1 Biturusu 4

YaꞋan tsu na Yesu u yaꞋin

1Gogo na, a na Kishi u soꞋi atakaci n ikyamba i ni n adama a̱ tsu, a̱ɗa̱ feu i foɓuso kusoꞋo atakaci tsu nan lo. Ili i na i zuwai ɗa i kuyaꞋan nannai i ɗaɗa yu ushuku baci kusoꞋo atakaci adama a̱ Kishi, yi ta̱ a kuꞋiwan kuyaꞋan unushi. 2Tsu na kpamu yi o kutono ili i gbani-gbani yi ikyamba i ɗa̱ ba, amma yi a kuyaꞋan ulinga n wuma u ɗa̱ ra̱ka̱ adama a na i yaꞋan ili i na Ka̱shile ka cigai. 3I yaꞋan ta̱ ayin n a̱bunda̱i o kuyongo an uma a na e yevei Ka̱shile ba. I ci yaꞋan ta̱ unushi u tsugbani. Yi ta̱ n kusheshe ku gbani-gbani, I tsu soꞋo ta̱ ali ili i na i soꞋi va i maka ɗa̱, I tsu uwa ta̱ a̱ ubuta̱ u ka̱ɗiva̱† ka na a ci yaꞋan n ili i kavama kakau ka̱ta̱ i soꞋo ali i yaꞋan kagbani-gbani. Yi ta̱ kpamu o kutono a̱ma̱li ili i na Ka̱shile ka iwain. 4A̱ja̱Ꞌa̱ a̱ ɗa̱ a cacau i ta̱ e mereve a na i doku i ɓolongi n ele i baci a kuyaꞋan ili i kavama kakau i na i yotsoi ba. Ali a tsu dansa ta̱ ukuna u gbani-gbani adama a̱ ɗa̱. 5Amma mayun ɗa a̱ ushukuku vuza na u kuyaꞋanka yaba dem afada, aza a wuma n a̱kpisa̱ dem. 6Adama a nannai Yesu u yaꞋin kadanshi ka Arabali a Singai wa aza a na i ngasa gogo na. Ko a na i a kuyaꞋanka le afada uteku u na a kuyaꞋanka uma ra̱ka̱, u yaꞋanka le ta̱ nannai adama a na a̱ ciya̱ ka̱ba̱nga̱ ka na o yongo n wuma, uteku u na Ka̱shile ki n wuma.

7Ili ra̱ka̱ yi ta̱ o kukotso kanna ke te babu megeshe. Adama a nannai i yongo n asuvu a singai n kureme ku ka̱ci ka̱ ɗa̱, i ciya̱ i yaꞋan avasa. 8Ili i na i laꞋi n kugaꞋan ra̱ka̱, mayun ɗa i lyaꞋa kelime n kuyaꞋankpanai ucigi u mayun. Ili i na i zuwai i ɗaɗa, yi ta̱ a kucinukpaka le n ili i gbani-gbani n a̱bunda̱i i na a yaꞋankai ɗa̱ ayin tutu. 9Mayun ɗa i rabasa uma a kpaꞋa ku ɗa̱, ka̱ta̱ i yaꞋan mololo adama a nan lo ba.

10Ka̱shile ke neke ta̱ kuneꞋe kakau u yaba dem vu ɗa̱, u yotso ta̱ i yaꞋan ulinga n ili i na Ka̱shile ke nekei ɗa̱ mayin adama a na i yotsongu ugaꞋin u Ka̱shile wa aza o yoku. 11KuneꞋe ku nu kadanshi kaꞋa baci yaꞋan kadanshi adanshi Ka̱shile kaꞋa ki a kadanshi wa̱ nu. KuneꞋe ku nu kuɓa̱nka̱ ku uma ku ɗa baci, ɓa̱nka̱ le n utsura u na Ka̱shile ke nekei nu dem. Ka̱ta̱ Ka̱shile ka̱ ciya̱ tsugbayin a̱ ubuta̱ wi ili dem a̱ ubuta̱ u Yesu Kishi. Tsugbayin tsu Ka̱shile ci n uteku ba, ta feu nannai utsura u Ka̱shile wi n uteku ba. Ta nannai.

I ta̱ a kutakacika ɗa̱

12Uma a̱ va̱, ka̱ta̱ i yaꞋan mereve adama a na i a kutakacika ɗa̱ a̱ ubuta̱ u kukondo an akina ba. Ka̱ta̱ i sheshe adanshi atakaci a komoci ki ili kaꞋa ba. 13U laꞋa ta̱ n kugaꞋan i yaꞋan ma̱za̱nga̱ adama a na yi punu a̱ ubuta̱ wa atakaci a̱ Kishi. YaꞋin nannai ka̱ta̱ i yeve ma̱za̱nga̱ ma̱ a̱bunda̱i a ayin a na o yotsongi tsugbayin tsu Kishi. 14A shika ɗa̱ baci adama a kula ku Kirisiti Kishi, yi isa ta̱ ɗe una̱singai adama a na nannai va u yotsongu ta̱ tsugbayin tsa Ayinviki a̱ Ka̱shile ci ta̱ n a̱ɗa̱. 15U yotso ta̱ vu soꞋo atakaci vi baci a kuyaꞋan munaka, ko vi baci a kuyaꞋan uboki, ko ili yu unushi i yoku. Ta feu nannai vu uwa baci a kadanshi ka na ka burai nu ba, mayun ɗa vu soꞋo atakaci. 16Ta ki nannai ba, a takacika wu baci adama a na vi vuza vu Kutoni. Ka̱ta̱ vu pana wono adama a icuꞋu ya atakaci a nam pa ba. U yotso ta̱ vi neke Ka̱shile tsugbayin an vi a̱ kuɓa̱na̱ kula ku nam pa.

17Gogo na ɗaɗa ayin a na Ka̱shile ki a̱ kugita̱ afada a̱ ni, wi ta̱ ta na a̱ kugita̱ kuyaꞋanka aza a kpaꞋa a̱ ni afada a. A̱ gita̱ baci afada n a̱tsu biꞋi aza o Kutoni, yi ɗa̱i icuꞋu ya afada ya atakaci i na u kuyaꞋanka aza a na a iwain kutono Arabali a Singai a̱ ni? 18Kadanshi ka̱ Ka̱shile ka danai,

“Wishi u tsu ta̱wa̱ u uma a̱ usuɓi† n uyoꞋo ba,

amma uma a na a iwain kutono Ka̱shile ɗa a yaꞋin unushi,

uma a nam pa i ta̱ a kulaꞋa n kusoꞋo atakaci.”#An. 11:31.

19Kadanshi ka nam pa ka ra̱ka̱ ka ɗaɗa, vi baci o kusoꞋo atakaci tsu na Ka̱shile ka cigai, vi lyaꞋa kelime n kuyaꞋan ili i na yi derere, ka̱ta̱ vi neke kpamu ka̱ɗu n Ka̱shile ka na ka yaꞋin nu wi ta̱ a̱ kuɓa̱nka̱ wu. Mayun ɗa wi a̱ kukpa̱ɗa̱ kuɓa̱nka̱ wu ba.

Currently Selected:

1 Biturusu 4: asgNT

Highlight

Copy

Compare