱yi gaɗi a maɗanga ma atakaci.

21Kafu ili i nam pa, yi ishi ta̱ daꞋin n Ka̱shile. Yi ishi ta̱ irala i ni, ɗa kusheshe ku gbani-gbani n ulinga u gbani-gbani u ɗa̱ u pecei ɗa̱ n a̱yi. 22Amma gogo na u bonoko ɗa̱ ta̱ wa̱ ni tsa a̱ja̱Ꞌa̱ a̱ ni. U yaꞋan ta̱ ili i nam pa n ikyamba i vuma i Maku ma̱ ni Yesu, vuza na u kuwa̱i a maɗanga ma atakaci. Adama a nannai, Yesu Kishi u bonoko ɗa̱ ta̱ u Ka̱shile, ɗa i bonoi ciɗa babu unushi ko u te, tsu na babu vuza na u kushika ɗa̱ i shamgba baci e kelime ka̱ ni. 23Amma i lyaꞋa kelime n kushuku a na ili ya mayun ɗa, ka̱ta̱ i shamgba punu n utsura. Ka̱ta̱ i ka̱sa̱kpa̱ a̱pa̱Ꞌa̱ a na yi isai a ayin a na i panai Arabali a Singai ba. Arabali a Singai a nam pa a̱ ka̱ra̱Ꞌa̱ka̱ ta̱ a ɗa a aduniyan ra̱ka̱, mpa Bulusu mo okpo ta̱ kagbashi ka kuɗika akaka a nam pa.

Ulinga u Bulusu

24N tsu pana ta̱ ma̱za̱nga̱ e neke mu baci atakaci adama a̱ ɗa̱. Mi ta̱ o kusoꞋo atakaci adama a ili i na i ta̱wa̱i dem, ko n soꞋo a yawa a na Kishi u soꞋi ba. Atakaci a nam pa a̱ tsu tuka̱ ta̱ n ili i na i kuɓa̱nka̱ ikyamba i ni, ɗaɗa kpaꞋa ka aza o Kutoni. 25Mpa gogo na kagbashi ka kpaꞋa ka aza o Kutoni kaꞋa adama a na Ka̱shile ka zuwa mu ta̱ n dana ɗa̱ akaka a̱ Ka̱shile ra̱ka̱ n tsu na i mayun. 26Ka̱shile ko sokongu ta̱ akaka a nam pa wa aza a cacau, amma gogo na a ayin a nam pa u yotsongu ta̱ a ɗa u uma a̱ ni. 27Ka̱shile ko yotsongi akaka a̱ ni adama a na u ciga ta̱ a̱ɗa̱ Aza̱ka̱yimbi i yeve ili i singai i nam pa n ukuna u tsugbayin. Ili i na yi ishi usokongi n ayin a ɗe, ɗa gogo na a̱ ɓa̱yuwa̱i i ɗa e keteshe i ɗaɗa: Kishi wi ta̱ punu n a̱ɗa̱, nannai ɗa i yevei a na ya kufuɗa kuꞋuwa tsugbayin ci ni n a̱yi.

28Adama a nannai ci ta̱ a kudana yaba dem ukuna u Kirisiti Kishi a̱ ubuta̱ dem u na baci tsu banai. Tsu kushe le ta̱ ɗa kpamu ci yotsongushi le. Ci yaꞋan ta̱ ulinga n kuyeve ku na Ka̱shile ke nekei tsu ra̱ka̱, adama a na ci ciga ta̱ aza a na i n Kirisiti Kishi o okpo tsu na u gaꞋin o okpo ayin a na baci a banai u Ka̱shile. 29N dakaka ta̱ ka̱u adama a na ili i nam pa i yaꞋan, ɗaɗa n shamgbai n utsura u gbayin u Kishi u na wi a kuyaꞋan ulinga nu mpa.

Currently Selected:

Kolosiya 1: asgNT

Highlight

Copy

Compare