2 Korintiya 5

1Gogo na ci yeve ta̱ a talukpa baci ka̱pa̱m ka̱ tsu a̱ ubuta̱ u na ci o kuyongo: ɗaɗa, ayin a na baci tsu kuwa̱i ɗa tsu ka̱sa̱kpa̱i ikyamba i nam pa, Ka̱shile ki ta̱ o kufoɓusoko tsu kpaꞋa adama a na ci yongo ɗe. Ubuta̱ u na a̱yi a̱ ka̱ci ka̱ ni u yaꞋin, u na u kukotso ba. 2Tso oꞋo ta̱ ɗe n ikyamba i na ci n i ɗa gogo na, ci ciga ta̱ kanna ka nan lo ka̱u ka na tsa kuꞋuka ikyamba i savu i tsu na ɗe gaɗi tsa aminya a savu. 3A ayin a nan lo tso kokpo oshomboɗi ba, adama a na tsu uka ta̱ ɗe ikyamba i savu na ɗe gaɗi. 4Ayin a na ci o kuyongo n ikyamba i nam pa, ci ta̱ n a̱miki, ɗa kpamu tsu soꞋi atakaci. Amma ci ciga ku ka̱sa̱kpa̱ ikyamba i kukuwa̱ i nam pa adama o woꞋi wi ikyamba u nam pa ba. Ci ciga ta̱ tsu sabaꞋa i ɗa ka̱ta̱ ci ɗika i na i kukuwa̱ ba. 5Ka̱shile a̱ ka̱ci ka̱ ni u foɓuso tsu ta̱ ɗe adama a nam pa, u neke tsu ta̱ Ayinviki a̱ Ka̱shile tsu uzuwi u kaguta u na u kuyotsongu a na wuma u savu u nam pa wa ili i mayun i ɗa.

6Adama a nannai, ayin tutu ci ta̱ n ka̱ɗu uvaꞋanki. Ci yeve ta̱ ci baci n wuma a ikyamba i nam pa, ci a kpaꞋa a̱ ubuta̱ u te n Vuzagbayin ba. 7Wi ta̱ nannai adama a na ci ta̱ o kutono ili i na ci nekei a̱ɗu, amma ci o kutono ili i na ci e kene ba. 8I ɗaɗa ci yeve ta̱ ci ta̱ n utsura u ka̱ɗu. Tsu laꞋa ta̱ n kuciga tsu ka̱sa̱kpa̱ ikyamba i nam pa ya adama a na tsu bana a kpaꞋa ku te u Vuzagbayin. 9Ci baci n wuma punu a ikyamba i nam pa, ko ci baci n wuma ba, uteku u na ci cigai u ɗaɗa ci yaꞋan ili i na u kupana uyoꞋo, u laꞋa ta̱ ili i na i buwai dem. 10Ili i na i zuwai i ɗaɗa, kanna ke te, ra̱ka̱ vu tsu ci ta̱ a kushamgba e kelime ka̱ Kirisiti Kishi ka̱ta̱ u yaꞋanka tsu afada. Yaba dem vu tsu wi ta̱ a kisa katsupu ka na ka gaꞋin adama a ili i na ci yaꞋin a ayin a na ci n wuma wi ikyamba i nam pa, ko i singai i ɗa ko i gbani-gbani.

Kutuka̱ n uma u Ka̱shile

11Adama a na ci yeve ta̱ tsu pana ta̱ wovon u Vuzagbayin, ɗaɗa tsu dakakai adama a na uma o bono o tono yi. Ka̱shile ke yeve ta̱ tsu na ci mayun. Ci ciga ta̱ i yeve icuꞋu i uma i na ci. 12Ci a kuyaꞋanka ɗa̱ a̱ra̱ɗi ba, amma ci ta̱ a kudana ɗa̱ ukuna u ka̱ci ka̱ tsu ka̱ta̱ i ciya̱ i yaꞋan ma̱za̱nga̱ adama a̱ tsu. Tsu dana ta̱ ili i nam pa ka̱ta̱ i ciya̱ ili i na i kudana, yi baci koɓolo n aza a na i n ukuna u mayun ba, ɗa kpamu i a̱ra̱ɗi a̱ ubuta̱ wa aza o yoku. 13Ci yaꞋan baci adanshi ci ta̱ a kujara, adama a na e neke Ka̱shile tsugbayin ɗa. Ci baci n aci a̱ tsu mayin, adama a na tsu ɓa̱nka̱ ɗa̱ ɗa.

14Ili i na baci ci yaꞋin dem, ci yaꞋan ta̱ i ɗa adama a na ucigi u Kirisiti Kishi u ɗa wi o kutono n a̱tsu. Ci neke ta̱ kpamu a̱ɗu a na vuma vi te Kirisiti Kishi u kuwa̱i adama a yaba dem, adama a nannai, tsu ushuku ta̱ a na a̱tsu tsu kuwa̱i ra̱ka̱. 15U kuwa̱ ta̱ u ciya̱ wi isa yaba dem, adama a aza a na a̱ ciya̱i wuma u savu adama a̱ ni o doku o yongo tsu na a̱ kuɓa̱nka̱ ka̱ci ke le koci ba. Amma a kucikpa, o yongo tsu na Kirisiti Kishi u kupana uyoꞋo, vuza na u kuwa̱i ɗa u ɗenga̱i n wuma adama a na wi isa le.

16Tsu ka̱sa̱kpa̱ ta̱ kuyaꞋanka uma afada tsu na aduniyan a ci yaꞋan. Ci ishi ta̱ ci sheshe ukuna u Kirisiti Kishi tsu na uma a aduniyan e ci sheshe, amma gogo na tsu doku ci yaꞋan nannai ba. 17Vuza na baci u ɓolongi ka̱ci ka̱ ni n Kirisiti Kishi, Ka̱shile ko bonoko yi ta̱ vuma vu savu. Ili i kuku i ni i kotso ta̱ ɗa i lazai. Ka̱shile ko bonoko ta̱ ili ra̱ka̱ i bonoi usavu.

18Ka̱shile kaꞋa ka yaꞋin ili i nam pa ra̱ka̱. U tuka̱i tsu ɗevu n a̱yi adama a ili i na Kirisiti Kishi u yaꞋin. U nekei tsu ulinga u kutuka̱ n uma ɗevu n a̱yi feu. 19Akaka a̱ tsu a ɗaɗa Ka̱shile ko yongo ta̱ a̱ kutuka̱ n uma ra̱ka̱ ɗevu n ka̱ci ka̱ ni a̱ ubuta̱ u Kirisiti Kishi. Ka̱shile ka ci ciɓasa n unushi u le ba. Ɗa u nekei tsu akaka a nam pa a̱ ma̱ta̱na̱.

20Ka̱shile ka̱ suki tsu tso okpo anan taji vu kusala ukuna u Kirisiti Kishi, wi ta̱ kpamu o kufolono ɗa̱ i pana akaka a̱ tsu. Ci yaꞋan ta̱ kadanshi adama a̱ Kishi, tsu folono ɗa̱ ta̱ i ka̱sa̱kpa̱ Ka̱shile ka̱ tuka̱ ɗa̱ ɗevu n a̱yi. 21Kishi u saꞋwa kuyaꞋan unushi ba! Amma Ka̱shile ko bonokoi ni vuza vu unushi, adama a na Kirisiti Kishi u zuwai tso okpoi aza a̱ usuɓi u Ka̱shile.

Currently Selected:

2 Korintiya 5: asgNT

Highlight

Copy

Compare