2 Korintiya 6
6
1Ci ta̱ ulinga koɓolo n Ka̱shile, tsu folono ɗa̱ ta̱ kpamu ka̱ta̱ i iwan kasingai ka̱ Ka̱shile ba. 2Ka̱shile ka dana ta̱ a Katagarda ka Ciɗa ka̱ ni,
“Ana ayin a na n zagbai a yawai,
M pana ta̱ avasa a̱ ɗa̱.
M ɓa̱nka̱ ɗa̱ ta̱ a kanna ka wishi.”#Ish. 49:8.†
Mayun ɗa, Ka̱shile ki ta̱ ufoɓushi adama a na u ɓa̱nka̱ ɗa̱ gogo na. Anana ɗa kanna ka wishi.
Atakaci a̱ Bulusu
3Ci ciga uma a yaꞋan kadanshi ka̱ kula̱nga̱su adama a ulinga wa ba, adama a na ili i na ci yaꞋin dem i zuwa uma kuta̱ɗa̱tsa̱ ba. 4Ili i na baci ci yaꞋin dem, ci yotsongu ta̱ a na a̱tsu agbashi a mayun a ɗa ci a̱ Ka̱shile. Ɗa tsu gbamai asuvu n atakaci a na i lo dem. 5A tsu lapa tsu ta̱ ayin o yoku. Ka̱ta̱ a zuwa tsu a̱ kunu ku ugbashi. Ka̱bunda̱i ka uma ka ci yaꞋan ta̱ wupa n a̱tsu, ka̱ta̱ a̱ ka̱na̱ vishili vu ka̱bunda̱i. Ci yaꞋansa ta̱ ulinga ali tso oꞋoi n a̱bunda̱i. Kayin kakau tsu tsu lata ba. Ubuta̱ u yoku tsu namba tsuwaꞋa. 6Ci yotsongu ta̱ ka̱ci ka̱ tsu a na a̱tsu agbashi a̱ Ka̱shile a ɗa, adama a na ci reme ta̱ ka̱ci ka̱ tsu ɗa ci ciɗa, ci ta̱ kpamu n kuyeve ku na Ka̱shile ke ci neke. Ci yaꞋan mololo ba. Ci yaꞋanka ta̱ uma kasingai. Ci ta̱ n utsura wa Ayinviki a̱ Ka̱shile, mayun ɗa kpamu ci cigai uma. 7Tsu dana ta̱ uma akaka a̱ Ka̱shile a mayun, u ci neke tsu ta̱ kpamu utsura. Ci ta̱ n ciɗa vu na vo okpoi an kotokobi ka̱ tsu m ma̱ra̱ga̱ ma na ci cigai adama o kuvon. 8Ci yaꞋanka ta̱ Ka̱shile tsugbashi ko uma e neke tsu tsugbayin, ko o goyo tsu. Ci yaꞋanka ta̱ Ka̱shile tsugbashi ko uma a cikpa tsu, ko e ɗeke tsu n kula ku gbani-gbani. Uma a bankai nsata n tsu a dana a̱tsu aza a aꞋuwa a ɗa, amma ayin tutu tsu dansa ta̱ ili i mayun. 9Yaba dem u yeve tsu ta̱, amma a yaꞋankai tsu adanshi e yeve tsu kpamu ba. Ci yongo ta̱ adanshi ukpa̱ wi ta̱ lo ɗevu, amma a̱tsu ɗa na, tsu buwai n wuma. Tsu soꞋo ta̱ atakaci n a̱bunda̱i, amma a una tsu ba. 10Ayin tutu ci yongo ta̱ a̱ ma̱za̱nga̱, ali n ayin a na ci o kusoꞋo atakaci. Aza a unambi a ɗa ci, amma ci ta̱ a kuzuwa uma n a̱bunda̱i o kokpo aza a uciyi a̱ ubuta̱ wu uneki wa̱ a̱ɗu. Ci n ili ba, amma mayun ɗa a na ci n ili dem.
11A̱ɗa̱ uma o Korintiya, ci yaꞋanka ɗa̱ ta̱ kadanshi magaba. A̱ɗu a̱ tsu a shana ta̱ n ucigi a kubana wa̱ ɗa̱. 12Tsu ka̱sa̱kpa̱ kuciga ɗa̱ ba, amma a̱ɗa̱ i bula̱ ta̱ kuciga tsu. 13Mi ta̱ a kuyaꞋanka ɗa̱ kadanshi gogo na tsu na n kudansuka muku n va̱. Cigai tsu derere tsu na ci cigai ɗa̱.
A̱Ꞌisa̱ a̱ Ka̱shile vuza wuma
14Ka̱ta̱ i yongo ili i te koɓolo n aza a na a̱ kpa̱ɗa̱i kuneke a̱ɗu n Kishi ba. Kasingai n kagbani-gbani o ci yongo a̱ ubuta̱ u te ba. Kutashi n ka̱yimbi a ci shamgba a̱ ubuta̱ u te ba. 15Nini ɗai Kirisiti Kishi m MalyaꞋi a kulyaꞋa cija̱Ꞌa̱? Nini ɗai vuza na u nekei ka̱ɗu n vuza na u kpa̱ɗa̱i kuneke ka̱ɗu o kokpo vuza n vutoku? 16A̱Ꞌisa̱ a̱ Ka̱shile o kuyongo a̱ ubuta̱ u te n a̱ma̱li ba. A̱tsu ɗa ta na a̱Ꞌisa̱ a̱ Ka̱shile vuza vu wuma. Ka̱shile ka danai, “Mi ta̱ a̱ kuda̱sa̱ngu n ele ka̱ta̱ n wala koɓolo n ele. Mi ta̱ o kokpo Ka̱shile ke le, ele tamkpamu o okpo uma a̱ va̱.”#A.Gan. 26:12; Ij. 37:27.
17Adama a nannai, Vuzavaguɗu u danai,
“Uta̱i punu we le ka̱ta̱ i ɓolongu n ele ba.
Ka̱ta̱ i saꞋwa ili yu unata i na Wila̱ u sa̱nka̱i ba,
nannai ɗa n kisa ɗa̱.”#Ish. 52:11; Ij. 20:34.
18Vuzavaguɗu MalaꞋimili u danai,
“Mi ta̱ o kokpo Esheku a̱ ɗa̱,
ka̱ta̱ a̱ɗa̱ tamkpamu yo okpo muku n va̱.”#2 Sam. 7:14.
Currently Selected:
2 Korintiya 6: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
