2 Biturusu 1
1
Kuɓa̱yuwa̱
1Mpa ɗa Sima Biturusu. Mpa ɗa kagbashi ke Yesu Kirisiti Kishi mpa kpamu vuzavusuki vi ni ɗa. N ɗanaka ɗa̱ ta̱ akaka a nam pa ra̱ka̱ vu ɗa̱, a̱ɗa̱ vu na yi n uneki wa̱ a̱ɗu tsu tsu. Uneki u ka̱ɗu u nan lo u singai u ɗa, ɗa kpamu Yesu Kishi u nekei tsu u ɗa. A̱yi Ka̱shile kaꞋa n Kishi ka̱ tsu, u bonoko tsu ta̱ tso okpo aza a̱ usuɓi a̱ ubuta̱ u Ka̱shile.
2N ciga ta̱ Ka̱shile ko yotsongu ɗa̱ kasingai m ma̱ta̱na̱ ma̱ ni ka̱u i ciya̱ i yeve Yesu mayin adama a na a̱yi ɗa Ka̱shile n Vuzagbayin vu tsu.
Ili i na i zuwai ɗa tsa kuyaꞋan n a̱pa̱Ꞌa̱
3Tsu na kpamu ci e kuyeve Yesu mayin, ɗa wi o kuyotsongu utsura u gbayin u ni adama a na u neke tsu ili ra̱ka̱ i na ci cigai adama a na ci yongo a uye u na Ka̱shile ka cigai. U ɗeke tsu ta̱, adama a na ci ciya̱ tsugbayin ci ni n kasingai ka̱ ni kpamu. 4A̱ ubuta̱ wu utsura u gbayin u nan lo kpamu, ɗa u nekei tsu uzuwakpani u gbagbaꞋin u singai u ni. U yaꞋan ta̱ ɗe uzuwakpani u na i kulaka a̱ ubuta̱ wi ili i gbani-gbani i na yi ɗevu n a̱ɗa̱. Kusheshe ku kavama ku ɗa ku tsu tuka̱ n ili i nan lo ya. U yaꞋanka ɗa̱ ta̱ feu uzuwakpani u na i kokpo ta̱ tsu Ka̱shile.
5Adama a nannai dakakai ka̱ta̱ i doku ugaꞋin a̱ ubuta̱ wu uneki u ka̱ɗu u ɗa̱. Wuma wu ugaꞋin u tsu zuwa ta̱ vi yevesheke Ka̱shile mayin. 6Kuyeve ku Ka̱shile ku tsu zuwa ta̱ i yaꞋan n kureme ku ka̱ci ka̱ ɗa̱. Kureme ku ka̱ci ka̱ ɗa̱ kpamu ku tsu zuwa ta̱ i yaꞋan n ka̱lulu, ka̱lulu kpamu ka tsu zuwa ɗa̱ ta̱ i yaꞋan n ida̱shi i wuma i ɗa̱ adama a̱ Ka̱shile ra̱ka̱. 7I yongo baci nannai, yi ta̱ a kuciga itoku i ɗa̱. A ukocishi kpamu yi ta̱ a kuyaꞋan n ucigi u mayun a kubana u yaba dem. 8I lyaꞋa baci kelime n kuyaꞋan ili i singai i nam pa ya, yi ta̱ a̱ kusa̱nka̱ ɗa̱ kokpo ili i gbani, ka̱ta̱ i zuwa ɗa̱ i yaꞋan ili n a̱bunda̱i adama e kuyeve ku ɗa̱ ku Vuzagbayin vu tsu Yesu Kirisiti Kishi. 9Amma uma a nan lo a na a iwain kugbonguro a̱ ubuta̱ wi ili i singai i nam pa, a̱yimba̱ a ɗa, ko e kene mayin ba. A cinukpa ta̱ ɗe a na Ka̱shile ka̱ za̱Ꞌi le a̱ ubuta̱ u wuma u kuku u le.
10Uma a̱ va̱, adama a nannai, ka̱ta̱ i doku i gbagbala kuyaꞋan ulinga adama a na i yotsongu yaba dem an Ka̱shile ke ɗekei ɗa̱ mayun, ka̱ta̱ i yotsongu le a na u zagbai ɗa̱ yo okpo uma a̱ ni. YaꞋin nannai ka̱ta̱ i ciya̱ i kpa̱ɗa̱ kuta̱ɗa̱tsa̱ ka̱ta̱ feu i kpa̱ɗa̱ kuyikpa̱. 11Nannai ɗa ta na Ka̱shile ka kurabasa ɗa̱ ka̱ta̱ wi isa ɗa̱ mayin o tsugono tsu Vuzagbayin vu tsu Yesu Kirisiti Kishi.
Zuwa atsuvu a̱ ubuta̱ wa akaka a̱ Ka̱shile
12I yeve ta̱ ɗe ili i nam pa, ɗa yi kpamu a kashani a̱ ubuta̱ wi ili i mayun n utsura. Ko n nannai, n sheshe ta̱ kulyaꞋa kelime n kuciɓaka ɗa̱ n ili i nam pa ya. 13U gaꞋan ta̱ n lyaꞋa kelime n kuciɓaka ɗa̱ n ili i nam pa ya, ali sai kanna ka na n kuwa̱i. 14Vuzagbayin Yesu Kishi kpamu u yotsongu mu ta̱ ɗe a na mi a̱ kukuwa̱ babu megeshe. 15Adama a nannai, mi ta̱ a kudakaka ulinga adama a na n zuwa ili i nam pa yo okpo hawun wa̱ ɗa̱. N ciga ta̱ i ciɓasa i ɗa ayin n a̱bunda̱i ko n kuwa̱ baci.
16Ana tsu danai ɗa̱ uteku u na Vuzagbayin vu tsu Yesu Kishi u kubono n utsura, ci a kudana ɗa̱ arabali o ugboji a na vuza yoku u ɓatsai ba. Ta nannai ba! Amma ce ene ta̱ tsugbayin tsu mayun ci ni n a̱shi a̱ tsu. 17Ka̱shile Dada u nekei ni tsugbayin a na u yaꞋin meɗevile n ka̱la̱ka̱tsu ku utsura n ka singai a̱ Ubuta̱ u Tsugbayin, u danai, “Na va maku mu ucigi ma̱ va̱ maꞋa, mi ta̱ a kupana uyoꞋo u ni ka̱u.” 18A̱tsu a̱ ka̱ci ka̱ tsu ci ta̱ ɗe koɓolo n Yesu a kusan ku ciɗa ka, ɗa tsu panai ka̱la̱ka̱tsu ka ku uta̱i gaɗi.
19Ili i nam pa ya ra̱ka̱ i zuwa tsu ta̱ ɗa tsu doku tsu ushuki a na ili i na eneki a danai mayun ɗa. Adama a nannai i zuwa atsuvu mayin a̱ ubuta̱ wa akaka e le, uteku u na va kuyaꞋan m ma̱kuni ma na mi e kuneke kutashi a̱ ubuta̱ u ka̱yimbi u yoku. LyaꞋi kelime n kuyaꞋan nannai ali sai a kanna ka na Kirisiti Kishi u kubono ka̱ta̱ kutashi ku hawun ku ni ka akana a̱ɗu a̱ ɗa̱.#1:19 Udani u nam pa n ci Helene u ɗaɗa, “sai kanna ko kotso ka̱ta̱ kazangata ku usana ku uta̱ a̱ a̱ɗu a̱ ɗa̱”. 20Ili i na i laꞋi i ɗaɗa, ka̱ta̱ i yeve a na kene ki lo a Katagarda ka Ciɗa ku na ku uta̱i a̱ ubuta̱ u eneki n ka̱ci ke le ba.#1:20 Uye u yoku u na ve kuyeve udani n ci Helene u ɗa na, “U gaꞋan ta̱ i yeve babu vuza na u kuyeve akaka e eneki n ka̱ci ka̱ ni”. 21Eneki a a yaꞋan kadanshi adama a na ele a̱ ka̱ci ke le a cigai kuyaꞋan kadanshi ba. A̱Ꞌa̱, ta nannai ba! Ayinviki a̱ Ka̱shile a ɗa a zuwai le a dansa akaka a̱ Ka̱shile.
Currently Selected:
2 Biturusu 1: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
