1 Biturusu 5

Kuyotsongusu nkoshi m gba̱ra̱-gba̱ra̱

1Gogo na, mi ta̱ a kadanshi nu nkoshi gba̱ra̱-gba̱ra̱† ma aza e Yesu. Mpa feu mokoshi ma̱ gba̱ra̱ maꞋa, nu ngan ma atakaci n Kishi. Mi ta̱ kpamu a kuꞋuwa a̱ ubuta̱ u tsugbayin ci ni a ayin a na u bonoi. 2Uteku u na nguɓi n ci inda nlala n le, mayun ɗa yi inda yaba dem vu na Ka̱shile ka zuwakai ɗa̱ e ekiye a̱ ɗa̱ i la̱na̱. YaꞋin nannai adama a na i ciga ta̱ kuyaꞋan, ka̱ta̱ i yaꞋan mololo ba. YaꞋin nannai adama a na i pana ta̱ uyoꞋo u kuyaꞋanka Ka̱shile tsugbashi. Ka̱ta̱ i zuwa a̱ɗu a̱ ɗa̱ a̱ ubuta̱ wi ili ya aduniyan i na i kuciya̱ ba. 3Ka̱ta̱ i zuwa ka̱ci ka̱ ɗa̱ an azagbagbaꞋin a kuɓarangu uma ba, amma zuwai ka̱ci ka̱ ɗa̱ we le an agisana a ili i singai. 4Tsu nan lo ta na, Maguɓi ma Gbayin ma mo bono baci, wi ta̱ e kuneke wu katsupu a ayin a na vu uwai a tsugbayin ci ni tsu babu uteku.

5A̱ɗa̱ a̱ɗenga̱ni, ushuki n tsugbayin tsu nkoshi m gba̱ra̱gba̱ra̱. Ra̱ka̱ vu ɗa̱ kpamu, i ɓa̱nka̱na̱i an agbashi a babu a̱ra̱ɗi, adama a na,

“Ka̱shile ki ta̱ a tsurala n uma a na i n ugbamukaci,

amma u ci neke ta̱ ugaꞋin u ni a̱ ubuta̱ u uma a na i babu a̱ra̱ɗi.”#An. 3:34.

6Adama a nannai, bonokoi ka̱ci ka̱ ɗa̱ babu a̱ra̱ɗi a̱ ubuta̱ wu utsura u Ka̱shile. Nannai ayin a na a gaꞋin a yawa baci, wi ta̱ a̱ kuɗengusa̱ ɗa̱ ka̱u. 7Nekei Ka̱shile ili i na yi a kutakacika ɗa̱ ra̱ka̱ adama a na a̱yi wi ta̱ a̱ kula̱na̱ ɗa̱.

8Yongoi a kindi tutu, ka̱ta̱ kpamu i yongo ufoɓushi ayin tutu. Kalijani† vurala vu ɗa̱ ɗa, wi ta̱ a̱ ka̱ka̱ra̱sa̱ an kawu a̱ kula̱nsa̱ vuza a na u kureme u takuma. 9Yongoi n utsura a̱ ubuta̱ wi ili i na i nekei ka̱ɗu, tsu nan lo ta na yi ta̱ a kufuɗa kushilika̱ n a̱yi n utsura u Ka̱shile. Ciɓai a na aza o Kutoni a̱ ubuta̱ dem a aduniyan i ta̱ feu o kusoꞋo icuꞋu ya atakaci i nam pa ya.

10A ayin a na baci i soꞋi atakaci a ayin kenu, Ka̱shile n ka̱ci ka̱ ni wi ta̱ a kulapula ili, wi ta̱ a kuzuwa a̱ɗu a̱ ɗa̱ o okpo n utsura, ka̱ta̱ kpamu u zuwa ɗa̱ i shamgba mayin n utsura. U ci yaꞋan ta̱ nannai adama a na a̱yi wi ta̱ n ugaꞋin. U zuwa ɗa̱ ta̱ i uwa a̱ ubuta̱ u tsugbayin u ni u babu uteku, a ayin a na baci u ɓolongi ɗa̱ koɓolo n Kishi. 11Ka̱shile ki ta̱ a kulyaꞋa tsugono ci ili dem babu uteku. Ta nannai.

Ikya̱shi

12N ɗika ta̱ Sila tsu toku vu va̱, a̱yi kpamu vuza ɗa vu na mu ushuku n a̱yi. U ɓa̱nka̱ mu ta̱ kuɗana katagarda ka akaka ke kenu ka nam pa. Ili i na i zuwai ɗa n ɗanai kaꞋa, ɗaɗa adama a na n dokusu ɗa̱ utsura u ka̱ɗu ka̱ta̱ n dana ɗa̱ uteku u na Ka̱shile ki n ugaꞋin mayun, i ciya̱ i lyaꞋa kelime n kuneke a̱ɗu wa̱ ni. 13Aza o Kutoni a na i na Babila#5:13 Eyevi a Katagarda ka Ciɗa a danai “Babila” kula ku yoku ku ɗa ku na e ci ɗeke Roma.† a̱ suꞋuku ɗa̱ ta̱ n ikya̱shi. Ka̱shile ka zagba le ta̱ feu uteku u na u zagbai ɗa̱. Maku ma̱ va̱ Marukusu u suꞋuku ɗa̱ ta̱ feu n ikya̱shi. 14Kya̱sa̱na̱i mayin n ucigi wa aza o Kutoni. N vasa ta̱ Ka̱shile ke neke ma̱ta̱na̱ u yaba dem vu na wi vuza vu Kirisiti Kishi.

Currently Selected:

1 Biturusu 5: asgNT

Highlight

Copy

Compare