1 Tosolonika 4

Kuyongo mayin n Ka̱shile

1A ukocishi nahannai, uma a̱ va̱, n kula ku Vuzagbayin Yesu tsu folono ɗa̱ ta̱ i yongo tsu na Ka̱shile ka kupana uyoꞋo. Tsu piꞋisaka ɗa̱ ta̱ ɗe i yaꞋan nannai, ko ali n gogo na yi ta̱ a kuyaꞋan nannai. Ci yaꞋanka ɗa̱ ta̱ odoki i doku i yaꞋan nannai 2adama a na i ciɓa ta̱ n i na tsu piꞋisakai ɗa̱ n kula ku Vuzagbayin Yesu.

3Ka̱shile ka ciga ɗa̱ ta̱ i yongo ciɗa, adama a na i suma unushi u tsugbani. 4Ka̱ta̱ yaba dem vu ɗa̱ u ka̱na̱ ka̱ci ka̱ ni, ka̱ta̱ kpamu u yongo ciɗa tsu na uma a kucikpa yi. 5Nannai vo kuyongo n a̱shawuya a gbani-gbani tsu na aza a̱ ka̱yimbi a ci yaꞋan ba. E yeve Ka̱shile n uye u ni ba.

6Ka̱ta̱ vu doro vuza nu vuza vu Kutoni ba, vi ɗika vuka vi ni a̱ ubuta̱ u kakuna ka nam pa ba, adama a na Ka̱shile ki ta̱ a̱ kutuka̱ n atakaci wa aza a icuꞋu yu unushi tsu nan lo ra̱ka̱. Tsu kushe ɗa̱ ta̱ ɗe mayin. 7Ka̱shile ke ɗeke tsu ta̱ ci yongo ciɗa, u ɗeke tsu tsu yongo wuma u tsu n a̱shinda̱ ba. 8Yaba dem vu na baci u iwain kutono wila̱ u nam pa, wila̱ u vuma u ɗa wi a̱ kukpa̱ɗa̱ kutono ba, amma Ka̱shile kaꞋa wi a kuꞋiwan, vuza na u nekei ɗa̱ Ayinviki a̱ ni.

9Ka̱shile n ka̱ci ka̱ ni u yotsongusu ɗa̱ ta̱ i ciganai, adama a nannai babu ili i na i kuzuwa mu n ɗanaka ɗa̱ ukuna wu ucigi wa aza o Kutoni u na u gaꞋin i yotsonku uma a̱ Ka̱shile. 10Mayun ɗa, ko n gogo na yi ta̱ n ucigi n a̱bunda̱i wa aza o Kutoni ra̱ka̱ a na i uɓon u Makidoniya. Uma a̱ va̱, ko a na wi nannai, tsu folono ɗa̱ ta̱ i doku ucigi a kubana we le ka̱u.

11Ili i na i gaꞋin vi cikala ka̱u i ɗaɗa: vi yongo n wuma u yuwu, yaꞋansa kusheshe ku ulinga u nu koci, ka̱ta̱ vi yaꞋansa ulinga dem n ekiye a̱ nu, tsu na tsu danai ɗa̱ n ayin a ɗe. 12Nannai, uma a na i aza o Kutoni ba, ele feu i ta̱ a kucikpa tsu na yi o kuyongo, yi kpamu o kudoku kuzuwa a̱shi wa aza o yoku adama a na e neke ɗa̱ ikebe ba.

Tsu na Vuzagbayin u kuta̱wa̱

13Uma a̱ va̱, n ciga ta̱ i yeve ili i na i kuciya̱ aza o Kutoni a na a̱ kuwa̱i ɗe, yi kpamu a̱ kuna̱mgba̱ ka̱tsuma̱ ka̱u tsa aza a na i babu a̱pa̱Ꞌa̱ ba. 14Ci neke ta̱ a̱ɗu a na Yesu u kuwa̱i ɗa u ɗenga̱i n wuma. Ci neke ta̱ a̱ɗu a ayin a na baci Ka̱shile ko bonokoi Yesu na kpamu, wi ta̱ o kubono n aza a na e nekei a̱ɗu n Yesu kafu a̱ kuwa̱.

15Tsu na kadanshi ka Vuzagbayin Yesu ki a̱ ka̱ci ka̱ ni, a̱tsu na ci n wuma a ayin a nan lo Vuzagbayin Yesu u ta̱wa̱ baci, tsa kulaꞋa aza a na a̱ kuwa̱i ɗe n kelime ba, ko kenu. 16Vuzagbayin a̱ ka̱ci ka̱ ni wi ta̱ a̱ kuta̱ gaɗi. A ayin a nan lo a ɗa uma a kupana kadanshi ku utsura n kacaꞋa ka̱u ka Vuzagbayin, ka̱ta̱ a pana yoroli yu ugbami i vuza vu kelime va alingata, ka̱ta̱ a panaka le a̱ kulika̱ kavana ka̱ Ka̱shile. N nannai, aza a na a̱ kuwa̱i ɗe n Yesu ele ɗa a̱ kuɗenga̱ biꞋi a cau. 17Ka̱ta̱ a̱tsu na ci biꞋi n wuma na a iɗika wi ta̱ a kushaɗa tsu a kubanka e eleshu koɓolo n ele, ka̱ta̱ ra̱ka̱ vu tsu ci cina Vuzagbayin gaɗi ka̱ta̱ ci shamgba n a̱yi ayin a babu uteku. 18Nannai ɗa i kudokusu ka̱ci ka̱ ɗa̱ utsura wa̱ a̱ɗu n kadanshi ka nam pa.

Currently Selected:

1 Tosolonika 4: asgNT

Highlight

Copy

Compare