1 Tosolonika 2

Ulinga u Bulusu o Tosolonika

1Uma a̱ va̱, i yeve ta̱ tsu ta̱wa̱ kene ɗa̱ gbani ba. 2Tsu na i yevei, ta ci ishi a̱ Filibi kafu tsu ta̱wa̱ na wa̱ ɗa̱. E neke tsu ta̱ ɗe atakaci, ɗa kpamu a yaꞋankai tsu kugoyi. Amma Ka̱shile ka̱ tsu ke neke tsu ta̱ ugbawansuvu adama a na tsu dana ɗa̱ ukuna wa Arabali a Singai a e keteshe, ko a na uma n a̱bunda̱i i a̱ kusa̱nka̱ tsu. 3Tsu tuka̱ ɗa̱ n akaka a aꞋuwa ba. Tsu tuka̱ ɗa̱ n a ɗa adama a na ci ta̱ a kuciga kuyaꞋanka ɗa̱ ugboji ba. Ci a kuciga tsu doro ɗa̱ ba. Ta nannai ba, ko kenu!

4Ka̱shile ku ushuku ta̱ n a̱tsu, ɗaɗa u nekei tsu Arabali a Singai a̱ ni adama a na tsu dana uma. Ili i na ci cigai i ɗaɗa ci neke Ka̱shile ma̱za̱nga̱, adama a na a̱yi ɗa vuza na u tsu kondo a̱ɗu a̱ tsu. Ci keɓece n ili i na uma a kudana ba. 5I yeve ta̱ mayun a na ci a kucikpa ɗa̱ n aꞋuwa ba, Ka̱shile a̱ ka̱ci ka̱ ni wi ta̱ o kuyotsongu ɗa̱ a na ili i na ci yaꞋin ci yaꞋan i ɗa adama a kalyaꞋa ba. 6Ci yaꞋan ili adama a na ci ciya̱ ucikpi wa̱ ɗa̱, ko wa aza o yoku ba.

7Adama a na, a̱tsu azusuki a̱ Kishi a ɗa, ci ta̱ a kufuɗa tsa kece ɗa̱ ili i na ci a kuciga dem. Amma ci yaꞋan nannai ba, tsu kucikpa, tso okpoi yuwu a̱ ka̱tsuma̱ ka̱ ɗa̱ tsu na ka̱na̱ku ka na ki e kuneꞋe mani n kula̱na̱ muku n ni. 8Ci ciga ɗa̱ ta̱ n a̱bunda̱i, ɗa ci a̱ ma̱za̱nga̱ ma kudana ɗa̱ Arabali a Singai a̱ Ka̱shile, tsu doku ci yaꞋin kpamu ma̱za̱nga̱ adama a na tsu ɓa̱nka̱ ɗa̱ a ili kakau adama a na yo okpo ta̱ uma a na ci cigai ka̱u.

9Uma a̱ va̱, i ciɓa tsu na ci yaꞋin ulinga ka̱u a ayin a na ci koɓolo n a̱ɗa̱. A ayin a na ci koɓolo n a̱ɗa̱ a kusala Arabali a Singai a̱ Ka̱shile, kanna n kayin ci ta̱ a kataci adama a na ci ciya̱ ikebe ka̱ta̱ tsu fuɗa tsu tsula ili i na ci cigai ta lo ce neke ɗa̱ a̱miki. 10A̱ɗa̱ ɗa ngan n tsu, Ka̱shile feu magan ma̱ tsu maꞋa, a danai ci ta̱ ciɗa m mayun babu kpamu vuza na u kudansuka tsu tsu na ci yaꞋin n a̱ɗa̱, a̱ɗa̱ na i nekei a̱ɗu a̱ ɗa̱ n Vuzagbayin. 11A̱ɗa̱ feu i yeve ta̱ a na ci yaꞋankai yaba dem vu ɗa̱ mayin tsu na kesheku ka ci yaꞋanka muku n ni mayin. 12Tsu folono ɗa̱ ta̱, tsu dokusu ɗa̱ ta̱ utsura wa̱ a̱ɗu, ɗa kpamu tsu kushangi yaba dem vu ɗa̱ u yongo tsu na Ka̱shile ka kupana uyoꞋo adama a na u ɗeke ɗa̱ ta̱ i uwa o tsugono ci ni ka̱ta̱ i pece tsugbayin koɓolo n a̱yi.

13A̱tsu ayin tutu ci cikpa ta̱ Ka̱shile adama a̱ ɗa̱ a na i nekei a̱ɗu n akaka a na tsu dansai. I dana kpamu kadanshi ka̱ tsu kadanshi ka uma kaꞋa koci ba. A̱ɗa̱ yu ushuki ta̱ n akaka a tsu na a ɗa i mayun: akaka a̱ Ka̱shile a ɗa. Akaka a nam pa i ta̱ a kulyaꞋa kelime n kuyaꞋan ulinga wa̱ ɗa̱, a̱ɗa̱ vu na i nekei a̱ɗu.

14Uma a̱ va̱, ayin a na yi isai ili i na tsu danai, uma a̱ ɗa̱ e nekei ɗa̱ atakaci. Nannai ɗa yo okpoi derere n aza o Kutoni a̱ Ka̱shile n a̱bunda̱i na ɗe a Yahuda. Uma a nan lo e neke ta̱ a̱ɗu u Yesu Kishi, amma aza e le, Ayahuda e neke le ta̱ feu atakaci. 15Ayahuda a nan lo a una ta̱ eneki e le, aza o yoku tamkpamu ali a unai Vuzagbayin Yesu. Gogo na e neke tsu ta̱ atakaci ali ɗa o lokoi tsu. Uma a nam pa a yaꞋan i na Ka̱shile ka panai uyoꞋo ba, ɗa o okpoi irala i uma ra̱ka̱. 16A̱ sa̱nka̱i tsu kuyaꞋanka Aza̱ka̱yimbi kadanshi adama a na ta lo a̱ ciya̱ wishi. A yaꞋin nannai ɗa a lyaꞋi kelime n kudoku unushi u le. Gogo na Ka̱shile ka yaꞋan ta̱ wupa ali u nekei le atakaci.

Bulusu u ciga ta̱ u bana we ene le

17Uma a̱ va̱, ana o lokoi tsu wa̱ ɗa̱, ci yaꞋan megeshe ba ɗa tsu doku ci yaꞋin kataci adama a na tsu bono kpamu. Ko kenu tsu ka̱sa̱kpa̱ kuciɓa n a̱ɗa̱ ba, ɗa kpamu ci cigai ka̱u ce ene ɗa̱. 18Mayun ɗa ci cigai ce ene ɗa̱, mpa Bulusu, n dakakai ayin n a̱bunda̱i adama a na n ta̱wa̱ wa̱ ɗa̱, amma MalyaꞋi ma̱ sa̱nka̱ tsu ta̱. 19Ili i na i zuwai ɗa n cigai kene ɗa̱ i ɗaɗa i tuka̱ tsu ta̱ n a̱pa̱Ꞌa̱, koɓolo m ma̱za̱nga̱, a̱ɗa̱ ɗa ta na urotu u na ci lyaꞋi. Yi ta̱ a kuzuwa tsu ci yaꞋan ma̱za̱nga̱ e kelime ka Vuzagbayin Yesu a ayin a na baci u bonoi. 20Mayun, a̱ɗa̱ ɗa tsugbayin tsu tsu m ma̱za̱nga̱ ma̱ tsu.

Currently Selected:

1 Tosolonika 2: asgNT

Highlight

Copy

Compare