1 Tosolonika 3
3
1Adama a nannai, ana ci a kufuɗa kuyongo babu tsu pana arabali a̱ ɗa̱ ba, ci sheshe ta̱ uteku u tsu ci yongo a Atina, 2ɗa tsu suki Timoti a kubana wa̱ ɗa̱. Wi ta̱ ulinga n a̱tsu tsu kagbashi ka̱ Ka̱shile a kudana kpamu kadanshi ka Arabali a Singai a̱ Kirisiti Kishi. Tsu suku yi ta̱ adama a na u zuwa ɗa̱ i yaꞋan utsura ka̱ta̱ u dokusu ɗa̱ utsura a̱ ubuta̱ wu uneki wa̱ a̱ɗu. 3Ci ciga a̱ɗu a̱ ɗa̱ a̱ muɗa̱ adama a atakaci a na yi o kusoꞋo ba. Ko n nannai, i yeve ta̱ ɗe a zagba tsu ta̱ adama a atakaci a nam pa.
4A ayin a na ci ishi koɓolo n a̱ɗa̱ tsu kushe ɗa̱ ta̱ tsu danai atakaci i ta̱ lo a̱ kuta̱wa̱ ɗa̱. I yeve ta̱ kpamu mayun a na a ɗa a̱ ta̱wa̱ ta̱ ɗe. 5N yeve ta̱ atakaci a̱ ɗa̱, mi a kufuɗa mo yongo babu na m panai adama a̱ ɗa̱ ba. I ɗaɗa i zuwai ɗa n suki Timoti wa̱ ɗa̱. N suku yi ta̱ u ta̱wa̱ u kondo ko uneki u ka̱ɗu u ɗa̱ u buwa ta̱ n utsura. M pana ta̱ wovon ko vuza vu kukondo u lyaꞋa ɗa̱ utsura, ɗa kpamu ulinga u tsu ra̱ka̱ wo okpoi gbani.
Timoti u danai ili i na we enei
6Gogo na ɗa Timoti wu uta̱i nwalu ma ɗa u yawai. U bonoko tsu ta̱ n arabali a singai a uneki wa̱ a̱ɗu u ɗa̱ koɓolo n ucigi feu. U dana tsu ta̱ i ci ciɓa tsu ta̱ m ma̱za̱nga̱ ali i cigai ye ene tsu tsu na a̱tsu feu ci cigai ce ene ɗa̱.
7Uma a̱ va̱, a̱tsu a̱ ka̱ci ka̱ tsu ci ta̱ n atakaci n a̱bunda̱i ali ɗa i e kuneke tsu atakaci ka̱u, amma ci ciya̱ ta̱ udoki u ka̱ɗu ka̱u, adama a na a̱ɗa̱ i buwa ta̱ n uneki wa̱ a̱ɗu wu utsura. 8Gogo na ci yeve ta̱ i shamgba ta̱ n utsura u Vuzagbayin, na lo ta na u ci neke tsu ta̱ katsura ka savu.
9Ci cikpa ta̱ Ka̱shile ka̱u adama a̱ ɗa̱! Adama a̱ ɗa̱ a ɗaɗa ci ciya̱i ma̱za̱nga̱ ma gbayin u Ka̱shile ka̱ tsu. 10Kanna n kayin dem ci yongoso ta̱ a kuyaꞋan kavasa n ugbami adama a̱ ɗa̱. Tsu tsu folonoso ta̱ Ka̱shile ka̱ ka̱sa̱kpa̱ tsu ce ene ɗa̱ kpamu adama a na i namba baci ili a̱ ubuta̱ wu uneki u ka̱ɗu u ɗa̱, ci ciya̱ tsu ɓa̱nka̱ ɗa̱.
11Ci yaꞋan ta̱ kavasa u Ka̱shile Esheku a̱ tsu n Vuzagbayin Yesu u ka̱sa̱kpa̱ tsu bana ce ene ɗa̱. 12Ci ciga ta̱ Vuzagbayin u zuwa ucigi u ɗa̱ u gbonguro ka̱ta̱ u saꞋwa ɗa̱ biꞋi a̱ ka̱tsuma̱ ka̱ ɗa̱ koɓolo n yaba dem kpamu, uteku u na ucigi u tsu u tsu saꞋwa ɗa̱. 13A ayin a na baci Vuzagbayin Yesu u bonoi n aza a ciɗa-ciɗa a̱ ni, avasa a̱ tsu a ɗa u zuwa a̱ɗu a̱ ɗa̱ a tsurakpa adama a na i yongo ciɗa a ayin a na i kushamgba e kelime ka̱ Ka̱shile Esheku a̱ tsu babu ta na vuza na u kushika ɗa̱.
Currently Selected:
1 Tosolonika 3: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
