1 Timoti 3
3
Wila̱ wa aza e kelime
1Udani u nam pa wa mayun ɗa, vuza na baci u cigai wo okpo mokoshi ma gbayin† ma aza o Kutoni, u ciga ta̱ u yaꞋan ili i na i gaꞋin a yaꞋan. 2Mokoshi ma gbayin mayun ka̱ta̱ wo okpo vuza vi ili yi ishikushi i uma ba. U yaꞋan n vuka vi te, wo okpo vuza singai a̱ ubuta̱ u vuka vi ni. Wo okpo kpamu vuza na u kuka̱na̱ ka̱ci ka̱ ni n ugboji mayin. U yaꞋan kpamu vuza na uma a kudana wi ta̱ m ma̱riki. Wo okpo vuza na u kurabasa uma mayin n omoci a kpaꞋa ku ni, u yaꞋan n uyevi u kuyotsongusu mayin. 3Wo okpo kosoꞋi ka̱ ma̱ra̱ ba, n vuza ma lapaka gogoꞋo ba. Wo okpo vuma vu ka̱ɗu vu singai, n vuza na u kuciga ida̱shi i ma̱ta̱na̱. Ka̱ta̱ kpamu wo okpo vuza na u kuciga ikebe n a̱bunda̱i ba. 4Mayun ɗa u la̱na̱ kpaꞋa ku ni mayin, u yotsongusu muku n ni kpamu a cikpa yi ka̱ta̱ a panaka yi. 5U yeve baci kufoɓongu kpaꞋa ku ni ba, nini ɗai u kula̱na̱ aza o Kutoni a̱ Ka̱shile? 6Ka̱ta̱ wo okpo vuza vu Kutoni vu savu ba, ta lo wo kokpo yi ili ya̱ a̱ra̱ɗi a na e nekei ni tsugbayin gogoꞋo, tsu nan lo Ka̱shile ka yaꞋanka yi afada tsu na u kuyaꞋanka Kalijani. 7Uma a na kpamu i aza o Kutoni ba, a dansa kasingai adama a̱ ni. N tsu nannai kpamu i a kudansa kawuya adama a̱ ni ba, Kalijani kpamu ka kufuɗa kuka̱na̱ yi ba.
8Ta kpamu nannai, a̱ɓa̱nki† a aza o Kutoni#Azu. 6:1-7. o okpo aza a na uma a cikpai ɗa i n usuɓi kpamu. Ele kpamu o okpo osoꞋi a̱ ma̱ra̱ ba, ka̱ta̱ o okpo aza a na a kuciga kuciya̱ ikebe n a̱bunda̱i ba. 9Mayun ɗa o tono ili i mayun i gbayin i na Ka̱shile ko yotsongi tsu adama a ukuna wu uneki u ka̱ɗu wa aza o Kutoni. O yongo kpamu mayin n asuvu a̱ ka̱ɗu a singai. 10Kafu uma a zagba le o okpo a̱ɓa̱nki a aza o Kutoni, sai a yaꞋan biꞋi ulinga u yoku punu u uma wa u na u kokpo kukondo ku ma̱riki n kuyeve ku le. A yaꞋan baci ulinga wa mayin, i ta̱ a kufuɗa kuyaꞋan ulinga wa̱ a̱ɓa̱nki wa aza o Kutoni.
11Ta kpamu nannai, vuka vu ka̱ɓa̱nki dem wo okpo vuza na a cikpai, ka̱ta̱ u dansa i wuya u uma o yoku ba. Wo okpo vuka vu na u kuka̱na̱ ka̱ci ka̱ ni m mayun a̱ ubuta̱ wi ili dem mayin.
12Ka̱ɓa̱nki u yaꞋan n vuka vu te, ka̱ta̱ kpamu u yongo n a̱yi mayin. U yongo kpamu m muku n ni mayin n aza a kpaꞋa a̱ ni n tsuloboi. 13Aza a na a yaꞋin ulinga wa̱ a̱ɓa̱nki mayin i ta̱ a̱ kuciya̱ katsupu ka na uma a kucikpa le ka̱ta̱ o doku a̱ ciya̱ a̱ɗu ida̱shi a̱ ubuta̱ wu uneki wa̱ a̱ɗu n Yesu Kishi.
14-15N zuwa ta̱ kuta̱wa̱ wa̱ nu wa babu megeshe, amma yoku ba n kuyaꞋan ta̱ megeshe kenu. I ɗaɗa i zuwai ɗa n ɗanakai nu gogo na. Gogo na vu kuyeve ta̱ tsu na u yotsoi uma o yongo punu a kpaꞋa ku Ka̱shile. Uma a na i punu a kpaꞋa ku nam pa ele ɗa uma a na e nekei a̱ɗu n Kishi ɗa i uma a̱ Ka̱shile ka wuma. Na va ɗaɗa kpaꞋa ka aza o Kutoni, ku ɗa nshukpu n kumiꞋi ki ili i mayun.
16Na va ɗaɗa uneki u ka̱ɗu u gbayin u tsu u mayun u na Ka̱shile ki ishi ko sokongi ali gogo na:
Kishi ka̱ ta̱wa̱ ta̱ tsu vuma.
Ayinviki a̱ Ka̱shile o yotsongu ta̱ a̱yi ɗa Vuza vu ciɗa va.#Rom. 1:4.
Alingata e ene yi ta̱,
a danai umaci u uma dem.
Uma a̱ ubuta̱ kakau a aduniyan e neke ta̱ a̱ɗu n a̱yi,
ɗa Ka̱shile ka ɗika ni a kubana gaɗi.
Currently Selected:
1 Timoti 3: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
