1 Timoti 5

Odoki a̱ ubuta̱ u kuyaꞋan kadanshi n uma o yoku

1Ka̱ta̱ vi yaꞋanka vuza vu gba̱ra̱ kadanshi n wali ba, amma vu tono yi sawu adanshi eshevu a ɗa. YaꞋan kadanshi n ushan u wawaꞋa adanshi vi ta̱ a kuyaꞋan kadanshi n anan ambu. 2YaꞋanka a̱ma̱ci a̱ gba̱ra̱gba̱ra̱ tsu na va kuyaꞋan n a̱na̱vu, ka̱ta̱ kpamu vu ɓarangu nkere mayin adanshi atavu a ɗa.

3Aza o Kutoni a̱ la̱na̱ agapa a̱ a̱ma̱ci de dem a na ali e le a̱ kuwa̱i, ɗa i babu aza a na a̱ kuɓa̱nka̱ le. 4Amma wi baci m muku ko ntsukaya, i ta̱ n ulinga u singai u na a kuyaꞋan ka̱ta̱ o yotsongu ugaꞋin u Ka̱shile punu a iꞋuwa i le a̱ la̱na̱ baci mmaci n le. Nahannai ɗaɗa a kufuɗa a tsupa mmaci n le, adama a uteku u na a̱ la̱na̱i muku n le. Nahannai va feu ili i ɗa i na Ka̱shile ka panai uyoꞋo ka̱u.

5Gogo na vuka vu na vi kagapa mayun, vuza na wi endeꞋen a aduniyan a nam pa, vuka vu nan lo u keɗe ta̱ a̱pa̱Ꞌa̱ a̱ ni a̱ ubuta̱ u Ka̱shile. U tsu folono ta̱ Ka̱shile ka̱ ɓa̱nka̱ yi kanna n kayin dem. U ci yaꞋan ta̱ kavasa ayin dem. 6Amma kagapa ka na ki o kuyongo adama a na u pana uyoꞋo koci wi ta̱ ukpa̱ a̱ ka̱ɗu ka̱ ni ko an wi n wuma. 7Avu neke kadanshi ka nam pa wa aza o Kutoni ra̱ka̱, adama a na o okpo ciɗa a̱ ubuta̱ u uma. 8Amma uma a na a iwain kuɓa̱na̱ mmaci n le, ali n limata i kpaꞋa i le, a nana ta̱ ili i na ci nekei ka̱ɗu. Uma a nan lo kpamu a laꞋa ta̱ biꞋi Aza̱ka̱yimbi n kuna̱mgba̱.

9Agapa a na a kufuɗa kuɓa̱nka̱ sai a yawa a̱ya̱ amangatatsu, sai kpamu o yongo m ma̱riki nu ngasa n ali e le. 10Sai kpamu yaba dem u cikpa le adama a ili i singai i na a yaꞋin. Ili i singai tsu nam pa: A̱ ɗengusa̱ ta̱ muku n le mayin? A yaꞋanka ta̱ omoci ili i singai? A yaꞋanka ta̱ aza o Kutoni tsugbashi babu a̱ra̱ɗi? A̱ ɓa̱nka̱ ta̱ aza a na a uwai a kadama? O foɓuso ta̱ kuyaꞋan ili i singai ayin tutu?

11Ka̱ta̱ aza o Kutoni a̱ ɓa̱nka̱ agapa a wawaꞋa nannai ba. Ili i na i zuwai i ɗaɗa ucigi u kupana uyoꞋo wi ikyamba wa agapa a wawaꞋa wi ta̱ a kulaꞋa ucigi u na a yaꞋankai Kishi ka̱ta̱ a cikala kuyaꞋan yolo kpamu. 12Ka̱ta̱ ta na a̱ tuka̱ ka̱ci ke le afada adama a na o koɗo ta̱ uzuwakpani u le n Kishi.#5:12 “Kukoɗo uzuwakpani u le n Kishi” m mani-mani ɗe, kafu a̱ ɓa̱nka̱ kagapa ka vuka ka̱u ka na vali vi ni vu kuwa̱i, sai u yaꞋan uzuwakpani n a̱Ꞌisa̱ wi o kudoku kuyaꞋan yolo ba, adama a na u yaꞋanka Kishi tsugbashi. 13I ta̱ feu a kufuɗa kokpo orogo, ka̱ta̱ a̱ gita̱ kutono kpaꞋa kpaꞋa n a yaꞋin kuyun. I ta̱ a kupana uyoꞋo u kuꞋuwa kadanshi ka uma ka na ka burai le ba, ka̱ta̱ a dansa ili i na i yotsoi a dansa ba. 14Adama a nannai, mi ta̱ a kuyaꞋanka agapa a wawaꞋa a nam pa odoki a yaꞋan yolo kpamu. A matsa muku, ka̱ta̱ kpamu a̱ la̱na̱ iꞋuwa i le mayin. Nannai ɗa vurala vu le va̱ kukpa̱ɗa̱ kufuɗa kudansuka le. 15Ele vi yoku a̱ puwa̱nka̱ ta̱ ɗe, ɗa o bonoi kutono MalyaꞋi gogo na.

16Vuka vu na vi vuza vu Kutoni vi baci n aza a̱ ni a na i agapa, u la̱na̱ le ka̱ta̱ u ka̱sa̱kpa̱ka̱ aza o Kutoni a ɗika a̱miki a̱ kuɓa̱na̱ le ba. Aza o Kutoni tamkpamu a̱ ɓa̱na̱ agapa a na i endeꞋen le mayun.

17Nkoshi m gba̱ra̱gba̱ra̱ n na a yaꞋin ulinga u le mayin a yawa ta̱ e neke le tsugbayin mayin n katsupu derere. Na va mayun ɗa ali a̱ ubuta̱ wa aza a na i a kudansa kadanshi ka̱ Ka̱shile, ɗa i o kuyotsongusu ili i mayun i Ka̱shile. 18Ili i na a ɗanai a Kadanshi ka̱ Ka̱shile i ɗa na: “Ka̱ta̱ vu zuwaka kanaka mojibo a ayin a na wi a ulinga a̱ ubuta̱ wi ilya ba,” ɗa kpamu o doku a ɗanai, “U gaꞋan ta̱ vuza vu ulinga u ciya̱ katsupu ka̱ ni.”

19Ka̱ta̱ vu ushuku n kadanshi ka na ka̱ kula̱nga̱sa̱ mokoshi ma̱ gba̱ra̱ ba, sai vi ciya̱ ngan n re ko n tatsu n na mu ushuki a na kadanshi ka mayun ɗa. 20Ɓarangu mokoshi ma̱ gba̱ra̱ ma na ma nusai, dansuka yi lo e kelime ka aza o Kutoni lo dem e kene ra̱ka̱. YaꞋan nannai adama a aza a na o okpoi a pana wovon u kuyaꞋan unushi.#Mat. 18:15-17.

21N dana wu ta̱ kadanshi ka nam pa a̱ ubuta̱ u Ka̱shile, n ubuta̱ u Yesu Kishi, n ubuta̱ wa alingata a na Ka̱shile ka zagbai. Ka̱ta̱ vu tono wila̱ u nam pa derere babu kuꞋiwan aza o yoku ko kaɗamgba.

22Ka̱ta̱ vi yaꞋan moloko ba, vi baci a kuzagba aza e kelime n kuzuwaka le ekiye. Ka̱ta̱ vu ɓolongu ka̱ci ka̱ nu n uma a̱ ubuta̱ u kuyaꞋan u unushi ba, amma vi yongo ciɗa.

23N yeve ta̱ ubuta̱ u yoku vu tsu vaku ta̱ mɓa̱la̱. Adama a nannai ka̱ta̱ vu soꞋo mini koci ba, amma vu satara m ma̱ra̱ kenu. Wi ta̱ a kuyaꞋan wu tsa̱ a̱guma̱.

24Ciɓa a na uma o yoku o tsu tono unushi, yaba dem u yeve ta̱ unushi wa kafu a yaꞋanka le afada. Amma uma o yoku i ta̱ lo a na a ci yaꞋan unushi, unushi u le kpamu wi ta̱ a̱ kuta̱ e keteshe a kubana megeshe. 25Ta kpamu nannai, uma o yoku i ta̱ lo a na a ci yaꞋan ili i singai, yaba dem kpamu u yeve ta̱ i ɗa. Amma uma o yoku i ta̱ lo feu a na a ci yaꞋan ili i singai amma vuza u ci yeve i ɗa ba, sai a kubana ayin o yoku.

Currently Selected:

1 Timoti 5: asgNT

Highlight

Copy

Compare