1 Timoti 4

A dansukai nlum ma aꞋuwa

1Amma Ayinviki a̱ Ka̱shile a dana tsu ta̱ hawun a ayin o ukocishi uma o yoku i ta̱ a̱ kuka̱sa̱kpa̱ kuneke a̱ɗu e le a̱ ubuta̱ wi ili i mayun. I ta̱ a kukucikpa kutono wunla̱i u gbani-gbani u na u ci ya̱nsa̱ ka̱ta̱ u yaꞋan aꞋuwa. Ka̱ta̱ kpamu o tono kuyotsongusu ka alingata a Kalijani. 2Uma a na o ci yotsongu ili i te ka̱ta̱ a yaꞋan ili i yoku kau, ele ɗa i a̱ kutuka̱ n kuyotsongusu ku wunla̱i u gbani-gbani ku nam pa. Asuvu a uma a nam pa i ta̱ ukpa̱, an ukpan wi ikyamba u na o songi n viyum vu usuɗukpi. 3Nlum n nam pa ma n dana ta̱ u gaꞋan a yaꞋan yolo ba, ɗa kpamu e nekei uma wila̱ u kulyaꞋa ilikulyaꞋa i yoku. Amma Ka̱shile ka yaꞋan ta̱ ili i kulyaꞋa i nam pa adama a uma a na e yeve ili i mayun ɗa kpamu e nekei a̱ɗu n ili i mayun, a lyaꞋa i ɗa ka̱ta̱ a cikpa Ka̱shile. 4Adama a na ili i na Ka̱shile ka yaꞋin dem i singai i ɗa, ka̱ta̱ ci iwan ko ili i te ba. U yotso ta̱ ci isa i ɗa m ma̱za̱nga̱, n a̱ɗu a kucikpa Ka̱shile. 5Ci yeve ta̱ ili ya yo okpo ta̱ ciɗa a̱ ubuta̱ u kadanshi ka̱ Ka̱shile n avasa.

6Vi yotsongu aza o Kutoni ili i nam pa. Vi yaꞋan baci nannai, vi ta̱ o kokpo kagbashi ka singai ke Yesu Kishi. Avu kpamu n ka̱ci ka̱ nu, vi ta̱ o kugbonguro n utsura a̱ ubuta̱ u kadanshi ka mayun ka na ci nekei a̱ɗu n kuyotsongusu ku singai ku na vi o kutono. 7Ka̱ta̱ vu zuwa atsuvu a̱ nu a̱ ubuta̱ wa arabali a aꞋuwa ba, a na a kuzuwa wu vi cinukpa n Ka̱shile, ko iteꞋe i kavama i na yi babu kaci. Ili i na va kuyaꞋan i ɗa na: dakaka ka̱u adama a na vi yaꞋan utsura a̱ ubuta̱ wu ulinga u singai uteku u na Ka̱shile ki n kasingai ka̱u. 8U gaꞋan ta̱ vi yaꞋan ulinga ka̱ta̱ vu zuwa ikyamba i nu i tsurakpa, amma vi yaꞋan baci wuma adama a na Ka̱shile ka pana uyoꞋo, u kutuka̱ wu ta̱ n ili i singai a̱ ubuta̱ wi ili dem. Wi ta̱ n ugaꞋin tsu na vi o kuyongo gogo na, wi ta̱ kpamu a kugaꞋan a wuma u na wi a̱ kuta̱wa̱ na kelime.

9Akaka a nam pa mayun ɗa, u yotso ta̱ kpamu yaba dem wu ushuku n kaꞋa. 10Ci ci yaꞋan ta̱ ulinga ka̱u n tsu soꞋi atakaci, adama a na uma e neke a̱ɗu a̱ ubuta̱ u kadanshi ka mayun. Ci yaꞋan ta̱ nannai adama a na a̱pa̱Ꞌa̱ a̱ tsu i ta̱ u Ka̱shile, vuza na wi n wuma. A̱yi ɗa Kishi ka uma ra̱ka̱, wi ta̱ a kudana tsu Ka̱shile ki ta̱ a kisa aza a na e nekei a̱ɗu dem.

11Yotsongu ili i nam pa ka̱ta̱ vu zuwa yaba dem u piꞋisa i ɗa. 12Ka̱ta̱ vu ka̱sa̱kpa̱ vuza u goyo wu a na vi ushan u kenu ba. Amma vo okpo an agisana a singai a̱ ubuta̱ wa aza o Kutoni ra̱ka̱. Vo okpo agisana a̱ ubuta̱ u kadanshi, n ubuta̱ wi ida̱shi i ma̱riki i nu. Vo okpo agisana a ucigi n kuneke ku ka̱ɗu n ida̱shi i ciɗa a̱ ubuta̱ u yolo. 13LyaꞋa kelime n kukeceke uma Kadanshi ka̱ Ka̱shile, ka̱ta̱ vu dansa kaꞋa hawun ka̱ta̱ vu lyaꞋa kelime n kuyotsongusu le kaꞋa. YaꞋan ili i nam pa sapu n ta̱wa̱ wa̱ nu. 14Ka̱ta̱ vi iwan kuneꞋe ku singai ku na vi isai a̱ ubuta̱ u Ka̱shile ba, ana nkoshi m gba̱ra̱-gba̱ra̱ ma aza o Kutoni a kiyangi ekiye e le a̱ nu, ɗa a dansai kadanshi ka̱ Ka̱shile adama a̱ nu.

15YaꞋan ili i nam pa n utsura u nu ra̱ka̱. YaꞋan ulinga mayin adama a na yaba dem we ene kulyaꞋa ku kelime ku nu. 16Goɗumo ka̱ci ka̱ nu mayin ka̱ta̱ vu la̱na̱ kuyotsongusu ku nu mayin kpamu. YaꞋan mayin n ili i na yi derere, vi yaꞋan baci nannai Ka̱shile kpamu ki ta̱ a kisa wu, n aza a na a panakai nu.

Currently Selected:

1 Timoti 4: asgNT

Highlight

Copy

Compare